Nuhe Biblu Dehia Gando Dowatọ Etọn Go

1. Naegbọn a do yọ́n pinpẹn Biblu tọn?

LEHE mí nọ yọ́n pinpẹn etọn na Jehovah Jiwheyẹwhe do sọ dọ e na mí Biblu! To Biblu mẹ, e wleawu ayinamẹ nuyọnẹn tọn lẹ tọn he gán gọalọna mí nado duto nuhahun he mí nọ pehẹ to egbehe lẹ ji po kọdetọn dagbe po. E sọ na mí todido jiawu de na sọgodo. Hú popolẹpo, Jehovah ko yí Biblu zan nado de jẹhẹnu etọn voovo lẹ hia mí. Dile mí to ayihamẹlẹnpọn do jẹhẹnu dagbedagbe etọn lẹ ji, enẹ nọ yinuwado ahun mítọn ji sisosiso bọ mí nọ yin whinwhàn nado dọnsẹpọ Jiwheyẹwhe mítọn gbọn awuwiwlena họntọnjiji pẹkipẹki de hẹ ewọ dali.—Salm. 25:14.

2. Aliho voovo tẹlẹ mẹ wẹ Jehovah ko de ede hia gbẹtọvi lẹ te?

² Jehovah jlo dọ gbẹtọ lẹ ni yọ́n emi. To hohowhenu, e yí odlọ lẹ, numimọ lẹ podọ etlẹ yin angẹli lẹ zan nado de ede hia. (Sọh. 12:6; Owalọ 10:3, 4) Amọ́, nawẹ mí gán plọnnu gando odlọ, numimọ kavi owẹ̀n he wá sọn angẹli lẹ dè ehelẹ go gbọn eyin yè ma ko kàn yé dai? Abajọ Jehovah do biọ to sunnu delẹ si nado “kàn” nuhe ewọ jlo dọ mí ni yọnẹn lẹ “dai do owe de mẹ.” (Jel. 30:2) Na “pipé wẹ aliho Jiwheyẹwhe nugbo lọ tọn” wutu, mí gán kudeji dọ aliho he mẹ e nọ dọho hẹ mí te ehe yọ́n taun bosọ nọ hẹn ale wá.—Salm. 18:30.

3. Nawẹ Jehovah hẹn ẹn diun dọ Biblu yin hihla dai gbọn? (Isaia 40:8)

³ Hia Isaia 40:8. Ohó Jiwheyẹwhe tọn ko na anademẹ dagbe sunnu po yọnnu po nugbonọ lẹ na owhe fọtọ́n susu lẹ. Nawẹ enẹ ko yọnbasi gbọn? Kanbiọ dagbe taun de niyẹn, na to bẹjẹeji, owe-hihá po ayú-wema he wá gble to nukọn mẹ lẹ po ji wẹ Owe-wiwe lẹ yin kinkan do, enẹwutu dopo tata to kandai he yè yí alọ do basi lẹ mẹ masọ pò to aimẹ to egbehe. Amọ́, Jehovah hẹn ẹn diun dọ vọkan kandai wiwe enẹ tọn lẹ yin bibasi. Mahopọnna dọ vọkan-basitọ lọ lẹ yin mapenọ, yé nọ aṣeji taun. Di apajlẹ, weyọnẹntọ de wlan gando Owe-wiwe Heblu tọn lẹ go dọ: “Mí sọgan dọ po nujikudo po dọ owe hohowhenu tọn devo depope ma ko yin hihla dai po gbesisọ po domọ.” Enẹwutu mahopọnna dọ Biblu yin kinkan e ko dẹn do nuhe nọ gble lẹ ji, podọ dọ gbẹtọvi mapenọ lẹ wẹ basi vọkan etọn, mí gán kudeji dọ nuhe mí nọ hia to Biblu mítọn mẹ to egbehe lẹ sọgbe hẹ linlẹn Jehovah he yin Dowatọ etọn tọn.

