Nuhewutu Yẹwhenọ de Do Jo Ṣọṣi Etọn Do

Jaale, dọhona mí gando ovu whenu towe go.

N’yin jiji to Italie to 1943. N’whẹ́n to gbétatò pẹvi de mẹ to pọmẹ hẹ mẹdaho ṣie lẹ po nọvi ṣie lẹ po, bọ otọ́ ṣie yin glesi podọ whlẹpatọ de. Mẹjitọ mítọn lẹ plọn mí nado yin sinsẹ̀nvi Katoliki tọn zohunhunnọ lẹ.

Naegbọn a do jlo na lẹzun yẹwhenọ?

Dee n’to pẹvi, n’nọ tẹ́tó ganji nado sè nue dọ yẹwhenọ lẹ te to ṣọṣi mẹ. Ogbè yetọn nọ yọ́nsè na mi taun, bọ aṣa sinsẹ̀n-bibasi tọn he yé nọ hodo lẹ sọ nọ dọ̀n mi. Enẹwutu wẹ n’magbe to ahun ṣie mẹ nado lẹzun yẹwhenọ ga. Whenue n’do owhe 13, onọ̀ ṣie ze mi do wehọmẹ de he nọ hẹn jọja sunnu lẹ bo nọ na yé adọtẹn po núdùdù po, gọna azọ́nplọnmẹ he yinukọn lẹ, na yé nido sọgan wá lẹzun yẹwhenọ.

Be yè plọn we Biblu to azọ́nplọnmẹ lọ whenu ya?

Paali. Whenue n’do owhe 15, dopo to mẹplọntọ ṣie lẹ mẹ na mi vọkan Owe Wẹndagbe tọn lẹ tọn de—he bẹ otàn gbẹzan Jesu tọn po lizọnyizọn etọn po tọn hẹn—podọ n’hia owe enẹ whlasusu. Whenue n’do owhe 18, n’yì Rome nado plọnwe to wehọmẹ alavọ tọn yẹwhenọ lẹ tọn he to anademẹ Papa Rome tọn lọ tọn glọ tlọlọ. To finẹ, n’plọn Latin-gbè, Glẹkigbe, whenuho, tamẹnuplọnmẹ, aliho nuyiwa po nulẹnpọn tọn gbẹtọvi tọn po, gọna sinsẹ̀n-nuplọnmẹ lẹ. Nugbo wẹ dọ mí nọ hia wefọ Biblu tọn lẹ sọn tamẹ, bosọ nọ dotó Biblu hihia to yẹwhehodidọ Sẹgbe tọn lẹ whenu, amọ́ nado dọ hójọhó, mí ma nọ gbadopọnna Biblu.

A wá lẹzun ogán wehọmẹ yẹwhenọ lẹ tọn de tọn. Be a sọ nọ plọnnumẹ to whenẹnu ga wẹ ya?

Anadidena nulẹ ji wẹ azọ́ndenamẹ ṣie sinai do hugan. Amọ́, n’sọ nọ plọnnumẹ to klasi lẹ gando osẹ́ndoai Pipli Vatican Tọn Awetọ tọn lẹ go.

Etẹwẹ zọ́n bọ a do jẹ ayihaawe do ji gando ṣọṣi lọ go?

Onú atọ̀n delẹ wẹ dotukla mi. Sinsẹ̀n lọ nọ donù tonudidọ hó mẹ. Yẹwhenọ lẹ po sinsẹ̀nvi yetọn lẹ po nọ zan walọ gblezọn lẹ, bọ yè ma nọ gbẹnuna yé. Podọ, nuplọnmẹ sinsẹ̀n Katoliki tọn delẹ ma sọgbe to nukun ṣie mẹ. Di apajlẹ, nawẹ Jiwheyẹwhe owanyinọ de na to yasana gbẹtọ lẹ kakadoi to okú yetọn godo gbọn? Humọ, be Jiwheyẹwhe jlo nugbonugbo dọ mí ni nọ dọ dọvọdọ odẹ̀ dopolọ tọn whla kanweko susu lẹ po ojẹ́ he go satin te de po ya?a

Bọ nawẹ a wá yinuwa do?

