Alọnuwe Yọyọ He Yin Awuwlena Nado Deanana Plọnmẹ Biblu lẹ Wá Titobasinanu lọ Mẹ
Lehe Mí Na Yí Alọnuwe Wẹndagbe de sọn Jiwheyẹwhe Dè! Zan Do
1. Alọnuwe yọyọ tẹwẹ yin didetọn to Plidopọ Agbegbe tọn “Basi Hihọ́na Ahun Towe!” whenu bo yin awuwlena nado gọalọna mí nado basi gọyìpọn lẹ podọ nado bẹ plọnmẹ Biblu lẹ jẹeji?
1 To Plidopọ Agbegbe tọn “Basi Hihọ́na Ahun Towe!” whenu, homẹhunnu wẹ e yin na mí nado mọ alọnuwe yọyọ de yí he na gọalọna mí nado basi gọyìpọn lẹ podọ nado bẹ plọnmẹ Biblu lẹ jẹeji. Alọnuwe lọ Wẹndagbe de sọn Jiwheyẹwhe Dè! diọtẹnna alọnuwe Etẹwẹ Jiwheyẹwhe Biọ bo yin awuwlena to aliho dopolọ mẹ taidi alọnuwe hoho enẹ, na nupinplọn etọn lẹ lọsu to kleunkleun. Ehe na gọalọna mí nado yí alọnuwe lọ zan po kọdetọn dagbe po nado bẹ plọnmẹ Biblu lẹ jẹeji to họntonu. Alọnuwe Etẹwẹ Jiwheyẹwhe Biọ lọ dọhodo nubiọtomẹsi Klistiani tọn lẹ ji, he sọgan vẹawuna nuplọntọ yọyọ lẹ nado kẹalọyi. Ṣigba to vogbingbọn mẹ, alọnuwe yọyọ ehe zinnudo wẹndagbe he tin to Biblu mẹ lọ ji.—Owalọ 15:35.
2. Naegbọn alọnuwe Wẹndagbe de do yin didetọn?
2 Naegbọn e do yin didetọn? Mẹmẹsunnu lẹ lẹdo aihọn pé wẹ ko to owe he bọawu de biọ, he na whàn gbẹtọ lẹ nado kẹalọyi nugbo lọ bo nasọ gọalọ nado bẹ plọnmẹ Biblu lẹ jẹeji to owe Biblu Plọn Mí mẹ, yèdọ owe titengbe he mí do nọ plọn Biblu hẹ gbẹtọ lẹ. Mẹhe nọ pọ́n nupinplọn sọn owe lẹ mẹ hlan taidi apọṣimẹnu lẹ, nọ saba kẹalọyi dọ yè ni yí alọnuwe de zan nado plọn Biblu hẹ yé. Humọ, e nọ bọawu hugan nado basi lẹdogbedevomẹ alọnuwe de tọn do ogbè susu mẹ.
3. Nawẹ alọnuwe ehe gbọnvo na nuplọnmẹwe mítọn he pò lẹ gbọn?
3 Lehe E Yin Awuwlena Do: Susu nuplọnmẹwe mítọn lẹ tọn nọ yin kinkan to aliho de mẹ bọ wehiatọ de sọgan hia yé bo mọnukunnujẹ nugbo lọ mẹ eyin mẹde ma tlẹ gọalọna ẹn. Ṣigba, alọnuwe ehe gbọnvo. E yin kinkan to aliho de mẹ nado plọn Biblu po alọgọ nuplọnmẹtọ de tọn po. Enẹwutu, to whenue mí ze e donukọnna mẹde, e na yọ́n hugan nado gbadopọnna hukan dopo kavi awe hẹ mẹlọ. Na hukan lọ lẹ ma dite wutu, yé tlẹ sọgan yin dogbapọnna to họntonu whétọ de tọn kavi to ajọwatẹn etọn. Dile etlẹ yindọ e na yọ́n nado bẹ sọn nupinplọn 1 lọ ji, mí sọ sọgan bẹ oplọn de jẹeji sọn nupinplọn alọnuwe lọ tọn depope ji sọgbe hẹ ninọmẹ whétọ lọ tọn.
