Jonamẹ

“TO WHENUE N’TO PẸVI, YÈ NỌ SABA ZUNMẸ BO NỌ DAWHÁ TO WHẸNDO ṢIE MẸ,” wẹ nawe de he nọ yin Patricia dọ. “N’ma plọn nado nọ jonamẹ. Dile n’tlẹ whẹ́n, n’gbẹ́ nọ ze ayiha do nuhe yè ṣiwà do mi lẹ ji na azán susu bo nọ ba amlọn pò.” Mọwẹ, homẹgble po mẹhẹndohomẹ po ma nọ hẹn ayajẹ wá, mọ yé masọ nọ wà dagbe na agbasa. Na nugbo tọn, dodinnanu lẹ dohia dọ mẹhe nọ hẹnmẹdohomẹ sọgan nọ . . .

• Natẹn homẹgble kavi fifiẹ bọ ehe nọ hẹn haṣinṣan lẹ gble bo nọ hẹn ṣokẹdẹninọ wá

• Yawu gblehomẹ, tindo magbọjẹ, bo tlẹ nọ jẹflumẹ sinsinyẹn

• Ze ayiha do nuṣiwa ji sọmọ bo ma nọ tindo ayajẹ to gbẹ̀mẹ

• Mọdọ emi masọ to nujinọtedo gbigbọmẹ tọn lẹ hodo ba

• Saba mọ apọ̀ bo nọ yawu jẹazọ̀n, ehe bẹ ahun-zọ̀n, agbasa-vivẹ́, húdu-húdu po tadu po hẹna

ETẸWẸ JONAMẸ ZẸẸMẸDO? E zẹẹmẹdo nado wọnji nuṣiwa mẹde tọn go bo jo homẹgble, mẹhẹndohomẹ po linlẹn ahọsuyiyi tọn lẹ po do. E ma zẹẹmẹdo nado miọnnukundo ylando, dovọ́na ẹn kavi yinuwa taidi dọ e ma jọ nkọ. Kakatimọ, jonamẹ yin nudide mẹdetiti tọn he yè lẹnnupọn ganji whẹpo do basi, ehe nọ do gbemima owanyi tọn lọ hia nado wleawuna jijọho kavi nado hẹn haṣinṣan dagbe go hẹ ode awetọ.

Jonamẹ sọ nọ do nukunnumọjẹnumẹ hia. Mẹhe nọ jonamẹ nọ mọnukunnujẹemẹ dọ mímẹpo wẹ nọ ṣinuwa kavi waylando to ohó mẹ podọ to walọ mẹ. (Lomunu lẹ 3:23) Biblu do oyọnẹn mọnkọtọn hia to whenue e dọmọ: “Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po.”—Kolosinu lẹ 3:13.

Enẹwutu, jonamẹ yin adà titengbe owanyi tọn, ehe yin “gẹdẹ he nọ kọ̀n gbẹtọ lẹ dopọ to aliho pipé de mẹ.” (Kolosinu lẹ 3:14) Na nugbo tọn, sọgbe hẹ nọtẹn Intẹnẹt tọn clinique Mayo tọn, jonamẹ nọ . . .

• Yidogọna haṣinṣan dagbe, ehe nọ bẹ awuvẹmẹ, nukunnumọjẹnumẹ po lẹblanu didohia mẹhe ṣinuwa lọ po hẹn

• Yidogọna dagbemẹninọ to apọ̀nmẹ podọ to gbigbọ-liho

• De nuhiha, flumẹjijẹ gọna kanyinylan pò

• De ayimajai pò

NỌ JONA DEWE. Linlinwe de dọ dọ jijona mẹdetiti sọgan yin “nuhe vẹawu hugan nado wà,” amọ́ “ehe nọ wà dagbe namẹ taun”—to apọ̀nmẹ podọ to agbasa-liho. (Disability & Rehabilitation) Etẹwẹ sọgan gọalọna we nado nọ jona dewe?

• Ma nọ donukun pipé-yinyin sọn dewe si blo, amọ́ nọ gbọn whiwhẹ dali kẹalọyi dọ, taidi mẹhe pò lẹ, hiẹ lọsu na nọ ṣinuwa.—Yẹwhehodọtọ 7:20

• Nọ plọnnu sọn nuṣiwa towe lẹ mẹ ma nado vọ́ nudopolọ lẹ ṣiwà

• Nọ fahomẹ hẹ dewe; awugbopo mẹdetiti tọn po walọyizan delẹ po ma nọ busẹ to zánto dopo mẹ.—Efesunu lẹ 4:23, 24

• Nọ jihọntọn hẹ mẹhe na na we tuli lẹ, mẹhe nọ tindo pọndohlan dagbe bo jọmẹ bo nasọ nọ dọ nugbo na we lẹ.—Howhinwhẹn lẹ 13:20

• Eyin a ṣinuwa do mẹde, nọ yigbe bo nọ yawu vẹvẹ. Eyin a nọ dín jijọho hẹ mẹdevo lẹ, a na tindo jijọho ahun mẹ tọn.—Matiu 5:23, 24

ANADEMẸ BIBLU TỌN LẸ NỌ GỌALỌ TAUN!

To Biblu pinplọn godo, Patricia he yin nùdego to bẹjẹeji wá plọn nado nọ jonamẹ. “N’wá mọdọ n’yin tuntundote sọn homẹgble he nọ dotukla mi dai lọ si,” wẹ e wlan. “N’masọ nọ mọ awufiẹsa ba podọ n’masọ nọ hẹn awufiẹsa wá na mẹdevo lẹ. Anademẹ Biblu tọn lẹ dohia nugbo dọ Jiwheyẹwhe yiwanna mí bo nọ jlo nuhe yin dagbe na mí.”

Dawe de he nọ yin Ron dọmọ: “N’ma gán deanana linlẹn po nuyiwa mẹdevo lẹ tọn po. Amọ́ n’gán deanana ṣie titi lẹ. Eyin n’jlo na tindo jijọho, n’ma dona nọ hẹnmẹdohomẹ. N’wá mọdọ jijọho po mẹhẹndohomẹ po jẹagọdo yede taun. N’ma gán to jijọho dín bosọ nọ hẹnmẹdohomẹ to ojlẹ dopolọ mẹ. Todin, n’tindo ayihadawhẹnamẹnu dagbe.”