Be Hiẹ Ko Wleawufo Na Nujijọ Ajiji Dotowhé Tọn de Ya?
Nujijọ ajiji dotowhé tọn de sọgan wá aimẹ to whedepopenu matin avase. (Jak. 4:14) Enẹwutu, mẹhe zìn na wleawudai dile e na yọnbasi do. (Howh. 22:3) Be hiẹ ko de nukunpedomẹgo po aliho nuyiwa dotowhé tọn he hiẹ na kẹalọyi lẹ po bo basi kandai nudide towe tọn ya? Nado gọalọna we, video lọ Soigner sans transfuser—Besoins et droits du patient [Aliho Nukunpedomẹgo Matin Hùndido Tọn—Nuhudo po Jlọjẹ Awutunọ Tọn lẹ Po], he yin nupinpọn awetọ to DVD lọ Des Alternatives à la Transfusion—Documentaires ji ko yin awuwlena. Dile hiẹ to video lọ pọ́n, tẹnpọn nado dín gblọndo kanbiọ he bọdego ehelẹ tọn. Na video lọ bẹ apadewhe mẹzizẹ tọn kleun delẹ hẹn wutu, mẹjitọ lẹ dona yí wuntuntun zan to whenue yé to video lọ pọ́n po yọpọ lẹ po.
(1) Naegbọn mẹdelẹ to pipli dotozọ́nwatọ lẹ tọn mẹ do to hùndonamẹ vọ́ gbeje pọ́n? (2) Na apajlẹ mẹzizẹ he gẹdẹ atọ̀n tọn, he yin bibasi matin hùndido. (3) Naegbọn dotozọ́nwatọ po mẹzẹtọ fọtọ́n susu po lẹdo aihọn pé jlo nado penukundo awutunọ lẹ go matin hùndido? (4) Etẹwẹ dodinnanu dotowhé tọn agọe tọn lẹ dehia gando yizan ohùn tọn go? (5) Owù tẹlẹ wẹ hùndido bẹhẹn to amasinzọnwiwa-liho? (6) Tadona tẹ kọ̀n wẹ azọ́nyọnẹntọ susu ko wá gando ale he tin to nunọnutẹnmẹ hùndido tọn lẹ mẹ go? (7) Etẹwẹ nọ hẹn whèdomẹ ohùn tọn wá, podọ etẹwẹ sọgan yin wiwà nado hẹn ohùn he whè lọ gọwá? (8) Etẹwẹ sọgan gọalọ nado hẹn nuvikun vẹẹ ohùn tọn [globule rouge] gọwá lanmẹ na awutunọ de? (9) Ayiha tẹlẹ wẹ ko yin kinkan nado de ohùn hẹngu pò to mẹzizẹ whenu? (10) Be nunọnutẹnmẹ hùndido tọn lẹ sọgan wazọ́n na yọpọ lẹ kavi na mẹhe tin to kúdonu lẹ ya? (11) Etẹwẹ yin dopo to nuhe dona yin wiwà jẹnukọn lẹ mẹ gando nukunpedomẹgo dotowhé tọn dagbe de go?
To whenuena e yindọ nudide mẹdetiti tọn he sinai do ayihadawhẹnamẹnu mẹdopodopo tọn ji wẹ e yin nado kẹalọyi delẹ to nukunpedomẹgo he yin didohia to video lọ mẹ lẹ mẹ, ma nọte kakajẹ whenue a wá pannukọn nujijọ ajiji de whẹpo do gbadopọnna nuhe a na kẹalọyi kavi lala blo. Weta 7tọ owe Owanyi tọn po alọdlẹndonu he e bẹhẹn lẹ po, gọna owe-to-wemẹ he tin to Lizọnyizọn Ahọluduta Tọn Mítọn novembre 2006 tọn mẹ na gọalọna we nado basi nudide he sọgbe lẹ. Enẹgodo, eyin hiẹ ko yí baptẹm, kàn nudide towe lẹ do kalti DPA lọ mẹ, bo nọ hẹn ẹn do dewe ji to whepoponu.
[Yẹdide to weda 3]
Be hiẹ ko de nukunpedomẹgo po aliho nuyiwa dotowhé tọn he hiẹ na kẹalọyi lẹ po bo basi kandai yetọn ya?