Po dasin po ṣlẹṣlẹ wẹ n’hodẹ̀ hlan Jiwheyẹwhe bo biọ anademẹ etọn. N’sọ họ̀ vọkan Biblu Katoliki tọn La Bible de Jérusalem dopo, he ṣẹṣẹ yin zinzinjẹgbonu do Italie-gbè mẹ to ojlẹ lọ mẹ, podọ n’jẹ hihia ẹ ji. To ojlẹ de godo, to Sẹgbe afọnnu dopo he amisa fó, bọ n’de awù yẹwhenọ tọn ṣie bo to pipla ẹ do núgo, wẹ dawe awe delẹ wá opá yẹwhenọ lẹ tọn lọ mẹ. Yé dọna mi dọ Kunnudetọ Jehovah tọn lẹ wẹ emi. Mí dọhodo Biblu ji na gànhiho dopo linlán, bo gbadopọnna ohia voovo he Biblu dọ dọ yè na nọ yí do yọ́n sinsẹ̀n nugbo lọ.

Etẹwẹ yinuwado ji we hugan to dawe awe lọ lẹ sin hó mẹ?

N’yiwanna nujikudo yetọn gọna lehe yé nọ voawu do eyin yé to wefọ lẹ slẹ sọn Biblu he sinsẹ̀n Katoliki tọn zinjẹgbonu de mẹ. To nukọn mẹ, Kunnudetọ devo he nọ yin Mario wá jẹ dè e wá ji. E nọ fahomẹ bosọ nọ dọ nugbo—na to Sibigbe afọnnu lẹpo, jikun ja wẹo kavi owhè hùn, e nọ zín ogàn họngbo ji tọn opá yẹwhenọ lẹ tọn lọ tọn to ogàn 9 mẹ pẹpẹ.

Etẹwẹ yẹwhenọ he pò lẹ lẹn gando hodọdopọ towe hẹ Kunnudetọ lẹ go?

N’nọ ylọ yé nado wá hodọdopọ mítọn lẹ tẹnmẹ, ṣigba ode yetọn ma nọ ylọ Biblu pinplọn dọ nujọnu. Amọ́ na yẹn tọn, n’mọaleyi sọn e mẹ. Nuhe plọn n’te lẹ fọnjlodotena mi taun, di apajlẹ n’mọnukunnujẹ nuhewutu Jiwheyẹwhe do jotẹnna ylanwiwa po yajiji po mẹ—yèdọ whẹho de he doglẹ na mi dai na owhe susu.

Be ogán daho he to nukọnna we lẹ tẹnpọn nado diọlinlẹnna we na a nido jo Biblu pinplọn do wẹ ya?

To 1975, whlasusu wẹ yì Rome nado yì hẹn nue lẹn n’te lẹ họnwun na yé. Ogán daho he to nukọnna mi lẹ tẹnpọn nado diọlinlẹnna mi, amọ́ depope to yé mẹ ma tlẹ yí Biblu zan. To godo mẹ, to 9 janvier 1976, n’kanwehlan Rome bo dọ dọ n’masọ yin hagbẹ sinsẹ̀n Katoliki tọn de ba. To azán awe godo, n’tọ́n sọn opá yẹwhenọ lẹ tọn lọ mẹ bo do pinpán nado yì opli Kunnudetọ Jehovah tọn lẹ tọn de whla tintan, bọ e sọ wá yindọ plidopọ de wẹ, ehe agun voovo lẹ wá. Tito lọ blebu wẹ gbọnvo pete na nuhe n’ko jẹakọ hẹ dai! Kunnudetọ dopodopo wẹ tindo Biblu etọn bo nọ hùn in nado hodo hodọtọ lẹ dile yé to hodọdo hosọ voovo lẹ ji.

Etẹwẹ whẹndo towe lẹn gando diọdo ehe lẹpo go?

Suhugan yetọn wẹ diọnukunsọ mi sinsinyẹn. Amọ́, n’wá sè dọ dopo to nọvisunnu ṣie lẹ mẹ to nuplọn hẹ Kunnudetọ lẹ to Lombardie, to agewaji Italie tọn. N’yì e dè to dọ́n nado pọ́n ẹn, bọ Kunnudetọ hatọ he to finẹ lẹ gọalọna mí nado mọ agbasazọ́n de po adọtẹn de po. To owhe enẹ dopolọ mẹ, n’wá yí baptẹm bo lẹzun dopo to Kunnudetọ Jehovah tọn lẹ mẹ.

Be nude vẹna we to ehe lẹpo mẹ ya?

Nudepope ma vẹna mi! Todin, n’nọ mọdọ n’do haṣinṣan nujọnu tọn de hẹ Jiwheyẹwhe, na nuhe n’yọnẹn gandego din lẹ wá sọn Biblu mẹ, bo ma yin tamẹnuplọnmẹ kavi aṣa ṣọṣi de tọn lẹ poun. Humọ, yẹnsu sọgan yí nujikudo po ahundopo po do plọnnu mẹdevo lẹ.