Gọalọna Mẹdevo lẹ Nado Setonuna Nuhe Biblu Plọn Mí
“Ehe to aigba dagbe ji lẹ wẹ yé, he yí ayiha nugbo po dagbe po do sè ohó lọ, bo yí i hẹn, bosọ yí homẹmimiọn do hẹn sinsẹ́n jẹgbonu wá.”—LUKU 8:15.
1, 2. (a) Lẹndai tẹ wutu wẹ owe Etẹwẹ Biblu Plọn Mí Taun? yin awuwlena? (b) To owhe agọe tọn lẹ mẹ, nawẹ Jehovah ko dona vivẹnudido omẹ etọn lẹ tọn nado hẹn gbẹtọ lẹ zun devi gbọn?
“OWE lọ yọ́n taun. Nuplọntọ ṣie lẹ yiwanna ẹn. Yẹn lọsu yiwanna ẹn. Owe ehe nọ hẹn ẹn yọnbasi nado bẹ plọnmẹ Biblu jẹeji hẹ gbẹtọ lẹ to ohọ̀n yetọn nukọn,” wẹ gbehosọnalitọ whepoponu tọn de dọ gando owe Etẹwẹ Biblu Plọn Mí Taun? a go. Gando owe dopolọ go, wẹnlatọ Ahọluduta tọn mẹhomẹ de dọmọ: “Yẹn ko tindo lẹblanulọkẹyi lọ nado gọalọna mẹsusu nado yọ́n Jehovah to owhe 50 he yẹn ko yizan to lizọnyizọn lọ mẹ lẹ whenu. Ṣigba nado dọ hójọhó, nuplọnmẹwe ehe gbọnvo taun. Apajlẹ po yẹdide etọn he whànmẹ lẹ po fọnjlodotenamẹ.” Be numọtolanmẹ dopolọ wẹ hiẹ tindo gando owe Biblu Plọn Mí lọ go ya? Owe Biblu pinplọn tọn ehe yin awuwlena nado gọalọna we nado hẹn gbedide Jesu tọn di dọmọ: “Enẹwutu mì yì, bo hẹn akọta lẹpo zun nuplọntọ, . . . na mì nisọ nọ plọn yé nado nọ doayi onú lẹpo go, nudepope he yẹn degbena mì.”—Matiu 28:19, 20.
2 Matin ayihaawe, homẹ Jehovah tọn nọ hùn dile nudi livi 6,6 Kunnudetọ etọn lẹ tọn desọn ojlo mẹ bo to tonusena anademẹ Jesu tọn nado hẹn gbẹtọ lẹ zun devi. (Howhinwhẹn lẹ 27:11) E họnwun dọ Jehovah to didona vivẹnudido yetọn lẹ. Di apajlẹ, to 2005, wẹndagbe lọ yin lilá to aigba 235 ji bọ madozẹnzẹn plọnmẹ Biblu he hugan 6 061 500 tọn yin anadena. Taidi kọdetọn de, mẹsusu ‘sè ohó Jiwheyẹwhe tọn bo kẹalọyi i, e ma yin di ohó gbẹtọ tọn gba, ṣigba le e te to nugbo mẹ, di ohó Jiwheyẹwhe tọn.’ (1 Tẹsalonikanu lẹ 2:13) To owhe awe he wayi lẹ gblamẹ, hugan devi yọyọ 500 000 wẹ hẹn gbẹzan yetọn sọgbe hẹ nujinọtedo Jehovah tọn lẹ bo klan yede do wiwe na Jiwheyẹwhe.