4. Nawẹ alọnuwe ehe nọ gọalọna mí nado plọnnumẹ sọn Biblu mẹ tlọlọ gbọn?
4 To owe mítọn susu mẹ, gblọndo kanbiọ he tin to owe lọ mẹ lẹ tọn sọgan yin mimọ to hukan lọ lẹ mẹ. Ṣigba to alọnuwe ehe mẹ, Biblu mẹ wẹ suhugan gblọndo lọ lẹ tọn tin te. Mẹsusu wẹ nọ jlo nado plọnnu sọn Biblu mẹ kakati nido yin sọn owe mítọn lẹ mẹ. Enẹwutu, suhugan wefọ he yin dide lẹ tọn ma yin hoyidọ sọn e mẹ. Yé dona yin hihia sọn Biblu mẹ tlọlọ. Ehe nọ gọalọna nuplọntọ lẹ nado mọdọ nuhe plọn yé te lẹ wá sọn Jiwheyẹwhe dè.—Isa. 54:13.
5. Naegbọn e do yin nujọnu na nuplọnmẹtọ lọ nado nọ wleawu ganji jẹnukọnna oplọn dopodopo?
5 Alọnuwe lọ ma basi zẹẹmẹ wefọ lẹpo tọn. Etẹwutu? E yin awuwlena nado na tuli nuplọntọ lọ nado kàn kanbiọ lẹ sè podọ nado na dotẹnmẹ nuplọnmẹtọ lọ nado yí nugopipe mẹpinplọn tọn etọn zan. Enẹwutu, nujọnu wẹ e yin dọ mí ni nọ wleawu ganji jẹnukọnna oplọn dopodopo. Avase de die: Dapana ohó susu didọ. Mí nọ jlo nado nọ basi zẹẹmẹ wefọ lẹ tọn. Ṣigba, mí nọ saba tindo kọdetọn dagbe hugan to whenue mí biọ to nuplọntọ lọ si nado basi zẹẹmẹ nuhe ewọ lẹn gando wefọ de go tọn. Gbọn zinzin yíyí do kàn kanbiọ lẹ sè e dali, mí sọgan gọalọna ẹn nado tunwun zẹẹmẹ wefọ dopodopo tọn go.—Owalọ 17:2.
6. Nawẹ mí sọgan yí alọnuwe lọ zan do: (a) to fie gbẹtọ lẹ nọ tindo ayihaawe gando Jiwheyẹwhe po Biblu po go te? (b) to lizọnyizọn whédegbè jẹ whédegbè tọn mẹ? (c) nado ze plọnmẹ Biblu donukọnnamẹ tlọlọ? (d) to whenue mí to gọyìpọn lẹ basi?
6 Dile e nọ yin do na nuplọnmẹwe mítọn devo lẹ, alọnuwe ehe lọsu sọgan yin zizedonukọnnamẹ to whedepopenu, mahopọnna owe he mí to zizedonukọnnamẹ to osun lọ mẹ. Mẹsusu wẹ na yiwanna nado yí i zan nado bẹ plọnmẹ Biblu họntonu tọn lẹ jẹeji tlọlọ. Humọ, dile e yin nùdego do to plidopọ agbegbe tọn ji, alọnuwe lọ yiyizan to whenue mí lẹkọyi mẹhe do ojlo hia lẹ dè “sọgan hẹn gọyìpọn bibasi zun awuvivinu!”—Pọ́n apotin he tin to weda 5-7.
7. Nawẹ a sọgan yí alọnuwe lọ zan nado basi plọnmẹ Biblu de gbọn?
7 Lehe Mí Na Deanana Oplọn lọ Do: Mí sọgan bẹ hodọdopọ jẹeji gbọn kanbiọ he yin sislẹ to hosọ lọ glọ lẹ hihia dali. Bọdego, hia hukan lọ po wefọ he yin kinkan po wekun flinflin po lẹ. Yí kanbiọ zinzin tọn lẹ zan nado gọalọna whétọ lọ nado mọnukunnujẹ zẹẹmẹ wefọ lọ lẹ tọn mẹ. Enẹgodo, whẹpo a nado yì kanbiọ devo ji, biọ to whétọ lọ si nado na gblọndo kanbiọ he mì ko gbadopọnna lọ tọn nado hẹn ẹn diun dọ ewọ mọnukunnujẹ hukan lọ mẹ. Vlavo to bẹjẹeji, e na yọ́n hugan nado nọ dọhodo kanbiọ dopo poun ji. To nukọn mẹ, mí sọgan dlẹnkanna oplọn lọ bo nọ gbadopọnna nupinplọn dopo blebu.