4. Etẹwẹ mí na gbadopọnna to hosọ ehe mẹ?

⁴ Jehovah wẹ yin Asisa “nunina dagbe lẹpo gọna nunina pipé lẹpo” tọn. (Jak. 1:17) Biblu yin dopo to nunina dagbe hugan he Jehovah ko na mí lẹ mẹ. Nunina de nọ do nude hia mí gando nunamẹtọ lọ go—enẹ wẹ obá he mẹ e yọ́n mí po nuhudo mítọn lẹ po jẹ. Nudopolọ wẹ e yin gando Mẹhe na mí Biblu go. Eyin mí lẹnnupọndo nunina ehe ji, mí nọ plọn nususu gando Jehovah go. Mí nọ mọ obá he mẹ e yọ́n míwlẹ po nuhudo mítọn lẹ po jẹ. To hosọ ehe mẹ, mí na dọhodo lehe Biblu nọ do jẹhẹnu Jehovah tọn atọ̀n delẹ hia do ji, enẹ wẹ nuyọnẹn etọn, whẹdida dodo etọn po owanyi etọn po. Jẹnukọn whẹ́, mì gbọ mí ni gbadopọnna aliho he mẹ Biblu do nuyọnẹn Jiwheyẹwhe tọn hia te lẹ.

BIBLU NỌ DO NUYỌNẸN JIWHEYẸWHE TỌN HIA

5. Etẹwẹ yin dopo to aliho he mẹ Biblu nọ do nuyọnẹn Jiwheyẹwhe tọn hia te lẹ mẹ?

⁵ Jehovah yọnẹn dọ mí do hudo ayinamẹ nuyọnẹn tọn etọn lẹ tọn. Podọ nuyọnẹn etọn kẹdẹ wẹ gọ́ nunina etọn he yin Biblu mẹ. Ayinamẹ Biblu tọn lẹ nọ wà dagbe na gbẹtọ lẹ. Biblu nọ diọ gbẹzan mẹlẹ tọn. Whenue Mose kàn owe tintan Biblu tọn lẹ, e dọna omẹ Jiwheyẹwhe tọn lẹ, enẹ wẹ Islaelivi lẹ dọmọ: “E ma yin ohó tata de poun na mì gba, ṣigba e zẹẹmẹdo ogbẹ̀ na mì.” (Deut. 32:47) Mẹhe nọ setonuna nuhe to Owe-wiwe mẹ lẹ gán do kọdetọn dagbe bo nasọ do ayajẹ to gbẹ̀mẹ. (Salm. 1:2, 3) Dile etlẹ yindọ Ohó Jiwheyẹwhe tọn ko yin kinkan sọn ojlẹ dindẹn die, e gbẹ́ do huhlọn nado hẹn gbẹzan mẹlẹ tọn pọnte. Di apajlẹ, to jw.org ji, to hosọ debọdo-dego lọ lẹ “Biblu Nọ Diọ Gbẹzan Mẹtọn” glọ, a na mọ numimọ jọnun 30 linlán he do lehe Biblu ko ‘to azọ́nwa to mẹhe tindo yise to e mẹ lẹ mẹ’ to egbehe do hia to aliho ayidego tọn mẹ.—1 Tẹs. 2:13.

6. Naegbọn mí gán dọ dọ Biblu ma taidi owe devo depope?

⁶ Owe devo depope ma taidi Ohó Jiwheyẹwhe tọn. Naegbọn e do yinmọ? Na Dowatọ owe enẹ tọn, yèdọ Jehovah Jiwheyẹwhe yin ganhunupotọ, tindo nuyọnẹn mayọnjlẹ de bosọ yin madopodo. Owe susu devo lẹ wẹ nọ gbọṣi aimẹ etlẹ yin to okú mẹhe kàn yé lẹ tọn godo, amọ́ ayinamẹ he to owe enẹlẹ mẹ lẹ ma nọ saba yọ́n-na-yizan ba dile ojlẹ to yìyì. To alọ devo mẹ, nunọwhinnusẹ́n nuyọnẹn tọn he to Biblu mẹ lẹ nọ yọ́n-na-yizan to whepoponu; yé ko wà dagbe na gbẹtọvi lẹ mahopọnna ojlẹ he mẹ yé nọgbẹ̀ te. Dile mí to owe wiwe enẹ hia bo to ayihamẹlẹnpọn do nuhe mí plọn lẹ ji, Dowatọ etọn nọ yí gbigbọ wiwe huhlọnnọ etọn zan nado gọalọna mí nado mọ lehe mí gán yí ayinamẹ Biblu tọn lẹ do yizan mẹ do to gbẹzan mítọn mẹ. (Salm. 119:27; Mal. 3:16; Heb. 4:12) Mọwẹ, Dowatọ Biblu tọn nọ to jejeji nado gọalọna we. Be apàpà ma dona nọ sọ́ mí nado nọ hia Biblu to gbesisọ mẹ ya?