3. Kanbiọ he gando lehe owe Biblu Plọn Mí lọ na yin yiyizan do go tẹlẹ wẹ mí na gbadopọnna to hosọ ehe mẹ?
3 Be hiẹ ko tindo numimọ ayajẹ he anadidena plọnmẹ Biblu de nọ hẹnwa tọn to agọe ya? Mẹhe tindo ‘ahun nugbo po dagbe po’ lẹ gbẹ́ tin lẹdo aihọn pé he na yí ohó Jiwheyẹwhe tọn hẹn to whenuena yé sè e tlolo bo nasọ “yí homẹmimiọn do hẹn sinsẹ́n jẹgbonu wá.” (Luku 8:11-15) Mì gbọ mí ni gbadopọnna lehe mí sọgan yí owe Biblu Plọn Mí lọ zan to azọ́n gbẹtọ lẹ hinhẹnzun devi tọn mẹ do. Mí na gbadopọnna kanbiọ atọ̀n: (1) Nawẹ hiẹ sọgan bẹ plọnmẹ Biblu de jẹeji gbọn? (2) Aliho mẹpinplọn tọn tẹlẹ wẹ nọ tindo kọdetọn dagbe hugan? (3) Nawẹ hiẹ sọgan gọalọna mẹde nado lẹzun nuplọntọ podọ mẹplọntọ Ohó Jiwheyẹwhe tọn tọn gbọn?
Lehe Hiẹ Sọgan Bẹ Plọnmẹ Biblu de Jẹeji Do
4. Naegbọn mẹdelẹ sọgan whleawu nado plọn Biblu, podọ nawẹ hiẹ sọgan gọalọna yé nado duto awuwhiwhle yetọn ji gbọn?
4 Eyin mẹde biọ to asi we nado lọ́n dasá otọ̀ gbigblo de, hiẹ sọgan whleawu nado wàmọ. Ṣigba eyin zannu lẹ yin titò do otọ̀ lọ mẹ, vlavo hiẹ na jlo nado tẹ́n nuhe mẹlọ dọ pọ́n. Mọdopolọ, mẹhe alọnu etọn ján de sọgan whleawu nado plọn Biblu. Whétọ lọ sọgan lẹndọ oplọn lọ na biọ vivẹnudido susu bo nasọ dù whenu zẹjlẹgo. Nawẹ hiẹ sọgan gọalọna ẹn nado duto awuwhiwhle etọn ji gbọn? Gbọn hodọdopọ he nọ̀ glido bo bẹ nudọnamẹ dagbe lẹ hẹn tintindo hẹ mẹlọ sọn ojlẹ de jẹ devo mẹ dali, hiẹ sọgan yí owe Biblu Plọn Mí lọ zan nado gọalọna ẹn nado jẹ Ohó Jiwheyẹwhe tọn plọn ji to gbesisọ mẹ. Eyin a wleawu ganji, gọyìpọn dopodopo he a to bibasi na mẹlọ na taidi zannu he ji e na gbọ̀n nado jihọntọn hẹ Jehovah.
5. Naegbọn hiẹ dona hia owe Biblu Plọn Mí lọ?
5 Ṣigba, whẹpo hiẹ na penugo nado gọalọna mẹdevo nado mọaleyi sọn owe Biblu Plọn Mí mẹ, hiẹ dona jẹakọ hẹ owe lọ ganji. Be hiẹ ko hia owe lọ sọn bẹjẹeji jẹ vivọnu ya? Asu po asi po de hẹn owe lọ sọyi gbọjẹ bo jẹ hihia ẹ ji dile yé to jẹhọn yí to huta. Whenuena yọnnu he to nusà na jonọ saditọ lẹ de dọnsẹpọ yé, e doayi hosọ lọ Etẹwẹ Biblu Plọn Mí Taun? go. E dọna asu po asi po lọ dọ emi ko kàn nudopolọ pẹpẹ sè Jiwheyẹwhe to odẹ̀ mẹ to ganhiho vude die wayi bo to bibiọ ẹ nado na emi gblọndo. Yé yí ayajẹ do na ẹn vọkan owe lọ tọn dopo. Be hiẹ ko “fli ojlẹ” nado hia zinjẹgbonu ehe, vlavo whlaawetọ, to gbọjẹwhenu to azọ́nmẹ kavi to wehọmẹ, kavi dile a to tenọpọn mẹde ya? (Efesunu lẹ 5:15, 16) Eyin hiẹ wàmọ, hiẹ na jẹakọ hẹ nuplọnmẹwe Biblu tọn ehe podọ mọwiwà sọgan sọ hùn dotẹnmẹ lẹ dote nado dọ nuhe e bẹhẹn na mẹdevo lẹ.
