Jẹ Dogbó lọ Kọ̀n—Duto Numọtolanmẹ Nugomape Tọn Ji — WESẸDOTẸN INTẸNẸT JI TỌN Watchtower Tọn

Jẹ Dogbó lọ Kọ̀n—Duto Numọtolanmẹ Nugomape Tọn Ji

1. Naegbọn mẹdelẹ nọ whleawu nado ze plọnmẹ Biblu donukọnnamẹ?

¹ Be hiẹ nọ whleawu nado ze plọnmẹ Biblu donukọnnamẹ, na a nọ mọdọ emi ma na penugo nado deanana plọnmẹ Biblu de po kọdetọn dagbe po wẹ ya? To ojlẹ de mẹ, devizọnwatọ nugbonọ hohowhenu tọn delẹ taidi Mose po Jelemia po mọdọ emi ma pegan nado hẹn azọ́ndenamẹ yetọn lẹ di. (Eks. 3:10, 11; 4:10; Jel. 1:4-6) Ehe dohia dọ numọtolanmẹ nugomape tọn ma yin onú yọyọ. Nawẹ hiẹ sọgan dudeji gbọn?

2. Naegbọn mí ma dona lẹndọ azọ́n anadidena plọnmẹ Biblu tọn yin dogbó de he kọ̀n mí ma sọgan jẹ?

² Mí dona flindọ Jehovah ma nọ biọ dọ mí ni wà nuhe zẹ̀ nugopipe mítọn lẹ go gbede. (Ps. 103:14) Enẹwutu, azọ́ndenamẹ mítọn nado hẹn gbẹtọ lẹ “zun devi” bo “plọn yé” ma yin azọ́n de he glo mí. (Mat. 28:19, 20) E ma yin mẹhe tindo numimọ kavi azọ́nyinyọnẹn hugan to ṣẹnṣẹn mítọn lẹ kẹdẹ wẹ Jehovah ze lẹblanulọkẹyi enẹ do alọmẹ na gba. (1 Kọl. 1:26, 27) Enẹwutu, mí ma dona tindo pekọ to azọ́n họndekọn-jẹ-họndekọn tọn kẹdẹ mẹ bo lẹndọ azọ́n anadidena plọnmẹ Biblu tọn yin dogbó de he kọ̀n mí ma sọgan jẹ.

3. Nawẹ Jehovah ko hẹn mí pegan nado deanana plọnmẹ Biblu lẹ gbọn?

³ Jehovah Nọ Hẹn Mí Pegan: Jehovah wẹ nọ hẹn mí pegan na azọ́n mẹhẹnzun devi tọn lọ. (2 Kọl. 3:5) Gbọn titobasinanu etọn gblamẹ, e ko plọn mí nugbo Biblu tọn lẹ, ehe mẹhe tlẹ yin wesetọ daho aihọn tọn lẹ ma yọnẹn. (1 Kọl. 2:7, 8) E sọ hẹn kandai aliho mẹpinplọn tọn he Jesu, Mẹplọntọ Daho lọ yizan lẹ tọn tin-to-aimẹ, na mí nido hodo apajlẹ etọn, podọ e nọ to azọ́nplọn mí zọnmii to agun mẹ. Gbọnvona enẹ, Jehovah ma jo mí do asigbá-alọgbá. E ko wleawuna azọ́nwanu voovo lẹ taidi owe lọ Biblu Plọn Mí, he nọ do nugbo Biblu tọn lẹ hia debọdo-dego podọ to aliho he bọawu nado mọnukunnujẹemẹ de mẹ. Enẹwutu, nado deanana plọnmẹ Biblu de sọgan bọawu hugan nuhe a lẹn.

4. Naegbọn mí sọgan deji dọ Jehovah na gọalọna mí?

⁴ Jehovah wẹ gọalọna Mose po Jelemia po bọ yé penugo nado hẹn azọ́ndenamẹ yetọn lẹ di. (Eks. 4:11, 12; Jel. 1:7, 8) Mílọsu sọgan nọ biọ Jehovah dọ ni gọalọna mí. To popolẹpo mẹ, nugbo he gando Jehovah go lẹ wẹ mí nọ plọn gbẹtọ lẹ to whenue mí to anadena plọnmẹ Biblu de, ehe nọ hẹn homẹ Jiwheyẹwhe tọn hùn. (1 Joh. 3:22) Enẹwutu, hẹn ẹn zun yanwle towe nado nọ deanana plọnmẹ Biblu lẹ, yèdọ adà lizọnyizọn lọ tọn de he nọ hẹn ayajẹ po dona daho po wá na mí.