Nọ Diọalọ to Linzọnyizọn lọ Mẹ
1. Etẹwẹ mí sọgan plọn sọn lehe Klistiani dowhenu tọn lẹ diọalọ do mẹ?
1 Klistiani dowhenu tọn lẹ dọyẹwheho wẹndagbe lọ tọn na gbẹtọ he wá sọn aṣa voovo lẹ mẹ podọ sọn sinsẹ̀n voovo lẹ mẹ. (Kọl. 1:23) Dile etlẹ yindọ owẹ̀n dopolọ wẹ yé lá—yèdọ owẹ̀n Ahọluduta Jiwheyẹwhe tọn—yé diọalọ to nuzedonukọnnamẹ yetọn lẹ mẹ sọgbe hẹ hosetọ yetọn lẹ. Di apajlẹ, to whenue Pita to hodọna Ju he tindo sisi sisosiso na Owe-wiwe lẹ, e yihodọ sọn dọdai yẹwhegán Joẹli tọn mẹ nado bẹ hodidọ etọn jẹeji. (Owalọ 2:14-17) Ṣigba to whenue Paulu to hodọna Glẹkinu lẹ, ewọ yihojlẹdohogo hẹ yé sọgbe hẹ ninọmẹ yetọn dile kandai Owalọ lẹ 17:22-31 tọn dohia do. To aigba-denamẹ delẹ ji to egbehe, na gbẹtọ lẹ nọ na sisi Owe-wiwe lẹ wutu, mí sọgan yí Biblu zan po awubibọ po dile mí to yẹwhehodọ sọn whédegbè jẹ whédegbè. Etomọṣo, e sọgan biọ dọ mí ni yí nuyọnẹn zan to whenue mí to hodọna mẹhe ma tindo ojlo depope to Biblu mẹ lẹ kavi mẹhe tin to sinsẹ̀n he ma yin Klistiani tọn mẹ lẹ.
2. Nawẹ mí sọgan yí owe he na yin zizedonukọnnamẹ lẹ zan nado gọalọna mẹhe tindo sisi na Biblu po mẹhe ma nọ wàmọ lẹ po gbọn?
2 Nọ Yí Owe He Na Yin Zizedonukọnnamẹ lẹ Zan Ganji: Owe he na yin zizedonukọnnamẹ to owhe sinsẹ̀nzọn tọn ehe mẹ lẹ na nọ diọ to osun awe awe mẹ bo na nọ sinai do linlinnamẹwe, alọnuwe pẹvi po alọnuwe lẹ po ji. Enẹwutu, eyin suhugan mẹhe tin to aigba-denamẹ mítọn ji lẹ tọn ma tlẹ tindo ojlo to Biblu mẹ, mí na penugo nado ze owe he na fọnjlodotena yé de donukọnna yé. Eyin mí ma tlẹ hia wefọ de kavi dlẹnalọdo Biblu tlọlọ to dlapọn tintan whenu, mí sọgan lẹkọyi mẹhe do ojlo hia lẹ dè po yanwle lọ po nado gọalọna yé nado wleawuna yise to Mẹdatọ lọ po Ohó gbọdo etọn po mẹ. To alọ devo mẹ, eyin mí to yẹwhehodọ to fie gbẹtọ lẹ tindo sisi na Biblu jẹ obá de mẹ te, mí sọgan yí owe kavi alọnuwe he na fọnjlodotena yé lẹ zan. Na taun tọn, mí sọgan yí owe Biblu Plọn Mí kavi alọnuwe Dotoaina Jiwheyẹwhe po Dotoaina Jiwheyẹwhe bo Nọgbẹ̀ Kakadoi po zan to whedepopenu, mahopọnna nuzedonukọnnamẹ osun lọ tọn. Nuhe yin nujọnu hugan wẹ nado nọ diọalọ sọgbe hẹ whétọ dopodopo.
3. Aliho tẹ mẹ wẹ ahun mẹhe tin to aigba-denamẹ mítọn ji lẹ tọn sọgan yin yiyijlẹdo aigba de go te?
3 Wleawuna Aigba Lọ: Ahun gbẹtọ tọn sọgan yin yiyijlẹdo aigba go. (Luku 8:15) Kẹdẹdile aigba delẹ nọ biọ azọ́n susu whẹpo glesi de nido donú do e ji do, mọ wẹ e nọ biọ vivẹnudido vonọtaun do nado fọ́n ojlo mẹdelẹ tọn dote whẹpo do dó okún nugbo lọ tọn do ahun yetọn mẹ na e nido sọgan doadọ̀do bo whẹ́n. Wẹndagbe-jlatọ owhe kanweko tintan whenu tọn lẹ do okún nugbo lọ tọn do aigba wunmẹ lẹpo ji, podọ enẹ hẹn pekọ po ayajẹ po wá na yé. (Owalọ 13:48, 52) Mílọsu sọgan tindo kọdetọn dagbe eyin mí nọ diọalọ to nuzedonukọnnamẹ mítọn lẹ mẹ.