6, 7. Nawẹ hiẹ sọgan yí owe Biblu Plọn Mí lọ zan nado bẹ plọnmẹ Biblu lẹ jẹeji gbọn?
6 Whenuena hiẹ to owe lọ zedonukọnnamẹ to kunnudegbe, yí yẹdide, wefọ, po kanbiọ he tin to weda 4, 5, po 6 po mẹ lẹ zan ganji. Di apajlẹ, hiẹ sọgan bẹ hodọdopọ de jẹeji gbọn kinkanse dali dọmọ, “Po nuhahun he gbẹtọvi lẹ to pipehẹ to egbehe lẹpo po, fie wẹ mí sọgan mọ anademẹ he go mí sọgan ganjẹ lẹ te?” To todidoai po sọwhiwhe po na gblọndo mẹlọ tọn godo, hia 2 Timoti 3:16, 17 bo basi zẹẹmẹ dọ Biblu wleawuna pọngbọ nujọnu tọn de na nuhahun gbẹtọvi tọn lẹ. Enẹgodo, dọ̀n ayidonugo whétọ lọ tọn wá weda 4 po 5 po ji, bo kanse dọmọ: “To ninọmẹ he yin didohia to weda ehelẹ mẹ, detẹ wẹ nọ duahunmẹna we hugan?” To whenuena whétọ lọ dlẹnalọdo dopo godo, dike ewọ ni hẹn owe lọ dile hiẹ to wefọ he zọnpọ hẹ ninọmẹ lọ hia sọn Biblu towe mẹ. Enẹgodo, hia weda 6, bo kanse whétọ lọ dọ, “To kanbiọ ṣidopo he yin nùdego to odò weda ehe tọn lẹ mẹ, gblọndo detẹ tọn wẹ hiẹ na jlo nado yọnẹn?” To whenuena mẹlọ ko dọ dehe jlo e, do weta he na gblọndo kanbiọ lọ tọn hia ẹ, jo owe lọ do na ẹn bo basi tito dagbe lẹ nado dla ẹ pọ́n to whedevonu nado dọhodo kanbiọ enẹ ji.
7 Nuzedonukọnnamẹ he yin hodọdeji to aga ehe na yí nudi nukunwhiwhe atọ́n. Ṣigba, to nukunwhiwhe vude enẹlẹ mẹ, hiẹ na ko yọ́n nuhe to ahunmẹduna whétọ lọ, hiẹ na ko hia bo basi yizan wefọ awe tọn podọ dodonu gọyìpọn de tọn na ko yin zizedai. Vlavo ohó kleun he hiẹ dọ hẹ whétọ lọ wẹ na ẹn tuli bo miọnhomẹna ẹn hugan sọn ojlẹ dindẹn die. Taidi kọdetọn de, e yọnbasi dọ mẹhe alọnu etọn tlẹ ján de na tindo ojlo nado yí nukunwhiwhe vude dogọ zan hẹ we dile hiẹ to alọgọna ẹn nado doafọna ‘ali he hẹn omẹ yì ogbẹ̀ mẹ lọ.’ (Matiu 7:14) To nukọn mẹ, dile ojlo whétọ lọ tọn to susudeji, whenu susu dogọ na yin yiyizan hẹ ẹ to oplọn lọ whenu. Ehe sọgan yin wiwà gbọn bibiọ nado sinai bo plọnnu na ojlẹ tangan he dite de dali.
Aliho Mẹpinplọn Tọn He Nọ Tindo Kọdetọn Dagbe Hugan Lẹ
8, 9. (a) Nawẹ hiẹ sọgan wleawuna Biblu plọntọ towe nado duto aliglọnnamẹnu po whlepọn he e sọgan pehẹ lẹ po ji gbọn? (b) Fie wẹ azọ́nwanu he miyọ́n ma nọ dù lẹ he na yin yiyizan nado wleawuna yise dolido sọgan yin mimọ te?
