Aliho Atọ́n Delẹ Nado Tindo Plọnmẹ Biblu De
1. Eyin e nọ vẹawuna mí nado mọ plọnmẹ Biblu de to aigba-denamẹ mítọn ji, etẹwẹ mí ma dona wà, podọ etẹwutu?
1 Be hiẹ mọdọ e nọ vẹawu nado mọ mẹhe hiẹ na plọn Biblu hẹ de wẹ ya? Eyin mọ wẹ, ma gbọjọ blo. Jehovah nọ dona mẹhe ma nọ gbọjọ to ojlo etọn wiwà mẹ lẹ. (Gal. 6:9) Ayinamẹ atọ́n he bọdego ehelẹ sọgan gọalọna we.
2. Nawẹ mí sọgan ze plọnmẹ Biblu donukọnnamẹ tlọlọ gbọn?
2 Ze Plọnmẹ Biblu Donukọnnamẹ Tlọlọ: Mẹsusu yọnẹn dọ mí nọ ze Atọ̀họ̀-Nuhihọ́ lọ Tọn po Réveillez-vous po donukọnnamẹ, ṣigba yé sọgan nọma yọnẹn dọ mí sọ nọ plọn Biblu hẹ mẹ ga. Naegbọn hiẹ ma na tẹnpọn nado ze plọnmẹ Biblu donukọnnamẹ tlọlọ to lizọnyizọn whédegbè jẹ whédegbè tọn mẹ? Mí sọ sọgan kanse jlodotọ he mí nọ dlapọn lẹ eyin yé jlo dọ mí ni nọ wá plọn Biblu hẹ yé. Eyin yé ma jlo, mí sọgan gbẹ́ nọ hẹn owe lẹ yì na yé bo gọalọna yé nado tindo ojlo to Biblu pinplọn mẹ. Na owhe susu, mẹmẹsunnu de basi dlapọn na asu po asi po de he nọ saba yí linlinnamẹwe lẹ. To gbèdopo he e ko yí linlinnamẹwe agọe tọn lẹ na yé bo jlo na dedo, mẹmẹsunnu lọ wá kanse yé dọ: “Be e na jlo mì dọ mí ni nọ plọn Biblu dopọ ya?” E ma lẹndọ yé na yigbe, ṣigba yé wàmọ. Yé ko yí baptẹm todin.
3. Etẹwutu mí ma dona lẹndọ jlodotọ lẹpo he nọ wá opli lẹ wẹ wẹnlatọ de ko to Biblu plọn hẹ?
3 Jlodotọ He Nọ Wá Opli Lẹ: Ma lẹndọ jlodotọ lẹpo he nọ wá opli agun tọn lẹ wẹ wẹnlatọ de ko to Biblu plọn hẹ blo. Mẹmẹsunnu de na linlin dọmọ: “N’bẹ suhugan plọnmẹ Biblu he n’tindo lẹ tọn jẹeji gbọn hodidọ dopọ hẹ jlodotọ he nọ wá opli lẹ dali.” Mẹmẹyọnnu de basi dide nado dọnsẹpọ nawe de he nọ kuwinyan; viyọnnu etọn lẹ ko yí baptẹm bosọ tin to agun lọ mẹ. Nawe lọ ko to opli wá na nudi owhe fọtọ̀n bo nọ biọ Plitẹnhọ Ahọluduta tọn mẹ to whenue opli bẹ tlolo bosọ nọ dedo owhé tlolo to opli godo. Nawe lọ yigbe nado plọn Biblu bo wá kẹalọyi nugbo to nukọn mẹ. Mẹmẹyọnnu lọ wlan dọmọ: “E vẹna mi taun dọ n’nọte na owhe 15 whẹpo do kanbiọ ẹ eyin e na jlo nado plọn Biblu.”
