1 Nugbonọ-yinyin

NUHE E ZẸẸMẸDO

Asu po asi po he yin nugbonọ lẹ nọ pọ́n alọwle yetọn di kọndopọ tẹgbẹ tọn de, bọ ehe nọ zọ́n bọ yé nọ dejido yedelẹ go. Yé nọ deji dọ dopodopo yetọn na yin nugbonọ na opà yetọn eyin nuhahun lẹ tlẹ fọ́n.

Asu po asi po delẹ nọ mọdọ emi dona gbọṣi pọ́, na nuhe hagbẹ kavi hẹnnumẹ lẹ na dọ wutu. Amọ́, nuhe nọ pọnte hugan wẹ nado gbọṣi pọ́, na opà he yé ko do nado yiwanna bo na sisi ode awetọ wutu.

AYINAMẸ BIBLU TỌN: “Asu ni ma jo asi etọn do blo.”​—1 Kọlintinu lẹ 7:11.

“Eyin a magbe nado yin nugbonọ to alọwle towe mẹ, a ma na nọ yawu gblehomẹ. A na nọ yawu jonamẹ bo nọ vẹvẹ. A na nọ mọ nuhahun lẹ di nuhe ji yè sọgan dù te, e ma yin whẹwhinwhẹ́n de na gbẹdai.”​—Sunnu de he nọ yin Micah.

NUHEWUTU E YIN NUJỌNU

Eyin nuhahun lẹ fọ́n, asu po asi po he ma magbe nado yin nugbonọ lẹ nọ saba dọ dọ, ‘Mí ma jẹ hẹ míde’ bo nọ dín aliho lẹ nado deta sọn e mẹ.

“Mẹsusu wẹ nọ wlealọ po linlẹn lọ po dọ eyin nulẹ ma wá yì ganji, yé na gbẹ́ yede. Eyin yé ko tindo linlẹn enẹ whẹpo do wlealọ, be yé ma ko magbe sọn bẹjẹeji nado yin nugbonọ niyẹn.”​—Yọnnu de he nọ yin Jean.

NUHE A SỌGAN WÀ

KANSE DEWE

To whenue mí to jlẹdọ . . .

• Be e nọ vẹna mi dọ omẹ enẹ wẹ n’dà wẹ ya?

• Be n’nọ to nulẹnpọn do mẹdevo he n’gán wá nọpọ́ hẹ ji wẹ ya?

• Be n’nọ zan hogbe delẹ di, “N’na jo we do” kavi “N’na dín mẹdevo he na wlebòna mi” wẹ ya?

Eyin a dọ mọwẹ na dopo tata to kanbiọ enẹlẹ mẹ, yawu vọ́ gbè má dogọ nado yin nugbonọ.

DỌHODOPỌ HẸ AWETỌ TOWE

• Be gbemima mítọn nado yin nugbonọ na opà mítọn ko depò wẹ ya? Eyin mọ wẹ, etẹwutu?

• Etẹlẹ wẹ mí gán wà todin nado vọ́ gbè má dogọ?

AYINAMẸ DELẸ

• Sọn ojlẹ de mẹ jẹ devo mẹ, nọ dọna alọwlemẹ towe dọ a yiwanna ẹn

• Nọ ze fọto alọwlemẹ towe tọn do tafo towe ji nado dohia dọ a yiwanna ẹn

• Nọ ylọ alọwlemẹ towe to azán lẹpo ji eyin a to azọ́nmẹ kavi a tọ́n

AYINAMẸ BIBLU TỌN: “Nuhe Jiwheyẹwhe ko kọndopọ, mì dike mẹde klan ẹn blo.”​—Matiu 19:6.