Hẹn Lizọnyizọn Towe Pọnte Dogọ—Duduto Hodidọ He Sọgan Hẹnalọdotena Hodọdopọ lẹ Ji
Nuhewutu E Do Yin Nujọnu: Mí ni dọ dọ a yọnẹn dọ nugbajẹmẹji de to na jọ to madẹnmẹ. Mẹsusu wẹ na kú eyin yé ma họnyi fie do hihọ́. To whenue a yì kọmẹnu de dè bo to avase na ẹn, e gbòhódonù na we bo dọ dọ alọnu emitọn ján. E họnwun dọ a ma na yawu hònúpla, a na gbẹ́ dovivẹnu nado gọalọna ẹn. To aigba-denamẹ mítọn lẹ ji, mẹsusu wẹ nọ gbẹ́ ohó mítọn, na yé ma yọ́n pinpẹn owẹ̀n gbẹwhlẹngán tọn he lá mí te tọn wutu. E sọgan yindọ alọnu yetọn ján to whenue mí wá dla yé pọ́n. (Mat. 24:37-39) Kavi ohó agọ̀ he gbẹtọ lẹ nọ dọ gando mí go lẹ sọgan ko yinuwado yé ji. (Mat. 11:18, 19) Yé sọgan lẹndọ vogbingbọn de ma tin to míwlẹ po sinsẹ̀n he nọ de sinsẹ́n ylankan tọ́n lẹ po ṣẹnṣẹn. (2 Pita 2:1, 2) Eyin whétọ lọ ma do ojlo hia to afọdopolọji, mí ma dona yawu hònúpla.
Lehe Mí Sọgan Wàmọ Do:
• Whẹpo a nado tọ́n na kunnudide whédegbè jẹ whédegbè tọn, nọ yí ojlẹ kleun de zan nado lẹnnupọndo hodidọ he sọgan hẹnalọdote na hodọdopọ lẹ po lehe a sọgan duto yé ji do po ji.
• Eyin whétọ lọ jẹagọdo nuhe dọ a te, tẹnpọn nado zindonukọn to hodọdopọ lọ mẹ po zinzin po. Vlavo a sọgan wàmọ gbọn pipà nina ẹn dali. Di apajlẹ, eyin e dọ dọ sinsẹ̀nnọ wẹ emi lọsu yin, a sọgan gblọn dọ, “Mẹhe nọ yiwanna gbigbọnu lẹ di mìwlẹ nkọ dín wẹ n’tlẹ te nado dọho hẹ.” To whedelẹnu, nukunnumimọjẹ numọtolanmẹ po ninọmẹ whétọ lẹ tọn po mẹ na hẹn yọnbasi na we nado zindonukọn to kunnudide na yé mẹ. Di dohia, eyin e dọ dọ alọnu emitọn ján, a sọgan dọmọ: “N’mọ do mọ. Amọ́ whẹpo n’nado yì, e na jlo mi nado yí owe ehe na mì.” Nudevo he mí sọgan wà eyin whétọ lọ dọ dọ emi ma tindo ojlo wẹ nado kàn kanbiọ de sè e. A sọgan dọ dọ, “Be Biblu mẹ wẹ mì ma tindo ojlo te ya kavi to sinsẹ̀n mẹ?”
• Nọ yí wuntuntun zan. Flindọ Jehovah ma nọ hẹn gbẹtọ lẹ po huhlọn po nado sè ohó etọn. (Deut. 30:19) Mẹdopodopo wẹ na hẹn agbàn ede tọn to Jehovah nukọn. (Gal. 6:5) Eyin whétọ lọ ma jlo na sèhó mítọn paali, nuyọnẹnnu wẹ e na yin nado jo e do. Sisi nina numọtolanmẹ whétọ lẹ tọn na hẹn yọnbasi na wẹnlatọ devo lẹ nado wá dekunnuna yé to whedevonu.—1 Pita 3:15.
Tẹ́n Ehe Pọ́n to Osun lọ Mẹ:
• To whenue a pehẹ hodidọ he sọgan hẹnalọdotena hodọdopọ de bo ko tọ́n sọn whétọ lọ dè godo, nọ dọhodopọ hẹ mẹhe po hiẹ po to azọ́nwa gando aliho he na ko yọ́n hugan nado duto ninọmẹ lọ ji go.