4. Nawẹ mí sọgan mọ plọnmẹ Biblu de to aliho mayin tlọlọ delẹ mẹ gbọn?
4 Aliho Mayin Tlọlọ Delẹ: Mẹmẹyọnnu de nọ saba hodo wẹnlatọ devo lẹ yì plọnmẹ Biblu yetọn lẹ. E nọ biọgbè mẹplọntọ lọ bọ to oplọn lọ godo, e nọ kanse nuplọntọ lọ eyin e yọ́n mẹdevo depope he na jlo nado plọn Biblu. To whenue hiẹ to owe lọ Biblu Plọn Mí zedonukọnna mẹhe a nọ basi dlapọn na de, hiẹ sọgan kanse e dọ: “Be mì yọ́n mẹdevo he jlo nado tindo vọkan owe ehe tọn dopo ya?” To whedelẹnu, ninọmẹ lẹ ma nọ hẹn yọnbasi na wẹnlatọ po gbehosọnalitọ lẹ po nado deanana plọnmẹ Biblu mẹhe do ojlo hia to aigba-denamẹ lọ ji lẹpo tọn. Enẹwutu, dike wẹnlatọ devo lẹ ni yọnẹn dọ alọnu towe vò nado deanana plọnmẹ Biblu de.
5. Naegbọn mí sọgan kanse alọwlemẹ mayisenọ de he asu kavi asi etọn yin Klistiani eyin e na jlo nado plọn Biblu?
5 Alọwlemẹ Mayisenọ Lẹ: Be wẹnlatọ delẹ tin to agun towe mẹ he alọwlemẹ yetọn yin mayisenọ ya? Alọwlemẹ mayisenọ delẹ ma nọ jlo paali nado dọhodo Biblu ji hẹ alọwlemẹ yetọn he yin Klistiani, ṣigba yé sọgan kẹalọyi dọ wẹnlatọ devo ni plọn Biblu hẹ yé. E nọ saba yọ́n hugan nado dọhodopọ hẹ alọwlemẹ Klistiani lọ jẹnukọn nado yọ́n afọdide he na yọ́n hugan nado ze plọnmẹ Biblu donukọnna alọwlemẹ mayisenọ lọ.
6. Naegbọn e do yin nujọnu nado nọ hodẹ̀ to whenuena mí to tintẹnpọn nado tindo plọnmẹ Biblu de?
6 Odẹ̀: Ma nọ yí nukunpẹvi do pọ́n huhlọn he odẹ̀ tindo blo. (Jak. 5:16) Jehovah dopagbe nado dotoaina odẹ̀ mítọn lẹ eyin yé sọgbe hẹ ojlo etọn. (1 Joh. 5:14) Mẹmẹsunnu he alọnu etọn nọ ján taun de jẹ dẹ̀ho ji nado tindo plọnmẹ Biblu de. Asi etọn tlẹ nọ kanse ede eyin asu emitọn na tindo whenu nado deanana plọnmẹ Biblu de, titengbe eyin nuplọntọ lọ tindo nuhahun susu. Enẹwutu, to whenuena e to dẹ̀ho na Jehovah na asu etọn nido tindo plọnmẹ Biblu de, e nọ donù whẹho ehelẹ go. To nudi osẹ awe godo, yé mọ gblọndo na odẹ̀ yetọn; gbehosọnalitọ de mọ dawe de he jlo na plọn Biblu, podọ e ze oplọn lọ do alọmẹ na mẹmẹsunnu lọ. Asi etọn wlan dọmọ: “Na mẹdepope he sọgan lẹndọ e na vẹawuna emi nado deanana plọnmẹ Biblu de, ayinamẹ he n’jlo na na die: Mì nọ zinnudo whẹho tangan ehe ji to odẹ̀ mìtọn lẹ mẹ bo ma doalọtena dẹ̀hiho gandego blo. Ayajẹ he mí tindo zẹ̀ todido mítọn lẹpo go.” Eyin hiẹ ma gbọjọ to vivẹnudido towe lẹ mẹ, hiẹ lọsu sọgan tindo plọnmẹ Biblu de, bo duvivi ayajẹ he nọ wá sọn alọgigọna mẹdevo lẹ nado hodo “aliho lọ he nọ planmẹ yì ogbẹ̀ mẹ” tọn.—Mat. 7:13, 14.