Plọnnu Ovi Towe lẹ Gando Jiwheyẹwhe Go—Aliho Mẹpinplọn Tọn Dagbe Hugan Lẹ
1. Azọngban tẹwẹ Jiwheyẹwhe dena mẹjitọ lẹ?
1 Gbọnvona dọ Biblu na ayinamẹ dejidego lẹ gando nuhe mẹjitọ lẹ na plọn ovi yetọn lẹ go, e sọ na anademẹ dagbe lẹ do lehe yé na wàmọ do ji. Mẹjitọ lẹ dona nọ dín aliho voovo lẹ egbesọegbesọ nado nọ plọnnu ovi lẹ gando Jiwheyẹwhe go. (Deut. 6:6, 7) Ayinamẹ sinai do Biblu ji he bọdego lẹ ko gọalọna mẹjitọ susu nado wàmọ.
2. Nawẹ mẹjitọ lẹ sọgan yí nudida lẹ do plọnnu ovi yetọn lẹ gbọn?
2 Nọ Yí Nudida lẹ Do Plọnnu Yé: Mẹjitọ lẹ sọgan yí adà daho de wà nado gọalọna ovi yetọn lẹ nado nọ pọ́n Jiwheyẹwhe hlan taidi Omẹ nujọnu tọn de, eyin yé nọ dọ̀n ayiha yetọn wá nudida lẹ ji bosọ nọ gọalọna yé nado tunwun jẹhẹnu Jiwheyẹwhe tọn he nudida enẹlẹ nọ dehia lẹ go. (Lom. 1:20) Mẹjitọ lẹ sọgan nọ wà onú ehelẹ: (1) Kanse ovi lẹ nado dọ atin po kanlin he yé yiwanna lẹ po. (2) Basi dodinnanu do atin po kanlin enẹlẹ po ji. (3) Dọ nuhe nudida enẹlẹ plọn mí gando Jiwheyẹwhe go.
3. Nawẹ mẹjitọ lẹ sọgan hodo apajlẹ Jesu tọn nado plọn ovi lẹ gbọn?
3 Nọ Hodo Apajlẹ Jesu Tọn: Jesu nọ saba kàn kanbiọ lẹ sè. Linlẹn po numọtolanmẹ devi etọn lẹ tọn po nọ duahunmẹna ẹn taun. (Mat. 17:24, 25; Malku 8:27-29) Nado tindo kọdetọn dagbe, mẹjitọ lẹ dona nọ hodo apajlẹ Jesu tọn bo nọ na tuli ovi yetọn lẹ nado nọ voawu do dọ linlẹn yetọn. Ṣigba etẹwẹ lo, eyin ovi lẹ tindo walọ ylankan de kavi e nọ vẹawuna yé nado yí nuplọnmẹ titengbe de do yizan mẹ? Lẹnnupọndo lehe Jesu yinuwa hẹ apọsteli lẹ do ji. To whedelẹnu, yé nọ dọnnu hẹ yedelẹ sinsinyẹn podọ e vẹawuna yé nado yí nuhe Jesu plọn yé gando whiwhẹ go do yizan mẹ. Etomọṣo, Jesu nọ fahomẹ bo nọ to hodọna yé whẹwhẹ do nujọnu-yinyin whiwhẹ tọn ji. (Malku 9:33, 34; Luku 9:46-48; 22:24, 25) Mẹjitọ he nọ hodo apajlẹ Jesu tọn lẹ nọ yí homẹfa do gọkọna ovi yetọn lẹ, podọ eyin e biọ domọ, yé nọ to nudopolọ vọ́ dọ kakajẹ whenue nujọnu-yinyin nuplọnmẹ lọ tọn wá họnwun na ovi lọ lẹ.
4. Nawẹ apajlẹ mẹjitọ lẹ tọn sọgan yinuwado ovi lẹ ji gbọn?
4 Nọ Ze Apajlẹ Dagbe Dai: Nuhe mẹjitọ lẹ nọ wà nọ yinuwado ovi lẹ ji taun hugan nuhe yé nọ dọ. Na taun tọn, e nọ bọawuna ovi lẹ nado yí nuhe mẹjitọ lẹ to pinplọn yé do yizan mẹ, eyin mẹjitọ lẹ lọsu nọ yí nuplọnmẹ enẹlẹ do yizan mẹ.—Lom. 2:21.
5. Fie wẹ mẹjitọ lẹ sọgan mọ alọgọ te nado plọnnu ovi lẹ?
5 Fie A Sọgan Mọ Alọgọ Te: Titobasinanu lọ nọ wleawuna zinjẹgbonu susu lẹ nado gọalọna mẹjitọ lẹ nado plọn nugbo lọ ovi yetọn lẹ gando Jiwheyẹwhe go. Zinjẹgbonu delẹ yin awuwlena tlọlọ na ovi pẹvi lẹ, podọ devo lẹ tin he sọgan gọalọna mẹjitọ lẹ po jọja aflanmẹ yetọn lẹ po nado nọ tindo hodọdopọ dagbe. Mẹhe nọ zan Intẹnẹt lẹ sọgan mọ nudọnamẹ yọ́n-na-yizan devo lẹ gando mẹjitọ lẹ po ovi lẹ po go to www.pr2711.com ji.