Mọaleyi sọn Pipli Sinsẹ̀nzọn Kunnudegbe Tọn Towe Mẹ
1. Ale he mí nọ duvivi etọn to tito Oplọn Agunwe tọn mẹ tẹlẹ wẹ gbẹ́ sọ tin-to-aimẹ to pipli sinsẹ̀nzọn kunnudegbe tọn mẹ?
1 Be adà Oplọn Agunwe tọn he a yiwanna taun delẹ gbẹ́ nọ jlo we ya? Oplọn Agunwe lẹ nọ saba yin pipli kleunkleun lẹ ehe nọ zọ́n bọ mẹlẹpo nọ voawu. Mí nọ jihọntọn he sọgan hẹn mí lodo to gbigbọ-liho lẹ po awubibọ po. (Howh. 18:24) Nugopọntọ oplọn agunwe tọn nọ mọnukunnujẹ ninọmẹ mítọn lẹ mẹ kitokito bọ nọ na mí tuli. (Howh. 27:23; 1 Pita 5:2, 3) Mí sọgan gbẹ́ duvivi ale mọnkọtọn lẹ tọn to pipli sinsẹ̀nzọn kunnudegbe tọn mítọn mẹ.
2. Nawẹ mí sọgan ze afọdide tintan nado jihọntọn he sọgan hẹn mí lodo to gbigbọ-liho to pipli sinsẹ̀nzọn kunnudegbe tọn mítọn mẹ gbọn?
2 Ze Afọdide Tintan Lọ: Pipli sinsẹ̀nzọn kunnudegbe tọn lẹ nọ saba yin pipli kleunkleun lẹ taidi pipli oplọn agunwe tọn lẹ. Mí nọ jihọntọn hẹ mẹdevo lẹ dile mí to azọ́nwa “to kọndopọ mẹ” hẹ yé to lizọnyizọn lọ mẹ. (Flp. 1:27) Omẹ nẹmu to pipli towe mẹ wẹ a ko wazọ́n dopọ hẹ? Be hiẹ sọgan “hùndonuvo” to adà ehe mẹ ya? (2 Kọl. 6:13) Humọ, mí sọgan nọ basi oylọna mẹdelẹ to pipli mítọn mẹ sọn ojlẹ de mẹ jẹ devo mẹ nado kọnawudopọ hẹ mí to sinsẹ̀n-bibasi whẹndo tọn mítọn whenu kavi nado dùnú dopọ. To agun delẹ mẹ, pipli kunnudegbe tọn lẹ nọ diọ yede nado wleawu núdùdù tọn na hodọtọ he wá sọn agun devo mẹ. To osẹ he mẹ yé yin azọ́ndena te mẹ, pipli lọ nọ pli dopọ nado dùnú bo na tuli ode awetọ eyin hodọtọ lọ ma tlẹ sọgan nọte nado dùnú.
3. Dotẹnmẹ hundote tẹlẹ wẹ mí tindo nado nọ mọ alọgọ gbigbọmẹ tọn yí to pipli sinsẹ̀nzọn kunnudegbe tọn mẹ?
3 Dile etlẹ yindọ whla awe poun wẹ agun lẹ nọ pli dopọ to osẹ dopo mẹ, ehe ma dohia dọ alọgọ gbigbọmẹ tọn he wẹnlatọ lẹ nọ mọyi na depò gba. Nugopọntọ pipli kunnudegbe tọn lẹ yin dide nado na tuli mẹdopodopo bo plọnazọ́n yé to lizọnyizọn lọ mẹ. Eyin nugopọntọ pipli kunnudegbe tọn towe ma ko basi tito nado wazọ́n hẹ we to lizọnyizọn lọ mẹ, naegbọn hiẹ ma na dọna ẹn nado wazọ́n hẹ ẹ? Humọ, nugopọntọ sinsẹ̀nzọn tọn nọ tindo mahẹ to lizọnyizọn lọ mẹ hẹ pipli voovo to sẹfifo dopo to sunmẹsunmẹ. To agun he mẹ pipli sinsẹ̀nzọn kunnudegbe tọn ma sù te lẹ, ewọ sọgan basi tito nado dla pipli dopodopo pọ́n whla awe to owhe dopo mẹ. Be hiẹ nọ basi tito nado tọ́n na lizọnyizọn lọ to whenue ewọ dla pipli mìtọn pọ́n ya?