8 Tlolo he mẹde jẹ tonusena nuhe Biblu plọn mí lẹ ji, e sọgan pehẹ whlepọn he na glọnalina nukọnyiyi etọn lẹ. Apọsteli Paulu dọmọ: “Yé he jlo na nọ̀ jijọ-di-Jiwheyẹwhe tọn mẹ to Klisti Jesu mẹ lẹ, na nọ doakọnna homẹkẹn.” (2 Timoti 3:12) Paulu yí whlepọn ehelẹ jlẹdo miyọ́n he na fiọ azọ́nwanu họgbigbá tọn he ma họakuẹ lẹ ṣigba bo na jo azọ́nwanu he taidi sika, fataka, po zannu akuẹgegenu tọn lẹ po do go. (1 Kọlintinu lẹ 3:10-13; 1 Pita 1:6, 7) Nado gọalọna Biblu plọntọ towe nado wleawuna jẹhẹnu he na gọalọna ẹn nado nọavunte sọta whlepọn he e sọgan pehẹ lẹ, hiẹ dona gọalọna ẹn gbọn gbigbá ẹ po azọ́nwanu he miyọ́n ma nọ dù lẹ po dali.
9 Psalm-kàntọ lọ yí “ohó OKLUNỌ tọn” lẹ jlẹdo “fataka he yè kọ̀n sọn okọ́zo mẹ, he yè kọ̀n whla ṣinawe” go. (Psalm 12:6) Na nugbo tọn, Biblu bẹ azọ́nwanu họakuẹ he sọgan yin yiyizan lẹpo nado wleawuna yise dolido hẹn. (Psalm 19:7-11; Howhinwhẹn lẹ 2:1-6) Podọ owe Biblu Plọn Mí do lehe Owe-wiwe sọgan yin yiyizan po kọdetọn dagbe po do hia.
10. Nawẹ hiẹ sọgan dọ̀n ayidonugo nuplọntọ lọ tọn wá Biblu ji gbọn?
10 To oplọn lọ whenu, dọ̀n ayidonugo nuplọntọ lọ tọn wá wefọ he yin dide to weta dopodopo mẹ lẹ ji. Yí kanbiọ lẹ zan nado gọalọna nuplọntọ lọ nado mọnukunnujẹ wefọ Biblu tọn he bẹ nuagokun hẹn lẹ mẹ bo yí yé zan. Kakati nado dọ nuhe nuplọntọ lọ dona wà lẹ na ẹn, hodo apajlẹ Jesu tọn. To whenuena dawe he yọ́n Osẹ́n ganji de kanhose e, Jesu gblọn dọmọ: “Etẹwẹ yè wlan do osẹ́n mẹ? Nawẹ hiẹ hia do?” Dawe lọ na gblọndo sọn Owe-wiwe mẹ, podọ Jesu gọalọna ẹn nado mọ lehe e na yí nunọwhinnusẹ́n lọ zan na ede do. Gbọn apajlẹ de yiyizan dali, Jesu sọ gọalọna ẹn nado mọ lehe nuplọnmẹ lọ dona yinuwa do ewọ ji do. (Luku 10:25-37) Owe Biblu Plọn Mí lọ bẹ apajlẹ he bọawu susu hẹn ehe hiẹ sọgan yizan nado gọalọna nuplọntọ de nado yí nunọwhinnusẹ́n Owe-wiwe tọn lẹ zan na ede.
11. Hukan nẹmu wẹ hiẹ dona gbadopọnna to nupinplọn dopodopo whenu?
11 Kẹdẹdile Jesu yí hogbe he bọawu lẹ zan nado basi zẹẹmẹ nuplọnmẹ he gẹdẹ lẹ tọn do, owe lọ yí hogbe he bọawu, bo yì nuagokun ji tlọlọ lẹ zan nado basi zẹẹmẹ Ohó Jiwheyẹwhe tọn tọn. (Matiu 7:28, 29) Hodo apajlẹ etọn. Plọnnumẹ to aliho he bọawu bo họnwun bosọ sọgbe mẹ. Ma họ̀nwezun gbọ̀n nudọnamẹ lọ lẹ ji blo. Kakatimọ, dike hukan he mì na plọn to nupinplọn dopodopo whenu ni sinai do ninọmẹ po nugopipe nuplọntọ lọ tọn po ji. Jesu yọ́n nugopipe devi etọn lẹ tọn bo ma gbidikọna yé po nudọnamẹ susu po zẹ̀ nuhe yé tindo nuhudo etọn to ojlẹ lọ mẹ go.—Johanu 16:12.