7. Nawẹ Biblu kọ̀n omẹ Jiwheyẹwhe tọn lẹ dopọ to hohowhenu gbọn?

⁷ Aliho ayidego tọn devo he mẹ Biblu nọ do nuyọnẹn Jiwheyẹwhe tọn hia te wẹ yindọ, e nọ kọ̀n omẹ Jiwheyẹwhe tọn lẹ dopọ. Whenue Islaelivi lẹ biọ Aigba Pagbe tọn ji, ofi voovo lẹ wẹ yé sawhé do. Mẹdelẹ nọ hù whèvi, mẹdevo lẹ nọ yìn oyìn lẹ bọ mẹdevo lẹ nọ pọ̀gle. E gán bọawu dọ Islaelivi he nọ nọ̀ lẹdo aigba lọ tọn de mẹ lẹ ni gboawupo nado do ojlo to dagbemẹninọ Islaelivi hatọ he nọ nọ̀ lẹdo aigba lọ tọn devo mẹ lẹ mẹ lẹ. Amọ́, Jehovah basi tito na Islaelivi lẹ nido nọ pli dopọ to ojlẹ voovo lẹ mẹ nado dotoaina Ohó etọn dile e to yinyin hihia bọ zẹẹmẹ to yinyin bibasi do e ji. (Deut. 31:10-13; Nẹh. 8:2, 8, 18) Pọ́n lehe e dona ko ṣí na Islaelivi nugbonọ de whenue e wá Jelusalẹm bo mọ sinsẹ̀n-basitọ hatọ etọn vlavo livi susu he wá sọn awà voovo aigba lọ tọn lẹpo ji lẹ! Gbọnmọ dali, Jehovah nọ gọalọna omẹ etọn lẹ nado gbọṣi pọninọ mẹ. To nukọn mẹ whenue agun Klistiani tọn yin didoai, e bẹ sunnu po yọnnu po he nọ do ogbè susu bo wá sọn aṣa voovo lẹ mẹ bọ ninọmẹ yetọn lẹ sọ gbọnvo lẹ hẹn. Amọ́ na yé yiwanna Owe-wiwe lẹ wutu, yé nọ basi sinsẹ̀n hlan Jiwheyẹwhe nugbo lọ to pọmẹ. Mẹhe wá lẹzun yisenọ lẹ gán mọnukunnujẹ Ohó Jiwheyẹwhe tọn mẹ kiki po alọgọ sinsẹ̀n-basitọ hatọ lẹ gọna opli lẹ tọn po.—Owalọ 2:42; 8:30, 31.

8. Nawẹ Biblu nọ kọ̀n omẹ Jehovah tọn lẹ dopọ to egbehe gbọn?

⁸ Jiwheyẹwhe nuyọnẹntọ mítọn gbẹ́ to Biblu yizan nado plọnnu omẹ etọn lẹ bosọ kọ̀n yé dopọ. Asisa núdùdù gbigbọmẹ tọn he mí nọ duvivi etọn taun lọ tọn wẹ Biblu yin. Mí nọ pli to gbesisọ mẹ to opli po plidopọ mítọn lẹ po ji nado hia Biblu, dotoaina zẹẹmẹ etọn lẹ bosọ dọhodo e ji. Gbọnmọ dali, Biblu yin azọ́nwanu titengbe de he Jehovah nọ yizan nado jẹ lẹndai etọn kọ̀n, enẹ wẹ nado gọalọna sinsẹ̀n-basitọ etọn lẹ nado “nọ sẹ̀n ẹn abọ́ to abọ́ go.”—Zef. 3:9.