8. Nawẹ mí dona nọ dlẹnalọdo wefọ Biblu tọn lẹ gbọn, podọ etẹwutu?
8 Wefọ Biblu tọn he hogbe lọ “hia” to nukọnna lẹ wẹ de gblọndo kanbiọ lọ lẹ tọn tọ́n hugan. To wefọ de dide whenu, dapana hodidọ delẹ taidi, “Apọsteli Paulu wlan dọmọ” kavi, “Doayi nuhe dọdai Jelemia tọn dọ go.” Hogbe enẹlẹ yiyizan sọgan zọ́n bọ whétọ lọ na lẹndọ nuhe gbẹtọvi tata lẹ dọ hia wẹ mí te. E na pọnte nado nọ dọ nude taidi, “Ohó Jiwheyẹwhe tọn dọ tofi dọ” kavi, “Doayi dọdai Biblu tọn ehe go.”
9. Be wefọ he yin dide lẹpo wẹ dona yin hihia to oplọn lọ whenu ya?
9 Be wefọ he yin dide lẹpo wẹ mí dona hia ya kavi dehe hogbe lọ “hia” to nukọnna lẹ kẹdẹ? Ninọmẹ lẹ wẹ na dohia. Wefọ he yin dide lẹpo wẹ tin to finẹ na whẹwhinwhẹ́n de wutu. Dopodopo yetọn wẹ bẹ nuagokun de hẹn he ji e na yọ́n dọ mí ni dọhodo. Ṣigba to ninọmẹ delẹ mẹ, e sọgan biọ dọ mí ni gbadopọnna wefọ he hogbe lọ “hia” to nukọnna lẹ kẹdẹ, vlavo na nuplọntọ lọ ma tindo whenu susu, ma tindo ojlo, kavi ma yọ́n wehia sọmọ wutu.
10. Whetẹnu wẹ mí sọgan diọadana oplọn lọ jẹ owe Biblu Plọn Mí mẹ?
10 Whenue Mí Sọgan Jẹ Owe Biblu Plọn Mí Zan Ji: To whenue mí ko dọhodopọ hẹ whétọ lọ whlasusu do alọnuwe lọ ji bọ e ko lẹzun plọnmẹ Biblu gbesisọ tọn de godo, mí sọgan diọadana oplọn lọ jẹ owe Biblu Plọn Mí mẹ kavi zindonukọn to alọnuwe Wẹndagbe de lọ mẹ kakajẹ whenue mí dotana alọnuwe lọ. Wẹnlatọ lẹ sọgan yí wuntuntun zan nado de whenue yé na diọadana oplọn lọ. Ṣigba, to whenue mí jẹ owe Biblu Plọn Mí lọ zan ji, be mí dona bẹ oplọn lọ sọn bẹjẹeji owe lọ tọn wẹ ya? Osẹ́n de ma tin na enẹ. Ninọmẹ nuplọntọ lẹ tọn gbọnvo. Ṣigba, suhugan nuplọntọ lẹ tọn wẹ na mọaleyi eyin yé sọ plọnnu yinukọn dogọ to owe Biblu Plọn Mí mẹ do hosọ he ji yé ko plọnnu do dai lẹ.
11. Naegbọn mí dona yí alọnuwe ehe zan ganji?
11 To aihọn he mẹ owẹ̀n dagbe masọ tin te ehe, míwlẹ tindo lẹblanulọkẹyi daho lọ nado lá owẹ̀n dagbe hugan lọ—dọ Ahọluduta Jiwheyẹwhe tọn to gandu podọ to madẹnmẹ e na deanana aihọn yọyọ de fie dodowiwa na nọ nọ̀! (Mat. 24:14; 2 Pita 3:13) Mí deji dọ susu mẹhe sè owẹ̀n ehe lẹ tọn wẹ na kọngbedopọ hẹ hogbe gbọdo ehelẹ dọmọ: “Na afọ ewọ he hẹn wẹndagbe wá tọn yin whanpẹnọ to osó ji do le, he to owẹ̀n jijọho tọn do, he to wẹndagbe nudagbe tọn hẹnwa, he to whlẹngán tọn dọ; he dọ hlan Ziọni dọ, Jiwheyẹwhe towe duahọlu.” (Isa. 52:7) Mì gbọ mí ni yí alọnuwe yọyọ ehe zan nado hẹn wẹndagbe he wá sọn Jiwheyẹwhe dè lọ jẹ mẹhe ovẹ́ nugbo lọ tọn to húhú to aigba-denamẹ mítọn ji lẹ dè!
