**Alọnuwe lọ Wẹndagbe De Yiyizan Nado Plọnnumẹ**

1. Nawẹ alọnuwe lọ Wẹndagbe de yin awuwlena gbọn?

¹ Dile e yin hodọdeji to Lizọnyizọn Ahọluduta Tọn Mítọn juillet tọn mẹ do, dopo to azọ́nwanu mẹpinplọn tọn titengbe mítọn lẹ mẹ wẹ alọnuwe lọ Wẹndagbe de sọn Jiwheyẹwhe Dè! Wefọ he yin dide lẹ ma yin hoyidọ sọn e mẹ, na whétọ lẹ nido sọgan duvivi nupinplọn tlọlọ sọn Biblu mẹ tọn. Dile etlẹ yindọ nuplọnmẹwe mítọn susu nọ yin kinkan to aliho de mẹ bọ wehiatọ lọ sọgan plọn yé na ede, alọnuwe ehe yin awuwlena nado yin hodọdeji po nuplọnmẹtọ de po. Enẹwutu, to whenue mí ze e donukọnna mẹde, mí dona tẹnpọn nado do lehe oplọn lọ nọ yì do hia whétọ lọ na ewọ nido mọ lehe e nọ yin awuvivinu nado plọn wẹndagbe lọ sọn Biblu mẹ do.—Mat. 13:44.

2. Nawẹ mí sọgan yí alọnuwe Wẹndagbe de zan to dlapọn tintan whenu gbọn?

² To Dlapọn Tintan Whenu: A sọgan dọmọ: “N’wá dla mì pọ́n na fie aihọn lọ pànta nọ duahunmẹna mẹsusu. Be mì lẹndọ nulẹ na wá pọnte gbede ya? [Jotẹnna gblọndo.] Biblu bẹ wẹndagbe he sọgan na mí todido de hẹn. Kanbiọ he Biblu na gblọndo na delẹ die.” Ze alọnuwe lọ na whétọ lọ bo biọ to e si nado de kanbiọ he jlo e to wepa godo tọn ji. Enẹgodo, do lehe oplọn lọ nọ yin bibasi do hia ẹ gbọn hukan tintan nupinplọn he e de lọ tọn yiyizan dali. Aliho devo wẹ nado kàn kanbiọ ojlofọndotenamẹ tọn de sè whétọ lọ sinai do nupinplọn de he hiẹ de ji, bo do lehe alọnuwe lọ sọgan gọalọna ẹn nado mọ gblọndo Biblu tọn do hia ẹ. Eyin video he gando nupinplọn lọ go de tin to jw.org ji, wẹnlatọ delẹ nọ hò e na whétọ lọ to nuzedonukọnnamẹ yetọn whenu.

3. Nawẹ mí sọgan deanana oplọn de gbọn alọnuwe Wẹndagbe de yiyizan dali gbọn? Basi zẹẹmẹ.

³ Lehe Mí Na Deanana Oplọn lọ Do: (1) Hia kanbiọ he yin sislẹ bo yin kinkan po wekun titli po nado gọalọna whétọ lọ nado na ayidonugo nuagokun lọ. (2) Hia hukan he bọdego. (3) Hia wefọ he yin kinkan po wekun flinflin po lẹ, bo yí kanbiọ zinzin tọn lẹ do gọalọna whétọ lọ nado mọ lehe wefọ lọ lẹ na gblọndo kanbiọ lọ tọn do. (4) Eyin hukan devo tin to kanbiọ lọ glọ, vọ́ afọdide 2tọ po 3tọ po basi. Eyin video de gando kanbiọ lọ go bọ a ma ko hò e na whétọ lọ, de ojlẹ de nado hò e to hodọdopọ lọ whenu. (5) Nado dotana, biọ to whétọ lọ si nado na gblọndo na kanbiọ he yin sislẹ lọ nado hẹn ẹn diun dọ ewọ mọnukunnujẹemẹ.

4. Etẹwẹ na gọalọna mí nado yí azọ́nwanu họakuẹ ehe zan po azọ́nyinyọnẹn po?

⁴ Jẹakọ hẹ azọ́nwanu họakuẹ ehe. Nọ yí i zan to ninọmẹ depope he sọgbe mẹ. Jẹnukọnna oplọn dopodopo, nọ lẹnnupọndo nuplọntọ lọ po aliho dagbe hugan he mẹ a sọgan basi zẹẹmẹ na ẹn te gbọn wefọ he tin to nupinplọn lọ mẹ lẹ yiyizan dali po ji. (Howh. 15:28; Owalọ 17:2, 3)Dile a na to numimọ tindo bọ azọ́nyinyọnẹn towe na to jijideji, alọnuwe ehe sọgan lẹzun dopo to azọ́nwanu he a yiwanna hugan lẹ mẹ ehe a na nọ yizan nado plọn nugbo lọ gbẹtọ lẹ!