‘Dekunnu Mlẹnmlẹn’ Gando Ahọluduta Jiwheyẹwhe Tọn Go
1. Owe tẹwẹ mí na jẹ pinplọn ji to osẹ he bẹsọn 14 mars to Biblu Pinplọn Agun tọn whenu?
1 To osẹ he bẹsọn 14 mars 2011, mí na jẹ owe ‘Dekunnu Mlẹnmlẹn’ Gando Ahọluduta Jiwheyẹwhe Tọn Go plọn ji to Biblu Pinplọn Agun tọn whenu. Owe ehe dọhodo owe Owalọ lẹ tọn ji to aliho de mẹ bọ kandai nujijọ he e bẹhẹn lẹ tọn sọgan fọnjlodotena wehiatọ lẹ. Kakati nado basi zẹẹmẹ wefọ lẹ tọn debọdo-dego, owe Dekunnu basi bladopọ nuhe mí plọn sọn kandai owe Owalọ lẹ tọn mẹ lẹ tọn bosọ gọalọna mí nado yọ́n lehe dopodopo mítọn sọgan yí yé do yizan mẹ do.—Lom. 15:4.
2. Donù adà he owe Dekunnu bẹhẹn delẹ go.
2 Adà Owe lọ Tọn Lẹ: Homẹbibiọ he tin to weda 2tọ ji yin wekanhlanmẹ owanyi tọn de sọn Hagbẹ Anademẹtọ dè, ehe do lehe yé jlo dọ mí ni duvivi owe lọ tọn do hia. Bẹsọn weta 2 ji, bladopọ kleun de na nọ do nuagokun tangan weta dopodopo tọn po wefọ he ji adà owe Owalọ lẹ tọn he na yin hodọdeji lẹ po sinai do hia. Weta susu bẹ apotin nudọnamẹ tọn he basi zẹẹmẹ gigọ́ do gbẹtọ, nọtẹn kavi nujijọ lẹ ji hẹn. Tẹnmẹ daho he tin to tónu owe lọ tọn lẹ yin awuwlena na hiẹ nido basi kandai dile a to nuplọn. Yẹdide whanpẹnọ he do nujijọ Biblu tọn lẹ hia lẹ yin awuwlena do owe lọ blebu mẹ, na hiẹ nido yí nukun homẹ tọn do pọ́n nujijọ tangan lọ lẹ, podọ weda godo tọn yin awuwlena nado basi zẹẹmẹ yẹdide voovo he tin to owe lọ mẹ lẹ tọn. Yẹdide otò tọn lẹ he na gọalọna mí nado mọ lehe sinsẹ̀n-basitọ hatọ owhe kanweko tintan tọn lẹ hẹn wẹndagbe lọ gbayipe “kaka yì awà he dẹn hugan aigba tọn lẹ ji” do tin to wepa tintan po godo tọn po mẹ.—Owalọ 1:8.
3. Dile mí na to owe Owalọ lẹ tọn plọn, kanbiọ titengbe tẹlẹ wẹ mí na mọ gblọndo na?
3 Gblọndo Na Kanbiọ Titengbe Delẹ: Dogbigbapọnna owe Owalọ lẹ tọn na gọalọna mí nado mọnukunnujẹ gblọndo kanbiọ titengbe delẹ tọn mẹ hezeheze gando lizọnyizọn Klistiani tọn go. Di apajlẹ, azọ́n gọna owẹ̀n tẹwẹ nọ dohiagona hodotọ nugbo Jesu Klisti tọn lẹ? Mẹnu wẹ nọ deanana azọ́n yẹwhehodidọ lẹdo aihọn pé tọn ehe, podọ gbọnna? Dotẹnmẹ tẹlẹ wẹ homẹkẹn po nukundiọsọmẹ po nọ hùn dotena lizọnyizọnwatọ lẹ? Adà tẹwẹ gbigbọ wiwe nọ yiwà to lizọnyizọn mítọn mẹ?
4. Etẹwẹ na gọalọna mí nado duvivi owe ehe tọn ganji?
4 Nado duvivi owe lọ tọn ganji, nọ wleawu jẹnukọn nado na gblọndo to Biblu Pinplọn Agun tọn whenu. Ma nọ gọ̀n opli lẹ blo, podọ nọ lẹnnupọndo lehe hiẹ sọgan yí nuhe a plọn lẹ do yizan mẹ to lizọnyizọn towe mẹ do ji. Mì dike dogbigbapọnna owe he fọnjlodotenamẹ ehe ni whàn mí nado dekunnu mlẹnmlẹn gando Ahọluduta Jiwheyẹwhe tọn go!—Owalọ 28:23.