“Mì Tindo Owanyi Na Pipli Mẹmẹsunnu lẹ Tọn Pete”

Ohó gbọdo he hosọ ehe bẹhẹn lẹ ko yin kinkandai sọn nudi owhe fọtọ́n awe die. (1 Pita 2:17) Ṣigba to egbehe, mí dona yí yé do yizan mẹ hugan gbede pọ́n. Nawẹ mí sọgan tindo owanyi na plipli mẹmẹsunnu he tin lẹdo aihọn pé lẹ tọn gbọn? Podọ, to aihọn he mẹ owanyi ma tin te ehe, nawẹ mí sọgan wagbọn bọ owanyi mítọn ma nado miọn gbede? (Mat. 24:12) Dile a to video lọ Toute la communauté de nos frères pọ́n, dín gblọndo na kanbiọ he bọdego ehelẹ.

(1) Whetẹnu na taun tọn wẹ mí lẹzun apadewhe pipli mẹmẹsunnu lẹ tọn? (2) Azọ́n atọ̀n tẹlẹ mẹ wẹ mí to mahẹ tindo te to pọmẹ hẹ mẹmẹsunnu mítọn lẹ lẹdo aihọn pé? (3) Nawẹ mẹmẹsunnu mítọn lẹ to gbemima yetọn nado dọyẹwheho dohia gbọn (a) to zungbo Alaska tọn mẹ, (b) to bato-glintẹn daho Europe tọn lẹ, podọ (c) to ozun daho Pérou tọn lẹ mẹ? (4) Etẹwutu mí ma dona lẹn gbede dọ azọ́n paa de poun wẹ wẹndagbe lọ lilá yin? (5) Na apajlẹ lehe Kunnudetọ Jehovah tọn lẹ ko miọnhomẹna ode awetọ bosọ nọgodona yede do tọn (a) to aigba sisọsisọ de godo, (b) to jẹhọn-ahizi de godo, podọ (c) to tòwhan lẹ whenu. (6) Aliho dagbe tẹlẹ mẹ wẹ mímẹpo sọgan do ohia mẹmẹsunnu-yinyin tọn mítọn hia te? (Joh. 13:35) (7) Ale tẹlẹ wẹ azọ́nwiwa dopọ hẹ mẹmẹsunnu mítọn lẹ nado gbá Plitẹnhọ Ahọluduta tọn mítọn lẹ nọ hẹnwa? (8) Nawẹ mẹmẹsunnu Whèzẹtẹn-waji Europe tọn po Russie po tọn lẹ luntọ́n to gbigbọ-liho to whenue yé tin to alọhẹndotenamẹ glọ gbọn? (9) Vivẹnu vonọtaun tẹwẹ Kunnudetọ susu nọ do nado yì plidopọ lẹ, podọ etẹwutu? (10) Nawẹ video ehe ko hẹn gbemima towe sinyẹn deji gbọn na nuhe dù (a) sinsẹ̀n bibasi hlan Jehovah to opli Klistiani tọn lẹ ji to pọmẹ hẹ mẹmẹsunnu towe lẹ, (b) alọgigọna mẹdevo lẹ to whenue yé tin to nuhudo mẹ, podọ (c) yẹwhehodidọ po nugbonọ-yinyin po to filẹpo podọ to aliho lẹpo mẹ? (11) Nawẹ mí sọgan yí video ehe zan to lizọnyizọn lọ mẹ gbọn, podọ to whetẹnu?

Owanyi mítọn na Jehovah wẹ yin whẹwhinwhẹ́n titengbe he wutu mí yin apadewhe pipli mẹmẹsunnu lẹ tọn. Enẹwutu, mí nọ yiwanna nado plọnnu dogbọn ewọ dali podọ nado plọnnu mẹdevo lẹ gando ewọ go. Mọdopolọ, mí nọ yiwanna mẹhe Jehovah yiwanna lẹ. To whenue mí gọalọna yé to ojlẹ nuhudo tọn lẹ mẹ, mí ma nọ donukun dọ Jiwheyẹwhe ni suahọ etọn mí. Kakatimọ, mí nọ dopẹna Jiwheyẹwhe, na mí nọ pọ́n pipli mẹmẹsunnu lẹ tọn hlan taidi nunina họakuẹ de sọn ewọ dè. Dile opodo aihọn he mẹ owanyi ma tin te ehe tọn to sisẹpọ, mì gbọ mí ni zindonukọn nado nọ do owanyi hia pipli mẹmẹsunnu lẹ tọn pete.