12. Nawẹ nudọnamẹ dogọ lọ sọgan yin yiyizan gbọn?
12 Nudọnamẹ dogọ de tin to owe Biblu Plọn Mí lọ mẹ he bẹ hosọ voovo 14 hẹn. Sọgbe hẹ nuhudo nuplọntọ lọ tọn lẹ, hiẹ taidi mẹplọntọ etọn dona penugo nado yọ́n aliho dagbe hugan he mẹ nudọnamẹ ehe sọgan yin yiyizan te. Di apajlẹ, eyin e sinyẹnawuna nuplọntọ de nado mọnukunnujẹ hogo de mẹ kavi eyin e kàn kanbiọ sè do whẹho tangan delẹ ji na nuhe e yise dai lẹ wutu, hiẹ sọgan deanana ẹn hlan adà nudọnamẹ dogọ lọ tọn he sọgbe ji poun bo biọ to e si nado gbadopọnna hosọ lọ na ede. To alọ devo mẹ, nuhudo nuplọntọ lọ tọn sọgan biọ dọ mì ni gbadopọnna nudọnamẹ lọ dopọ. Nudọnamẹ dogọ lọ bẹ hosọ Owe-wiwe tọn titengbe lẹ hẹn, taidi “ ‘Alindọn’ po ‘Gbigbọ’ po—Etẹwẹ Hogbe Ehelẹ Zẹẹmẹdo Taun?” po “ ‘Babilọni Daho’ lọ Yinyọnẹn” po. Vlavo hiẹ sọgan de nado dọhodo hosọ ehelẹ ji hẹ nuplọntọ towe. To whenuena e yindọ kanbiọ lẹ ma yin awuwlena na hosọ he yin hodọdeji to nudọnamẹ dogọ lọ mẹ lẹ, hiẹ dona jẹakọ hẹ yé nado sọgan wleawuna kanbiọ he sọgbe lẹ.
13. Nawẹ odẹ̀ nọ gọalọ nado hẹn yise lodo gbọn?
13 “Adavo OKLUNỌ do ohọ̀ lọ, yé he to dido e lẹ to tuklajẹ yaya,” wẹ Psalm 127:1 dọ. Enẹwutu, dile hiẹ to awuwle nado deanana plọnmẹ Biblu de, biọ alọgọ Jehovah tọn to odẹ̀ mẹ. Dike odẹ̀ towe lẹ to bẹjẹeji po vivọnu nupinplọn lọ tọn po ni do haṣinṣan pẹkipẹki he a tindo hẹ Jehovah hia. Na tuli nuplọntọ lọ nado nọ hodẹ̀ hlan Jehovah bo biọ nuyọnẹn nado mọnukunnujẹ Ohó Etọn mẹ po huhlọn lọ po nado yí ayinamẹ etọn zan. (Jakobu 1:5) Eyin nuplọntọ lọ wàmọ, ewọ na yin hinhẹn lodo nado doakọnna whlepọn lẹ bo nasọ zindonukọn nado yin huhlọnnọ to yise mẹ.
Gọalọna Biblu Plọntọ lẹ Nado Lẹzun Mẹplọntọ
14. Nukọnyiyi tẹwẹ Biblu plọntọ lẹ dona tindo?
14 Eyin Biblu plọntọ mítọn lẹ na penugo nado setonuna “onú lẹpo” he Jesu degbena devi etọn lẹ, yé dona yinukọn bo lẹzun mẹplọntọ Ohó Jiwheyẹwhe tọn lẹ tọn kakati nado gbọṣi nuplọntọ-yinyin mẹ. (Matiu 28:19, 20; Owalọ lẹ 1:6-8) Etẹwẹ hiẹ sọgan wà nado gọalọna nuplọntọ de nado yinukọn to gbigbọ-liho jẹ obá enẹ mẹ?
