Apotin Kanbiọ Tọn

◼ Etẹwẹ na dohia eyin mí na jo owe do na mẹde?

Onú titengbe he mí dona pọ́n wẹ ojlo mẹlọ tọn. Eyin e do ojlo ahundopo tọn hia, mí sọgan jo linlinnamẹwe awe, kavi alọnuwe de, kavi owe de, kavi owe devo he mí to zizedonukọnnamẹ do na ẹn. Mí na wàmọ eyin mí tlẹ mọdọ mẹlọ ma tindo akuẹ susu kavi ma tindo depope nado nọgodona azọ́n lẹdo aihọn pé tọn lọ. (Job 34:19; Osọ. 22:17) To alọ devo mẹ, mí ma na jo owe họakuẹ mítọn lẹ do na mẹhe ma yọ́n pinpẹn yetọn lẹ gba.—Mat. 7:6.

Nawẹ whétọ de sọgan do ojlo hia gbọn? Ojlo etọn nado dọhodopọ hẹ mí yin kunnudenu dagbe dopo. Todidoai na mí, gblọndonina na kanbiọ he mí kanse lẹ, podọ pọndohlan etọn didọ nọ dohia dọ e tindo ojlo to hodọdopọ lọ mẹ. E sọgan dohia dọ emi tindo sisi na Ohó Jiwheyẹwhe tọn eyin e hodo mí dile mí to Biblu hia. To whedelẹnu, e nọ gọalọ nado kanse whétọ lọ eyin e na hia owe he mí to zizedonukọnna ẹn lọ. Wẹnlatọ lẹ dona nọ yí zinzin zan nado yọnẹn eyin mẹde tindo ojlo kavi lala. Di apajlẹ, to whenue mí to mahẹ tindo to kunnudide tòhomẹ-liho ji tọn mẹ, e ma na sọgbe nado nọ má linlinnamẹwe, alọnuwe, kavi owe lẹ na mẹhe mí dukosọ hẹ lẹpo. Eyin mí ma penugo nado yọnẹn eyin mẹde tindo ojlo, e na yọ́n hugan nado na ẹn oylọ-basinamẹwe kavi alọnuwe pẹvi de.

Mọdopolọ, sọha owe he wẹnlatọ de nọ mọyi to owe yitẹn lẹ tọn dona sinai do owe he e tindo nuhudo etọn nado hẹn lizọnyizọn etọn di ji, e ma yin do nugopipe etọn nado basi nunina ji. Nunina he mí nọ basi lẹ ma yin nado suahọ owe lẹ tọn gba, ṣigba nado nọgodona adà azọ́n yẹwhehodidọ lẹdo aihọn pé tọn mítọn lẹpo. Mahopọnna ninọmẹ akuẹzinzan tọn mítọn, pinpẹn-nutọn-yinyọnẹn na whàn mí nado nọ yí ojlo do basi nunina sọn matindo mítọn mẹ, e ma yin sọn lánkan mítọn mẹ, nado nọgodona nuhe gando Ahọluduta lọ go lẹ. (Malku 12:41-44; 2 Kọl. 9:7) Enẹ nasọ whàn mí nado nọ yí owe he mí tindo nuhudo etọn lẹ kẹdẹ bo ma nado hẹn nutindo yẹwhehọluduta tọn lẹ gú.

[Blurb on page 2]

Wẹnlatọ lẹ dona nọ yí zinzin zan nado yọnẹn eyin mẹde tindo ojlo kavi lala