4. (a) Aliho tẹ mẹ wẹ opli sinsẹ̀nzọn kunnudegbe tọn lẹ nọ yin bibasi te? (b) Naegbọn mí dona tindo ojlo dọ owhé mítọn ni yin yiyizan na opli sinsẹ̀nzọn kunnudegbe tọn?
4 E nọ saba yọ́n hugan dọ pipli dopodopo ni nọ pli to nọtẹn voovo lẹ to sẹfifo lẹ na sinsẹ̀nzọn kunnudegbe tọn. Eyin pipli kunnudegbe tọn lẹ tindo nọtẹn voovo he yé na nọ pli do to ojlẹ dopolọ mẹ, e sọgan bọawuna wẹnlatọ lẹ nado yì opli sinsẹ̀nzọn kunnudegbe tọn podọ aigba-denamẹ lọ ji. Wẹnlatọ lẹ sọgan yawu yin mimá bo dedo aigba-denamẹ lọ ji ma dọngbàn. E sọ nọ bọawuna nugopọntọ pipli kunnudegbe tọn nado na ayidonugo sọwhiwhe tọn mẹhe tin to pipli etọn mẹ lẹ. Etomọṣo, ninọmẹ delẹ sọgan zọ́n bọ e na yọ́n hugan dọ pipli awe kavi humọ ni pli dopọ. Eyin agun lọ pete pli dopọ na sinsẹ̀nzọn kunnudegbe tọn to Sibigbe tintan osun lọ tọn kavi to Oplọn Atọ̀họ̀-Nuhihọ́ lọ Tọn godo, e nọ yọ́n hugan dọ pipli dopodopo ni sinai dopọ podọ nukunwhiwhe vude ni yin nina nugopọntọ pipli tọn lẹ nado má mẹhe tin to pipli yetọn mẹ lẹ whẹpo opli sinsẹ̀nzọn kunnudegbe tọn nido yin tadona po odẹ̀ po.—Pọ́n apotin lọ “Be Hiẹ Sọgan Dike Owhé Towe Ni Yin Yiyizan Ya?”
5. Dile etlẹ yindọ tito Oplọn Agunwe tọn masọ tin ba, jide etẹ tọn wẹ mí sọgan tindo?
5 Dile etlẹ yindọ tito Oplọn Agunwe tọn masọ tin ba, Jehovah gbẹ́ zindonukọn nado nọ wleawu nuhe mí tindo nuhudo etọn nado sọgan wà ojlo etọn lẹpo na mí. (Heb. 13:20, 21) Na Jehovah nọ penukundo mí go wutu mí ma nọ gbọagba nudepope tọn. (Ps. 23:1) Dona susu lẹ wẹ mí nọ duvivi etọn to pipli sinsẹ̀nzọn kunnudegbe mítọn mẹ. Eyin mí nọ ze afọdide tintan bo nọ “do susugege,” mí na “gbẹ̀n susugege.”—2 Kọl. 9:6.
[Apotin to weda 6]
Be Hiẹ Sọgan Dike Owhé Towe Ni Yin Yiyizan Ya?
To agun delẹ mẹ, pipli kunnudegbe tọn susu nọ pli dopọ to sẹfifo lẹ na owhé he gbè yé na nọ pli te lẹ ma tin wutu. Opli sinsẹ̀nzọn kunnudegbe tọn lẹ yin adà tito agun tọn de, enẹwutu lẹblanulọkẹyi de wẹ e yin dọ opli enẹlẹ ni nọ yin bibasi to owhé towe gbè. Be hiẹ sọgan dike owhé towe ni yin yiyizan ya? Ma kuwinyan na ninọmẹ owhé towe tọn ma yọ́n sọmọ wutu blo. Mẹho lẹ na lẹnnupọndo fie owhé towe tin te ji gọna onú devo lẹ taidi dehe ji yé ko nọ lẹnnupọndo eyin yé to nọtẹn lẹ de na oplọn agunwe. Eyin e jlo we dọ owhé towe ni yin yiyizan, hẹn ẹn zun yinyọnẹn na nugopọntọ pipli towe tọn.