[Apotin to weda 5]
To Fie Gbẹtọ lẹ Nọ Tindo Ayihaawe Gando Jiwheyẹwhe po Biblu po Go Te:
● To lẹdo delẹ mẹ, wẹnlatọ lẹ nọ mọdọ hogbe lọ lẹ “Jiwheyẹwhe” po “Biblu” po yiyizan nọ zọ́n bọ whétọ lẹ nọ doalọtena hodọdopọ de. To ninọmẹ enẹ mẹ, e na yọ́n hugan dọ to dlapọn tintan whenu, mí ni nọ dọhodo whẹho he nọ duahunmẹna gbẹtọ lẹ to lẹdo lọ mẹ lẹ ji, taidi nuhudo gandudu dagbe de tọn, fie whẹndo lẹ sọgan mọ ayinamẹ yọ́n-na-yizan lẹ te, po nuhe sọgodo bẹhẹn lẹ po. Vlavo to whenue mí ko tindo hodọdopọ susu hẹ whétọ lọ do lehe mí wagbọn do yọnẹn dọ Jiwheyẹwhe tin po nuhewutu mí sọgan dejido Biblu go po ji godo, mí sọgan wá ze alọnuwe lọ Wẹndagbe de donukọnna ẹn.
[Apotin to weda 6]
To Lizọnyizọn Whédegbè jẹ Whédegbè Tọn Mẹ:
● “N’wá dla mì pọ́n nado dohia mì lehe e bọawu do sọ nado yọ́n nuhe yin linlẹn Jiwheyẹwhe tọn gando sọgodo gbẹtọvi lẹ tọn go. Be mì ko kanse mìde pọ́n eyin Jiwheyẹwhe na hẹn pọngbọ wá na mí sọn yajiji si ya? [Jotẹnna gblọndo.] Alọnuwe ehe do fie mì sọgan mọ gblọndo na kanbiọ enẹ te to Biblu mẹ hia. [Ze alọnuwe lọ dopo na ẹn, bo hia hukan tintan to nupinplọn 1 glọ, gọna Jelemia 29:11.] Po ehe po, be mì mọdọ e sọgbe hẹ lẹnpọn dagbe nado lẹndọ ojlo Jiwheyẹwhe tọn wẹ yindọ mí ni tindo sọgodo dagbe de ya? [Jotẹnna gblọndo.] Mì sọgan hẹn vọkan ehe go eyin mì jlo. To whedevonu, mí sọgan gbadopọnna hukan awetọ nado mọ gblọndo he Biblu na na kanbiọ ehe, ‘Nawẹ Jiwheyẹwhe na hẹn pọngbọ wá na gbẹtọvi lẹ sọn nuhe nọ hẹn yajiji wá lẹ si gbọn?’” Eyin whétọ lọ tindo whenu susu to dlapọn tintan whenu, hiẹ sọgan hia hukan awetọ lọ po wefọ Biblu tọn atọ̀n he e bẹhẹn lẹ po bo dọhodo yé ji. Basi tito nado lẹkọwa nado dọhodo kanbiọ nupinplọn lọ tọn awetọ ji.
● “Mẹsusu wẹ nọ saba hodẹ̀, titengbe to whenue yé tindo nuhahun. Be mìlọsu nọ hodẹ̀ to whedelẹnu ya? [Jotẹnna gblọndo.] Be mì lẹndọ odẹ̀ lẹpo wẹ Jiwheyẹwhe nọ sè ya kavi odẹ̀ delẹ tin he ma nọ hẹn homẹ etọn hùn? [Jotẹnna gblọndo.] N’tindo alọnuwe de tofi he do lehe mí sọgan mọ gblọndo he Biblu na na kanbiọ enẹlẹ do hia. [Ze alọnuwe lọ dopo na ẹn, bo gbadopọnna hukan tintan to nupinplọn 12tọ glọ hẹ ẹ gọna wefọ he hogbe lọ “hia” to nukọnna lẹ.] Be e ma yin ayajẹnu wẹ e yin dọ Jiwheyẹwhe nọ desọn ojlo mẹ nado sè odẹ̀ mítọn lẹ ya? Ṣigba, eyin mí jlo dọ Jiwheyẹwhe ni sè odẹ̀ mítọn lẹ, mí dona yọ́n ewọ ganji. [Gọyì nupinplọn 2tọ ji bo do hóvila lọ lẹ hia ẹ.] Eyin e jlo mì, n’sọgan jo alọnuwe ehe do na mì, bọ to whedevonu mí na dọhodo gblọndo he Biblu na na kanbiọ ojlofọndotenamẹ tọn enẹlẹ ji.”
