Oylọ-Basinamẹwe Oflin Tọn Na Yin Mimá Bẹsọn 17 Mars
1. Nujijla tẹwẹ na bẹjẹeji to 17 mars?
1 To whemẹwhemẹ, hùnwhẹ Oflin tọn nọ hẹn ẹn yọnbasi na mí nado lá okú Jesu tọn. (1 Kọl. 11:26) Enẹwutu, mí jlo dọ mẹdevo lẹ ni kọnawudopọ hẹ mí bo sèhó gando nunina owanyinọ Jehovah tọn go—enẹ wẹ ofligọ lọ. (Joh. 3:16) To owhe ehe mẹ, nujijla mítọn nado basi oylọna gbẹtọ lẹ wá Oflin lọ tẹnmẹ na bẹjẹeji to samedi 17 mars. Be hiẹ to jejeji nado tindo mahẹ gigọ́ to e mẹ ya?
2. Etẹwẹ mí sọgan dọ to whenue mí to oylọ-basinamẹwe lọ zedonukọnnamẹ?
2 Etẹwẹ Mí Na Dọ? E na yọ́n hugan nado nọ glido. Mí sọgan dọmọ: “Mì kudo lewhenu. Mí jlo na basi oylọna whẹndo mìtọn wá nujijọ whemẹwhemẹ tọn titengbe de tẹnmẹ he na yin bibasi lẹdo aihọn pé to 5 avril. Hodidọ sinai do Biblu ji de na yin nina vọnu bo na basi zẹẹmẹ ale he mí mọyi sọn okú Jesu tọn mẹ lẹ po nuhe ewọ to wiwà to alọnu din po tọn. Nọtẹn po ogàn he mẹ opli lọ na yin bibasi te to lẹdo mítọn mẹ po yin kinkan do oylọ-basinamẹwe lọ ji.” Eyin mí to oylọ-basinamẹwe lọ má to sẹfifo lẹ, mí sọgan ze linlinnamẹwe lẹ donukọnnamẹ ga.
3. Nawẹ mí sọgan basi oylọna mẹsusu gbọn?
3 Basi Oylọna Mẹsusu Dile E Na Yọnbasi Do: Yanwle mítọn wẹ nado basi oylọna mẹsusu dile e na yọnbasi do. Enẹwutu hẹn ẹn diun dọ a ylọ plọnmẹ Biblu, gọyìpọn, hẹnnumẹ, azọ́nwatọgbẹ́, wehọmẹvigbẹ́, kọmẹnu, po mẹyinyọnẹn towe devo lẹ po. Mẹho agun tọn lẹ na dọ lehe azọ́n na yin wiwà to aigba-denamẹ mìtọn ji do. Nujijla he mí nọ basi to whemẹwhemẹ nado ylọ gbẹtọ lẹ wá Oflin lọ tẹnmẹ nọ hẹn kọdetọn dagbe wá. To whenue nawe de yì hùnwhẹ lọ tẹnmẹ to owhe he wayi, dopo to aisinnunamẹtọ lẹ mẹ dọna ẹn dọ emi na gọalọna ẹn nado mọ wẹnlatọ he basi oylọna ẹn lọ. Ṣigba nawe lọ dọ dọ emi ma yọ́n mẹde to finẹ, dọ mẹhe to yẹwhehodọ sọn whédegbè jẹ whédegbè to azán lọ gbè de wẹ na emi oylọ-basinamẹwe lọ.
4. Naegbọn mí dona tindo mahẹ zohunhun tọn to nujijla lọ mẹ?
4 E yọnbasi dọ mẹde ni wá Oflin lọ tẹnmẹ na hiẹ basi oylọna ẹn wutu. Ṣigba eyin mẹhe a ylọ lẹ wá kavi gọ̀n, vivẹnudido towe lẹ na gbẹ́ yin kunnudide de. Oylọ-basinamẹwe he a má lẹ na dohia gbẹtọ lẹ dọ Jesu to gandu todin. Mahẹ zohunhun tọn towe na dohia mẹlẹpo—yèdọ mẹhe to aigba-denamẹ lọ ji lẹ, wẹnlatọ hatọ lẹ, podọ na taun tọn, Jehovah—dọ a yọ́n pinpẹn nunina ofligọ lọ tọn taun.—Kọl. 3:15.