Lilatọ Ahọluduta Tọn lẹ Na Linlin
“Yẹn Jlo Nado Sẹ̀n Jiwheyẹwhe”
“MÌ TỌ́N sọn e mẹ, mì omẹ ṣie emi.” Oylọ basinamẹ angẹli de tọn wẹ enẹ yin he apọsteli Johanu sè to owhe kanweko tintan W.M. To egbehe, omẹ ahunjijlọnọ livi susu wẹ ko yigbe bo ko họ̀n sọn “Babilọni daho,” heyin ahọluigba aihọn sinsẹ̀n lalo tọn mẹ. (Osọhia 18:1-4) Wilner he wá sọn Haïti, he dọ numimọ ehe yin dopo to yé mẹ.
“Yẹn yin jiji to 1956 do whẹndo Katoliki mẹdezejotọ tọn de mẹ to tòpẹvi St. Marc tọn mẹ, to Haïti. Yí nukun homẹ tọn do pọ́n lehe ayajẹ whẹndo ṣie tọn sù sọ to whenuena yẹn yin dide, gọna omẹ awe devo lẹ sọn tòpẹvi mítọn mẹ, nado yì wehọmẹ sinsẹ̀n-nuplọnmẹ tọn de to St. Michel de l’Atalaye, to Haïti. Enẹgodo, to 1980, mí yin didohlan Stavelot, to Belgique, na nuplọnmẹ dogọ. Mí sọ yì wehọmẹ alavọ Katoliki tọn de to finẹ ga.
“Yẹn tin to jejeji nado lẹzun yẹwhenọ de to tintan whenu. To gbèdopo to núdùdù whèmẹ tọn whenu, yẹwhenọ he to anadena pipli mítọn biọ dọ yẹn ni nọte na nukunwhiwhe kleun delẹ na e tindo nude nado dọna mi wutu. Lẹnnupọndo lehe yẹn jọsi sọ ji to whenuena e dọna mi tlọlọ dọ emi tindo ojlo kọndopọ zanhẹmẹ tọn to yẹn mẹ! Yẹn gbẹ́ obiọ etọn lẹ dai ṣigba jẹflumẹ taun. Yẹn wlanwe hlan whẹndo ṣie gando nujijọ lọ go bosọ tọ́nsọn wehọmẹ sinsẹ̀n-nuplọnmẹ tọn lọ mẹ to osun vude godo, dile e ma tlẹ hẹn homẹhun yé sọ. Yẹn mọ adọtẹn to gbetatò lọ mẹ bosọ doafọna wepinplọn ṣie to azọ́n devo mẹ.
“To kọlilẹ wá St. Marc godo, yẹn masọ tindo jidide depope to Ṣọṣi Katoliki tọn mẹ ba. Yẹn jlo nado sẹ̀n Jiwheyẹwhe, ṣigba yẹn ma yọ́n nuhe yẹn dona wà. Yẹn yì ṣọṣi adventiste tọn, ṣọṣi Ebenezer tọn, po ṣọṣi Mormone tọn po. Yẹn ko buali to gbigbọ-liho taun.
“Enẹgodo yẹn flin dọ yẹn nọ hia Biblu Crampon tọn to whenuena yẹn to wehọmẹ sinsẹ̀n-nuplọnmẹ tọn yì to Belgique. Yẹn mọ to e mẹ dọ Jiwheyẹwhe tindo yinkọ de. Enẹwutu, to yinkọ etọn yiyizan mẹ, yẹn hodẹ̀ vẹkuvẹku hlan Jiwheyẹwhe dọ e ni gọalọna mi nado mọ sinsẹ̀n nugbo lọ.
“To madẹnmẹ to enẹgodo, Kunnudetọ Jehovah tọn awe sẹtẹn wá lẹdo ṣie mẹ. Gbẹtọ abọẹabọẹ, he nọ namẹ sisi, bo nọ doyẹyigonamẹ wẹ yé yin. Aliho gbẹzan yetọn tọn yinuwado ji e tlala. To gbèdopo, dopo to Kunnudetọ awe lọ lẹ mẹ ylọ mi nado yì Oflin whemẹwhemẹ okú Klisti tọn. Yẹn duvivi opli lọ tọn taun bosọ yigbe na plọnmẹ Biblu gbesisọ tọn de hẹ Kunnudetọ lọ lẹ. To nudi osun ṣidopo gblamẹ, yẹn yin dududeji dọ yẹn ko mọ aliho he sọgbe nado sẹ̀n Jiwheyẹwhe lọ. Yẹn klan gbẹzan ṣie do wiwe hlan Jehovah bosọ yin bibaptizi to 20 novembre 1988.”
To madẹnmẹ, Wilner biọ sinsẹ̀nzọn whenu-gigọ́ tọn mẹ. To egbehe, e to devizọnwa taidi mẹho agun tọn de. Ewọ po asi etọn po, gọna ovi awe yetọn lẹ, to devizọnwa po ayajẹ po to agun lọ mẹ.
[Yẹdide to weda 9]
Gbọn Biblu hihia dali,Wilner mọdọ Jehovah wẹ yinkọ Jiwheyẹwhe tọn nọ yin