15. Naegbọn hiẹ dona na tuli Biblu plọntọ towe nado yì opli Klistiani tọn lẹ?
15 Sọn bẹjẹeji nupinplọn lọ tọn tlolo, basi oylọna nuplọntọ lọ nado hodo we yì opli agun tọn lẹ. Basi zẹẹmẹ na ẹn dọ opli lẹ ji wẹ hiẹ nọ mọ nuplọnmẹ yí te taidi mẹplọntọ Ohó Jiwheyẹwhe tọn. Na osẹ susu, yí nukunwhiwhe vude zan to vivọnu nupinplọn dopodopo tọn nado basi zẹẹmẹ tito-to-whinnu nuplọnmẹ gbigbọmẹ tọn he hiẹ nọ mọyi to opli po plidopọ voovo lẹ po ji tọn. Dọho po ayajẹ po gando ale he hiẹ nọ mọyi to nuwiwa ehelẹ tẹnmẹ go. (Heblu lẹ 10:24, 25) Eyin nuplọntọ lọ jẹ opli lẹ yì ji to gbesisọ mẹ, e yọnbasi dọ ewọ na lẹzun mẹplọntọ Ohó Jiwheyẹwhe tọn tọn.
16, 17. Yanwle tẹlẹ wẹ Biblu plọntọ de sọgan zedai bo jẹ e kọ̀n?
16 Gọalọna nuplọntọ lọ nado ze yanwle lẹnpọn dagbe tọn lẹ dai. Di apajlẹ, na ẹn tuli nado dọ nuhe plọn e te lẹ na họntọn de kavi hẹnnumẹ de. Humọ, na ẹn ayinamẹ nado ze yanwle lọ dai nado hia Biblu lọ blebu. Eyin hiẹ gọalọna ẹn nado ze tito-to-whinnu Biblu hihia gbesisọ tọn de dai bo tẹdego, aṣa ehe na hẹn ale wá na ẹn etlẹ yin ojlẹ dindẹn to baptẹm etọn godo. To yidogọ mẹ, naegbọn hiẹ ma na dotuhomẹna ẹn nado yí i do basi yanwle nado nọ flin e whè gbau wefọ Biblu tọn dopo he na gblọndo kanbiọ tangan de tọn to weta owe Biblu Plọn Mí lọ tọn dopodopo mẹ? Gbọn mọwiwà dali, ewọ na lẹzun ‘azọ́nwatọ he ma nọ kuwinyan, ehe nọ yí ohó nugbo tọn zan dile e jẹ do.’—2 Timoti 2:15.
17 Kakati nado plọn nuplọntọ de nado nọ hia wefọ lẹ sọn tamẹ kavi nado nọ basi bladopọ nuhe yé dọ lẹ tọn poun, na ẹn tuli nado nọ basi zẹẹmẹ wefọ Biblu tọn he sọgbe lẹ tọn dile e to gbeyina mẹhe to dodinna nuyise etọn lẹ. Zepọn kleunkleun lẹ bibasi sọgan gọalọ. Hiẹ sọgan yinuwa taidi hẹnnumẹ kavi azọ́nwatọgbẹ́ de he kanhose e gando nuyise etọn lẹ go. To whenuena nuplọntọ lọ to gblọndo na, dohia ẹ lehe gblọndo nọ yin nina to “walọmimiọn po osi po” mẹ do.—1 Pita 3:15.
