“Mì Nọ Wà Ehe”—Oflin Na Yin Bibasi to 5 Avril

1. Naegbọn Oflin lọ bibasi do yin nujọnu?

¹ “Mì nọ wà ehe to oflin ṣie mẹ.” (Luku 22:19) Po hogbe ehelẹ po, Jesu degbena hodotọ etọn lẹ nado nọ flin okú avọ́sinsan tọn etọn. Na ofligọ lọ hẹn ale susu wá na mí wutu, azán Oflin whemẹwhemẹ tọn lọ wẹ yin azán titengbe hugan na Klistiani lẹ. Dile Oflin owhe ehe tọn he na yin bibasi to 5 avril to sisẹpọ, nawẹ mí sọgan do pinpẹn-nutọn-yinyọnẹn mítọn hia Jehovah gbọn?—Kọl. 3:15.

2. Nawẹ mí sọgan dohia dọ mí yọ́n pinpẹn Oflin lọ tọn gbọn nupinplọn po ayihamẹlinlẹnpọn po dali gbọn?

² Wleawudai: To paa mẹ, mí nọ wleawudaina nuhe yin nujọnu na mí lẹ. Mí sọgan wleawuna ahun mítọn na Oflin lọ gbọn nupinplọn dopọ to whẹndo mẹ do nujijọ he wá aimẹ to azán godo tọn he Jesu yizan to aigba ji lẹ ji po ayihamẹlinlẹnpọn do yé ji po dali. (Ẹzla 7:10) Wefọ he donù nujijọ enẹlẹ go delẹ yin sislẹ to sunzanhiawe mítọn mẹ podọ to Dogbapọnna Owe-Wiwe lẹ Egbesọegbesọ mẹ. Ṣigba, wefọ susu dogọ he donù nujijọ enẹlẹ go po weta he mẹ nujijọ lọ lẹ sọawuhia te to owe Dawe Klohugan mẹ po lẹ sọ yin sislẹ to Atọ̀họ̀-Nuhihọ́ lọ Tọn, [Flansegbe] 1^er février 2011, weda 23-24 mẹ.

3. Nawẹ mí sọgan dohia dọ mí yọ́n pinpẹn Oflin lọ tọn gbọn yiyidogọna mahẹ mítọn to lizọnyizọn lọ mẹ dali gbọn?

³ Dọyẹwheho: Mí sọgan sọ do pinpẹn-nutọn-yinyọnẹn mítọn hia gbọn whenu susu yiyizan to azọ́n yẹwhehodidọ tọn mẹ dile mí penugo do dali. (Luku 6:45) Nujijla lẹdo aihọn pé de na bẹjẹeji to Sibigbe 17 mars nado basi oylọna mẹdevo lẹ wá Oflin lọ. Be hiẹ sọgan vọ́ tito towe jlado nado yí whenu susu dogọ zan to lizọnyizọn lọ mẹ, vlavo gbọn gbehosọnalitọ alọgọtọ tọn bibasi dali ya? Mì sọgan dọhodo enẹ ji to sinsẹ̀n-bibasi whẹndo tọn mìtọn he na bọdego whenu.

4. Ale tẹlẹ wẹ Oflin lọ bibasi na hẹnwa na mí?

⁴ Lehe e nọ yin alenu na mí nado wá Oflin lọ to whemẹwhemẹ do sọ! Ayajẹ po owanyi mítọn na Jiwheyẹwhe po nọ sudeji to whenue mí lẹnayihamẹpọn do alọtútlú Jehovah tọn he e dohia gbọn Visunnu detọ́n dopo akàn etọn ninamẹ taidi ofligọ de dali ji. (Joh. 3:16; 1 Joh. 4:9, 10) Ehe nọ whàn mí ma nado nọgbẹ̀ na míde ba. (2 Kọl. 5:14, 15) Mí sọ nọ yin whinwhàn nado pà Jehovah to gbangba. (Ps. 102:19-21) Na nugbo tọn, devizọnwatọ Jehovah tọn lẹ gbọn pinpẹn-nutọn-yinyọnẹn dali yí jejejininọ do to tenọpọn dotẹnmẹ he Oflin lọ he na yin bibasi to 5 avril na hundote na mí nado ‘lá okú Oklunọ tọn.’—1 Kọl. 11:26.