Gọalọna Whétọ lẹ Nado Lẹnnupọn

1. Aliho hodidọ tọn tẹwẹ nọ yọ́n hugan to lizọnyizọn lọ mẹ?

¹ Aliho hodidọ tọn tẹwẹ nọ tindo kọdetọn dagbe hugan to lizọnyizọn lọ mẹ? Nado yin hẹngogonọ wẹ ya kavi nado gọalọna whétọ lọ na e nido lẹnnupọn bo wá tadona dagbe kọ̀n? Apọsteli Paulu hẹn todoaitọ etọn lẹ nado lẹnnupọn to whenue e to hodọna Ju he tin to Tẹsalonika lẹ, podọ “taidi kọdetọn de, delẹ to yé mẹ lẹzun yisenọ.” (Owalọ 17:2-4) Etẹwẹ e zẹẹmẹdo nado nọ hẹn mẹdevo lẹ lẹnnupọn?

2. Nawẹ mí sọgan hodo apajlẹ Paulu tọn gbọn to whenue mí to wẹndagbe lọ lá?

² Nọ Lẹnnupọndo Numọtolanmẹ po Nuyise Whétọ lẹ Tọn po Ji: Eyin mí na gọalọna whétọ lẹ nado lẹnnupọn, mí dona yọ́n numọtolanmẹ yetọn. Paulu bẹ hodidọ de jẹeji hẹ Glẹkinu mayisenọ he nọ nọ̀ Aleopagu lẹ po nuhe yé na ko yọnẹn kavi kẹalọyi lẹ po. (Owalọ 17:22-31) Enẹwutu, to whenue a to awuwlena nuzedonukọnnamẹ towe, nọ lẹnnupọndo nuyise po pọndohlan agọ̀ mẹhe nọ nọ̀ aigba-denamẹ mìtọn ji lẹ tọn po ji. (1 Kọl. 9:19-22) Eyin whétọ lọ fọ́n linlẹn agọjẹdonu tọn de dote, tẹnpọn nado dín nuhe ji hiẹ po ewọ po kọngbedopọ do bo ze hodidọ towe sinai do ehe ji.

3. Nawẹ mí sọgan yihojlẹdohogo po kọdetọn dagbe po hẹ mẹdevo lẹ gbọn kanbiọ lẹ yiyizan po azọ́nyinyọnẹn po dali gbọn?

³ Nọ Yí Kanbiọ lẹ Zan po Azọ́nyinyọnẹn Po: E na vẹawu nado jlẹ ali na gbejizọnlinzintọ de eyin mí ma yọ́n fihe e te. Mọdopolọ eyin mí na gọalọna whétọ de nado wá tadona he sọgbe kọ̀n, mí dona yọ́n linlẹn etọn whẹ́. Whẹpo Jesu do nọ yihojlẹdohogo hẹ todoaitọ etọn de, e nọ saba kàn kanbiọ lẹ sè nado yọ́n linlẹn mẹlọ tọn. Di apajlẹ, to whenue dawe de kanse Jesu dọ, “Gbọn etẹ wiwà dali wẹ yẹn na dugu ogbẹ̀ madopodo tọn?,” Jesu tẹnpọn nado yọ́n pọndohlan etọn whẹpo do na gblọndo. (Luku 10:25-28) To ojlẹ devo mẹ, whenuena Pita na gblọndo he ma sọgbe de, Jesu yí kanbiọ lẹ zan po azọ́nyinyọnẹn po nado jla pọndohlan etọn do. (Mat. 17:24-26) Enẹwutu, eyin whétọ lọ kàn kanbiọ de sè kavi dọ nuhe ma sọgbe de, mí sọgan yí kanbiọ lẹ zan nado hẹn ẹn lẹnnupọndo whẹho lọ ji.

4. Naegbọn mí dona dovivẹnu nado gọalọna whétọ lẹ nado lẹnnupọn?

⁴ Eyin mí nọ gọalọna whétọ lẹ nado lẹnnupọn, be mí to apajlẹ Mẹplọntọ Daho lọ, Jesu, po wẹndagbe-jlatọ azọ́nyọnẹntọ owhe kanweko tintan tọn lẹ po tọn hodo niyẹn. Gbọnmọ dali, mí nọ doyẹyigona whétọ lọ bosọ nọ do sisi hia ẹ. (1 Pita 3:15) Taidi kọdetọn de, e sọgan jlo dọ mí ni lẹkọwa.