Gọalọna Yé!

1. Nujijọ tẹwẹ nọ hùn dotẹnmẹ dagbe de dote na mí nado dekunnu, podọ etẹwutu?

¹ Nujijọ depope ma nọ hùn dotẹnmẹ dagbe dote na mí nado dekunnu sọ hùnwhẹ Oflin tọn he nọ yin bibasi to whemẹwhemẹ. To owhe ehe mẹ, jonọ livi ao linlán wẹ mí to nukundo nado wá Oflin lọ bo sèhó gando dohia owanyi tọn daho hugan awe he mí mọyi gbọn ofligọ lọ dali lẹ go. (Joh. 3:16; 15:13) Yé na plọnnu gando dona he nunina Jehovah tọn enẹ hẹn tin-to-aimẹ na yé lẹ go. (Isa. 65:21-23) Ṣigba, e ma yin hodọtọ lọ kẹdẹ wẹ na na kunnudide de to nujijọ enẹ whenu gba. Wẹnlatọ he wá Oflin lọ lẹpo na tindo dotẹnmẹ hundote lọ ga nado na kunnudide ayidego tọn de gbọn alọgigọna jonọ lẹ sọn ojlo mẹ wá dali.—Lom. 15:7.

2. Nawẹ mí sọgan gọalọna jonọ lẹ gbọn?

² Kakati nado sinai whii bo to tenọpọn bẹjẹeji tito-to-whinnu lọ tọn, be e ma na yọ́n hugan dọ hiẹ ni dọnsẹpọ jonọ he sinai to apá towe lẹ bo do dewe hia yé ya? Jonọ lọ lẹ sọgan to winyan kú bo na to kinkanse yede lehe nulẹ na yì do. Na nugbo tọn, nukiko yẹsẹ po nudọdomẹ zohunhun tọn mítọn po na zọ́n bọ yé na mọdọ emi yin alọkẹyi bo na voawu. Nado yọnẹn eyin jonọ de wá na ewọ mọ oylọ-basinamẹwe de yí wutu wẹ, hiẹ sọgan kanse e eyin whla tintan die he ewọ wá dopo to opli mítọn lẹ mẹ kavi eyin e yọ́n mẹde to agun lọ mẹ. Vlavo hiẹ sọgan basi oylọna ẹn nado wá sinai do apá towe podọ na mì nido zan Biblu po ohanwe towe po dopọ. Eyin Plitẹnhọ Ahọluduta tọn de wẹ yin yiyizan, hiẹ sọgan plan ẹn disa gbọn plitẹnhọ lọ mẹ to kleun mẹ. To Oflin lọ godo, dohia ẹ dọ homẹ emitọn na hùn nado na gblọndo na kanbiọ etọn lẹ. Eyin agun mìtọn dona yawu jotẹnna agun devo he na zan nọtẹn dopolọ, a sọgan dọmọ: “E na jlo mi nado yọ́n nuhe mì lẹn gando opli lọ go. Nawẹ n’sọgan mọ mì gbọn?” Enẹgodo, basi tito nado yì dla ẹ pọ́n to whedevonu. Mẹho lẹ na taun tọn na tin to aṣeji nado na tuli wẹnlatọ he ko gbọjọ bo ka wá Oflin lọ lẹ.

3. Naegbọn e do yin nujọnu dọ mí ni dovivẹnu nado gọalọna jonọ he na wá Oflin lọ lẹ?

³ Na jonọ susu lẹ, nujijọ ehe wẹ na yin whla tintan he yé duvivi ayajẹ, jijọho gọna pọninọ he omẹ Jehovah tọn lẹ nọ tindo to paladisi gbigbọmẹ tọn lọ mẹ tọn. (Ps. 29:11; Isa. 11:6-9; 65:13, 14) Etẹwẹ na yin numọtolanmẹ jonọ lẹ tọn to whenue yé na lẹkọyi whégbè? Numọtolanmẹ yetọn na sinai do nuhe mí wà nado gọalọna yé lẹ ji.