Vọjlado lẹ Gando Opli Osẹ Ṣẹnṣẹn Tọn Go

Bẹjẹeji sọn osẹ he bẹsọn 3 septembre ji, gànmẹ he nọ yin yiyizan na Biblu Pinplọn Agun tọn na diọ sọn nukunwhiwhe 25 jẹ 30. To hodidọ bẹjẹeji tọn mẹ, mẹhe na deanana opli lọ dona yí nukunwhiwhe dopo do basi bladopọ nuhe mí plọn to osẹ he wayi mẹ tọn. Gànmẹ Opli Sinsẹ̀nzọn tọn lọsu na diọ sọn nukunwhiwhe 35 jẹ 30. Adà depope ma nasọ yin didedovo na nulila lẹ ba. Kakatimọ, nulila depope dona yin bibasi to bẹjẹeji adà tintan tito-to-whinnu lọ tọn. To whẹho susu mẹ, nulila kleun de wẹ dona yin bibasi, eyin e tin janwẹ, podọ e ma yin dandan nado dọ nuhe na yin zizedonukọnnamẹ to opli lọ whenu lẹ. Nulila he gando sinsẹ̀nzọn kunnudegbe tọn po tito-to-whinnu wiwejininọ tọn po go lẹ gọna nudọdomẹ lẹ ma dona nọ yin bibasi. (km 10/08 weda 1, huk. 4) Eyin nulila gaa de na yin bibasi, e na yọ́n hugan dọ mẹhe na tindo mahẹ to opli lọ mẹ lẹ ni yọnẹn jẹnukọn, na yé nido pò whenu dai to adà yetọn whenu.