9. Jẹhẹnu tẹwẹ yin dandan nado mọnukunnujẹ owẹ̀n Biblu tọn mẹ? (Luku 10:21)

⁹ Lẹnnupọndo kunnudenu devo he do nuyọnẹn Jehovah tọn hia ji. E hẹn ẹn diun dọ adà susu Owe-wiwe lẹ tọn yin kinkan to aliho de mẹ bọ wehiatọ whiwhẹnọ lẹ kẹdẹ wẹ gán mọnukunnujẹ yé mẹ. (Hia Luku 10:21.) Gbẹtọ lẹ to filẹpo wẹ nọ hia Biblu. Dile weyọnẹntọ de dọ do, gbọnvona dọ Biblu “wẹ yin owe he gbayipe hugan he mẹlẹ nọ hia, e sọ yin dehe mẹlẹ nọ hia po sọwhiwhe po hugan, yèdọ hugan owe devo depope.” Amọ́ whiwhẹnọ lẹ kẹdẹ wẹ nọ mọnukunnujẹ nuhe e dọ mẹ nugbonugbo bosọ nọ yí do yizan mẹ.—2 Kọl. 3:15, 16.

10. Aliho devo tẹ mẹ wẹ Biblu nọ do nuyọnẹn Jehovah tọn hia te?

¹⁰ Mí sọ nọ plọnnu gando nuyọnẹn Jehovah tọn go to Biblu mẹ to aliho devo mẹ. Gbọnvona dọ Jehovah nọ yí Owe-wiwe lẹ zan nado plọnnu mí taidi pipli de, e sọ nọ yí i zan nado plọnnu dopodopo mítọn bosọ miọnhomẹna mí. Mímẹpo wẹ gán doayi ojlo he Jehovah nọ tindo to dopodopo mítọn mẹ go dile mí to Ohó etọn hia. (Isa. 30:21) Whenue a to pipehẹ nuhahun de, whla nẹmu wẹ a ko lẹhlan Owe-wiwe lẹ bo hia wefọ de he taidi nuhe yin kinkan na we tlọlọ? Ṣogan, gbẹtọ livi susu lẹ wẹ gán mọnukunnujẹ Biblu mẹ. Nawẹ e gán yọnbasi gbọn dọ e ni bẹ nudọnamẹ alọnu tọn he sọgbe hẹ nuhudo towe lẹ pẹẹ hẹn? Ehe yọnbasi kiki na Biblu yin alọnuzọ́n Dowatọ he yọnnuin hugan de tọn wutu.—2 Tim. 3:16, 17.

BIBLU NỌ DO WHẸDIDA DODO JIWHEYẸWHE TỌN HIA

11. Nawẹ Jiwheyẹwhe dohia gbọn dọ emi ma nọ homẹnukuntapọn to ojlẹ he mẹ Biblu yin kinkan te?

¹¹ Whẹdida dodo yin jẹhẹnu Jehovah tọn devo. (Deut. 32:4) Whẹdida dodo tindo kanṣiṣa pẹkipẹki hẹ mẹnukuntamahopọn, podọ Jehovah ma nọ homẹnukuntapọn. (Owalọ 10:34, 35; Lom. 2:11) Nugbo lọ dọ Biblu yin kinkan do ogbè voovo lẹ mẹ do enẹ hia. Suhugan owe 39 Biblu tọn tintan lẹ tọn wẹ yin kinkan do Heblugbe mẹ, ehe zọ́n bọ e bọawuna omẹ Jiwheyẹwhe tọn lẹ nado mọnukunnujẹ yé mẹ to ojlẹ lọ mẹ. Amọ́ to owhe kanweko tintan whenu, Glẹkigbe wẹ mẹlẹ nọ do hugan, enẹwutu owe 27 he gbọngodo to Biblu mẹ lẹ yin kinkan na taun tọn do ogbè enẹ mẹ. Jehovah ma tẹkudeji dọ ogbè dopo gee mẹ wẹ Ohó emitọn dona yin kinkan do. To egbehe, nudi gbẹtọ liva ṣinatọ̀n he nọ nọ̀ aigba ji lẹ nọ do ogbè susu lẹ. Nawẹ gbẹtọ planplan ehelẹ gán wá plọnnu gando Jehovah go gbọn?