18. Eyin Biblu plọntọ de lẹzun wẹnlatọ he ma ko yí baptẹm, etẹwẹ hiẹ sọgan wà nado gọalọna ẹn yinukọn dogọ?
18 To nukọn mẹ, nuplọntọ lọ sọgan pegan nado jẹ mahẹ tindo ji to sinsẹ̀nzọn kunnudegbe tọn mẹ. Dohia ẹ dọ lẹblanulọkẹyi de wẹ e yin nado yin dotẹnmẹna nado doalọ to azọ́n ehe mẹ. (2 Kọlintinu lẹ 4:1, 7) Eyin mẹho lẹ wá tadona kọ̀n dọ nuplọntọ lọ pegan nado lẹzun wẹnlatọ he ma ko yí baptẹm, wleawuna nuzedonukọnnamẹ he bọawu de hẹ ẹ bo plan ẹn yì sinsẹ̀nzọn kunnudegbe tọn mẹ. Zindonukọn nado nọ wazọ́n hẹ ẹ to gbesisọ mẹ to adà lizọnyizọn gbangba tọn voovo lẹ mẹ bo plọn ẹn lehe e na wleawuna bosọ basi gọyìpọn kọdetọn dagbenọ lẹ do. Apajlẹ dagbe towe na yinuwa do nuplọntọ lọ ji.—Luku 6:40.
“Whlẹn Dewe, po Yé He to Ohó Towe Sè lẹ Po”
19, 20. Yanwle tẹwẹ mí dona zedonukọnna míde, podọ etẹwutu?
19 Matin ayihaawe, e nọ biọ vivẹnudido susu nado gọalọna mẹde nado wá “oyọnẹn nugbo tọn” kọ̀n. (1 Timoti 2:4) Etomọṣo, nususu ma nọ namẹ ayajẹ to gbẹ̀mẹ sọ alọgigọna mẹde nado setonuna nuhe Biblu plọn mí. (1 Tẹsalonikanu lẹ 2:19, 20) Na nugbo tọn, lẹblanulọkẹyi nankọtọn die nado yin “azọ́nyiwahẹmẹtọ dopọ hẹ Jiwheyẹwhe” to azọ́n mẹpinplọn tọn he to yinyin wiwà lẹdo aihọn pé ehe mẹ!—1 Kọlintinu lẹ 3:9.
20 Gbọn Jesu Klisti po angẹli huhlọnnọ lẹ po gblamẹ, Jehovah na hẹn whẹdida ṣẹ to madẹnmẹ do mẹhe “ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ.” (2 Tẹsalonikanu lẹ 1:6-8) Ogbẹ̀ gbẹtọ lẹ tọn tin to owù mẹ. Be hiẹ sọgan yí i do basi yanwle towe nado nọ deanana e whè gbau plọnmẹ Biblu dopo to owe Etẹwẹ Biblu Plọn Mí Taun? mẹ ya? Dile hiẹ to mahẹ tindo to azọ́n ehe mẹ, hiẹ tindo dotẹnmẹ hundote lọ nado “whlẹn dewe, po yé he to ohó towe sè lẹ po.” (1 Timoti 4:16) Whẹho niyaniya tọn de wẹ e yin todin hugan gbede pọ́n tọn nado gọalọna mẹdevo lẹ nado setonuna nuhe Biblu plọn mí.
[Nudọnamẹ Odò Tọn]
a He Kunnudetọ Jehovah tọn lẹ zinjẹgbonu.
Etẹwẹ Hiẹ Plọn?
• Lẹndai tẹ wutu wẹ owe Biblu Plọn Mí lọ yin awuwlena?
• Nawẹ hiẹ sọgan bẹ plọnmẹ Biblu lẹ jẹeji po owe Biblu Plọn Mí lọ po gbọn?
• Aliho mẹpinplọn tọn tẹlẹ wẹ nọ tindo kọdetọn dagbe hugan?
• Nawẹ hiẹ sọgan gọalọna nuplọntọ de nado lẹzun mẹplọntọ Ohó Jiwheyẹwhe tọn tọn gbọn?
[Yẹdide to weda 26]
Be hiẹ to owe ehe yizan ganji ya?
[Yẹdide to weda 27]
Hodọdopọ kleun de sọgan fọ́n ojlo mẹde tọn dote nado plọn Biblu
[Yẹdide to weda 29]
Etẹwẹ hiẹ sọgan wà nado dọ̀n ayidonugo nuplọntọ lọ tọn wá Biblu ji?
[Yẹdide to weda 30]
Gọalọna Biblu plọntọ lọ nado yinukọn