● “N’wá mì dè na mí nido lẹnnupọn dopọ do fie aihọn ehe pànta ji, na mẹsusu wẹ ehe nọ duahunmẹna wutu. Be mì lẹndọ nulẹ na wá pọnte to gbèdopo ya? [Jotẹnna gblọndo.] E nọ paṣa mẹsusu nado sè dọ Biblu bẹ wẹndagbe de hẹn he sọgan na mí todido. Delẹ die to kanbiọ he Biblu na gblọndo na lẹ mẹ.” Ze alọnuwe lọ dopo na ẹn, bo biọ to e si nado de kanbiọ he e yiwanna hugan to wepa godo tọn lọ ji. Enẹgodo, yì nupinplọn he e de lọ ji bo do lehe oplọn lọ nọ yin bibasi do hia ẹ. Basi tito nado lẹkọwa nado dọhodo kanbiọ nupinplọn lọ tọn he bọdego ji.
[Apotin to weda 7]
Tẹnpọn Nado Ze Plọnmẹ Biblu Donukọnnamẹ Tlọlọ:
● “N’dọ ma wá dla mì pọ́n kleun nado do aliho Biblu pinplọn tọn yọyọ de hia mì. Alọnuwe ehe bẹ nupinplọn 15 hẹn, ehe do fie mì sọgan mọ gblọndo na kanbiọ titengbe lẹ te to Biblu mìtọn mẹ hia. [Do wepa tintan po godo tọn po hia ẹ.] Be mì ko tẹnpọn nado mọnukunnujẹ Biblu mẹ pọ́n ya? [Jotẹnna gblọndo.] Mì gbọ ma do lehe nupinplọn lọ lẹ bọawu do hia mì. [Gbadopọnna hukan tintan kanbiọ 3tọ tọn to nupinplọn 3tọ mẹ bo hia Osọhia 21:4, 5. Eyin e yọnbasi, gbadopọnna hukan he bọdego po wefọ he hogbe lọ “hia” to nukọnna lẹ po.] Eyin e jlo mì, n’sọgan jo alọnuwe ehe do na mì. E na yọ́n dọ mì ni tẹ́n aliho Biblu pinplọn tọn yọyọ ehe pọ́n. Eyin mì yiwanna nupinplọn lọ, mì sọgan zindonukọn. To whedevonu, mí sọgan gbadopọnna nupinplọn tintan. Nupinplọn lọ ma hugan weda dopo.”
[Apotin to weda 7]
Ze E Donukọnnamẹ to Gọyìpọn lẹ Whenu:
● To whenue mí to gọyìpọn basina mẹhe do ojlo hia de, mí sọgan dọmọ: “Homẹ ṣie hùn nado mọ mì whladopo dogọ. N’hẹn alọnuwe de wá na mì he bẹ gblọndo he Biblu na na kanbiọ ojlofọndotenamẹ tọn susu lẹ hẹn. [Ze alọnuwe lọ dopo na ẹn, bo biọ to e si nado pọ́n wepa godo tọn ji.] Detẹ to hosọ ehelẹ mẹ wẹ mì yiwanna hugan? [Jotẹnna gblọndo. Enẹgodo, yì nupinplọn he e de lọ ji.] Mì gbọ ma do lehe alọnuwe ehe sọgan yin yiyizan nado mọ gblọndo Biblu tọn do hia mì.” Gbadopọnna hukan dopo kavi awe gọna wefọ he hogbe lọ “hia” to nukọnna lẹ hẹ ẹ nado do lehe oplọn lọ nọ yin bibasi do hia ẹ. A ko bẹ plọnmẹ Biblu de jẹeji ján niyẹn! Jo alọnuwe lọ do na whétọ lọ bo basi tito nado lẹkọwa. To whenue mì fó nupinplọn enẹ godo, mì sọgan gbadopọnna nupinplọn devo he whétọ lọ na de kavi bẹ oplọn lọ sọn nupinplọn tintan ji.