12. Etẹwẹ yin dopo to aliho he mẹ Daniẹli 12:4 ko mọ hẹndi to azán godo tọn ehelẹ mẹ te lẹ mẹ?

¹² Gbọn yẹwhegán Daniẹli gblamẹ, Jehovah dopà dọ to ojlẹ opodo tọn lọ mẹ, “oyọnẹn nugbo” he to Biblu mẹ na “lẹzun susugege.” Mẹsusu wẹ na mọnukunnujẹemẹ. (Hia Daniẹli 12:4.) Dopo to nuhe gọalọ bọ oyọnẹn enẹ do lẹzun susugege lẹ mẹ wẹ yindọ, Biblu po owe sinai do Biblu ji lẹ po nọ yin lilẹdogbedevomẹ, yin zinzinjẹgbonu bosọ nọ yin mimá pé. Biblu ko lẹzun owe he yin lilẹdogbedevomẹ bosọ yin mimá lẹdo aihọn pé hugan. Lẹdogbedevomẹ Biblu tọn he azọnwhé ajọwiwa tọn lẹ nọ detọ́n lẹ nọ vẹahi taun to whedelẹnu. Sọn ojlẹ dindẹn die, omẹ Jehovah tọn lẹ ko basi lẹdogbedevomẹ Ohó Jiwheyẹwhe tọn blebu kavi apadewhe etọn tọn do ogbè 240 linlán mẹ, podọ mẹdepope wẹ gán mọ vọkan etọn yí vọnu. Ehe zọ́n bọ gbẹtọ lẹ sọn akọta lẹpo mẹ to alọkẹyi “wẹndagbe Ahọluduta lọ tọn” whẹpo opodo nido wá. (Mat. 24:14) Jiwheyẹwhe mítọn he yiwanna whẹdida dodo ko na dotẹnmẹ gbẹtọ susu dile e gán yọnbasi do nado yọ́n ewọ gbọn Ohó etọn hihia gblamẹ. Ehe yinmọ, na e yiwanna mímẹpo taun wutu.

BIBLU NỌ DO OWANYI JIWHEYẸWHE TỌN HIA

13. Naegbọn mí gán dọ dọ Biblu nọ do owanyi Jehovah tọn hia? (Johanu 21:25)

¹³ Biblu gọalọna mí nado mọnukunnujẹemẹ dọ jẹhẹnu daho hugan Dowatọ etọn tọn wẹ owanyi. (1 Joh. 4:8) Lẹnnupọndo nuhe Jehovah dike bọ Biblu bẹhẹn po dehe ewọ jodo lẹ po ji. E wleawu nuhe sin hudo mí do pẹẹ nado jihọntọn hẹ ẹ bo zan gbẹzan ayajẹnọ todin podọ nado mọ ogbẹ̀ madopodo lẹ tọn na mí. Amọ́, na Jehovah yiwanna mí wutu, e ma yí nudọnamẹ he mí ma do hudo yetọn lẹ do doagbàn kọ̀ji na mí.—Hia Johanu 21:25.

14. Aliho devo tẹ mẹ wẹ nuhe Biblu bẹhẹn lẹ do owanyi Jiwheyẹwhe tọn hia te?

¹⁴ Jehovah sọ nọ do owanyi hia mí, na e nọ dọhona mí to aliho he nọ doyẹyigona mí mẹ. To Biblu mẹ, e ma na mí todohukanji osẹ́n lẹ tọn, he nọ slẹ nuhe mí dona wà kavi ma dona wà to gbẹzan mítọn mẹ lẹpo na mí. Kakatimọ, e yí otàn jọnun gbẹzan tọn lẹ, dọdai ojlofọndotenamẹ tọn lẹ po ayinamẹ dagbe lẹ po zan nado gọalọna mí nado basi nudide dagbe lẹ. Gbọnmọ dali, Ohó Jiwheyẹwhe tọn nọ whàn mí nado yiwanna ewọ bosọ setonuna ẹn sọn ahun mẹ wá.

15. (a) Nawẹ Jehovah ko dohia dọ emi nọ tindo ojlo to mẹhe nọ hia Ohó emitọn lẹ mẹ gbọn? (b) Sọgbe hẹ yẹdide lọ, mẹhe go Biblu donù tẹlẹ ji wẹ viyọnnu pẹvi lọ, mẹmẹsunnu jọja lọ po mẹmẹyọnnu mẹhomẹ lọ po to ayihamẹlẹnpọn do? (Jen. 39:1, 10-12; 2 Ahọ. 5:1-3; Luku 2:25-38)

¹⁵ Biblu dohia dọ Jehovah nọ tindo ojlo vẹkuvẹku to mí mẹ. Gbọnna? Kandai he do numọtolanmẹ gbẹtọvi tọn hia lẹ susu wẹ to Ohó etọn mẹ. Mí gán mọnukunnujẹ mẹhe go Biblu donù lẹ mẹ, na yé yin gbẹtọ “he tindo numọtolanmẹ taidi mítọn lẹ nkọ” wutu. (Jak. 5:17) Hú popolẹpo, eyin mí lẹnnupọndo lehe e yinuwa hẹ gbẹtọ taidi míwlẹ do ji, mí gán mọnukunnujẹemẹ hezeheze dọ “Jehovah tindo owanyi sisosiso bosọ yin lẹblanunọ.”—Jak. 5:11.

16. Etẹwẹ mí nọ plọn gando Jehovah go eyin mí hianu gando mẹhe ṣinuwa to Biblu mẹ lẹ go? (Isaia 55:7)

¹⁶ Biblu nọ do owanyi he Jehovah do na mí hia to aliho devo mẹ. Owe-wiwe lẹ hẹn mí deji dọ Jiwheyẹwhe mítọn ma na gbẹ́ mí dai whenue mí ṣinuwa. Islaelivi lẹ waylando sọta Jehovah de-to-deji; etomọṣo whenue yé lẹnvọjọ sọn ahun mẹ wá, Jiwheyẹwhe jona yé. (Hia Isaia 55:7.) Klistiani owhe kanweko tintan tọn lẹ lọsu yọnẹn dọ Jiwheyẹwhe yiwanna emi. To gbọdo glọ, apọsteli Paulu dotuhomẹna Klistiani hatọ lẹ nado ‘jona bosọ miọnhomẹna’ dawe de he zindonukọn to ylanwiwa sinsinyẹn de mẹ, amọ́ bo lẹnvọjọ. (2 Kọl. 2:6, 7; 1 Kọl. 5:1-5) Lehe e jẹna ayidego do sọ dọ Jehovah ma nọ gbẹ́ sinsẹ̀n-basitọ etọn lẹ dai na yé danbú poun wutu! Kakatimọ, e nọ desọn owanyi mẹ bo nọ gọalọna yé, nọ domẹplọnlọ yé go, bosọ nọ basi oylọna yé nado lẹkọwa awà etọn lẹ glọ. E dopà nado wà nudopolọ na ylanwatọ he lẹnvọjọ to egbehe lẹpo.—Jak. 4:8-10.

NỌ YỌ́N PINPẸN “NUNINA DAGBE” HE JIWHEYẸWHE NA MÍ TỌN

17. Naegbọn Biblu do yin nunina he jẹna ayidego de sọmọ?

¹⁷ Jehovah ko na mí nunina dagbedagbe de. Naegbọn Ohó etọn do jẹna ayidego sọmọ? Dile mí plọn do, Biblu do nuyọnẹn Jiwheyẹwhe tọn, whẹdida dodo etọn po owanyi etọn po hia. Owe ehe dohia dọ Jehovah jlo dọ mí ni wá yọ́n emi. E jlo dọ mí ni lẹzun họntọn emitọn lẹ.

18. Nawẹ mí gán dohia Jehovah gbọn dọ mí yọ́n pinpẹn “nunina dagbe” Ohó etọn he yin Biblu tọn?

¹⁸ Mí ma dona wọnji dọ “nunina dagbe” de wẹ Ohó Jiwheyẹwhe tọn yin. (Jak. 1:17) Enẹwutu, mì gbọ mí ni zindonukọn nado nọ dohia dọ mí yọ́n pinpẹn etọn. Mí gán wàmọ eyin mí nọ hodẹ̀ bo nọ hia ohó wiwe he to Biblu mẹ lẹ bosọ nọ lẹnayihamẹpọn do yé ji. Dile mí to mọwà, mí gán kudeji dọ Dowatọ daho etọn na dona vivẹnudido mítọn, podọ mí “nasọ mọ oyọnẹn Jiwheyẹwhe tọn.”—Howh. 2:5.