Lehe Yè Nọ Plọn Akọndonanu Do

ETẸWẸ AKỌNDONANU ZẸẸMẸDO?

Mẹhe nọ doakọnnanu nọ yawu dogodo nuhahun he mẹ e gbọn lẹ. Nuhahun lẹ mẹ gbingbọn wẹ nọ gọalọnamẹ nado wleawuna ehe. Kẹdẹdile ovi de he to zọnlin plọn na nọ jai sọn ojlẹ de mẹ jẹ devo mẹ do, mọdopolọ e ma gán plọn akọndonanu eyin nuhahun lẹ ma nọ fọ́n.

NAEGBỌN AKỌNDONANU DO YIN NUJỌNU?

Ovi delẹ ma nọ jlo na dovivẹnu ba eyin nulẹ ma yì ganji, kavi eyin mẹde gbẹnuna yé. Ovi devo lẹ nọ hònúpla pete. Amọ́, yé dona yọ́n nugbo gbẹ̀mẹ tọn ehelẹ:

• Nulẹ ma gán yì tlélé to whelẹponu.​—Jakọbu 3:2.

• Mẹlẹpo wẹ nọ wá pehẹ nuhahun lẹ to gbẹ̀mẹ.​—Yẹwhehodọtọ 9:11.

• A ma gán plọnnu eyin mẹde ma nọ gbẹnuna we.​—Howhinwhẹn lẹ 9:9.

Akọndonanu wẹ na gọalọna ovi towe nado yí adọgbigbo do pehẹ nuhahun gbẹ̀mẹ tọn lẹ.

LEHE A GÁN PLỌN AKỌNDONANU OVI TOWE DO

Eyin ovi towe wà nude bọ e ma pà ẹ.

AYINAMẸ BIBLU TỌN: “Dodonọ sọgan jai whla ṣinawe bo na vọ́ fọnṣite.”—Howhinwhẹn lẹ 24:16.

Gọalọna ovi towe nado yọnẹn eyin nuhahun lọ sinyẹn kavi lala. Di apajlẹ, etẹwẹ e na wà eyin e jai to mẹtẹnpọn wehọmẹ tọn de mẹ? E gán hònúpla bo dọ, “Ota ṣie ma sewé!”

Nado plọn akọndonanu ovi towe, gọalọna ẹn nado kàn ayiha de he na zọ́n bọ e na duto e ji to whedevonu. Enẹ na zọ́n bọ kakati e na hònúpla, e na tẹnpọn nado duto nuhahun lọ ji.

Amọ́, ma nọ dọ pọngbọ lọ na ovi towe tlọlọ blo. Kakatimọ, gọalọna ẹn nado kàn ayiha de na ede. A gán kanse e dọ, “Etẹwẹ a gán wà nado nọ mọnukunnujẹ nuhe plọn a te to wehọmẹ lẹ mẹ ganji?”

Eyin nuylankan de jọ.

AYINAMẸ BIBLU TỌN: “Mì ma yọ́n nuhe ogbẹ̀ mìtọn na yin to osọ.”​—Jakọbu 4:14.

Ogbẹ̀ ma do jide. Mẹhe yin adọkunnọ to egbé gán wá jẹhẹ́n to osọ he ja; mẹhe to ganji to agbasa mẹ to egbé gán bẹ azọ̀n to osọ he ja. “E ma yin awuyatọ lẹ wẹ nọ duto wezundido ji to whepoponu, kavi huhlọnnọ lẹ to avùn ji,” wẹ Biblu dọ, “na yemẹpo ji wẹ ojlẹ po kosọ po nọ wá.”—Yẹwhehodọtọ 9:11.

Taidi mẹjitọ, a nọ wà nuhe go a pé lẹpo nado họ́ ovi towe sọn nuylankan lẹ mẹ. Amọ́, e ma nọ yọnbasi nado họ́ ovi lẹ sọn nuylankan lẹpo mẹ to gbẹ̀mẹ.

Nugbo wẹ dọ ovi towe sọgan nọma ko whẹ́n sọmọ nado yọ́n nuhe e zẹẹmẹdo eyin azọ́n gbledo mẹ kavi eyin yè biọ nuhahun akuẹzinzan tọn mẹ. Amọ́, a gán gọalọna ẹn nado yọ́n lehe e na doakọnna do eyin ewọ po họntọn de po gble kavi eyin mẹvivẹ mìtọn de kú.a

Eyin mẹde gbẹnuna ovi towe.

AYINAMẸ BIBLU TỌN: “Nọ dotoaina ayinamẹ . . . na hiẹ nido yọnnuin to sọgodo.”—Howhinwhẹn lẹ 19:20.

Mẹhe gbẹnuna ovi towe ma to nukunvando e; alọgọna ẹn wẹ e te nado vọ́ walọ etọn jlado.

Eyin a plọn ovi towe nado nọ kẹalọyi nugbẹnamẹ mọnkọ lẹ, e na yin dagbe na mìmẹ awe lẹ. “Eyin a ma nọ dike ovi towe lẹ ni vọ́ nuhe yé ṣiwà lẹ jlado gbede,” wẹ otọ́ de he nọ yin John dọ, “yé ma na plọnnu sọn e mẹ gbede. Nuhahun janwẹ yé na nọ to hinhẹnwa mapote bọ hiẹ wẹ na nọ to godona yé bo na nọ to nuhahun lọ lẹ vọjlado. Mẹjitọ lẹ gọna ovi lọ ma na mọ agbọ́ gbede.”

Eyin mẹde gbẹnuna ovi towe, nawẹ a gán gọalọna ẹn gbọn nado kẹalọyi? Vlavo to wehọmẹ wẹ kavi to fidevo, ma nọ mọhodọdo mẹlọ go gbede blo. Kakatimọ, kanse e dọ:

• “Naegbọn yè do gbẹnuna we?”

• “Vọjlado tẹwẹ a gán bayi?”

• “Eyin a pehẹ ninọmẹ dopolọ to whedevonu, etẹwẹ a na wà?”

Flindọ nugbẹnamẹ mọnkọ na wà dagbe na ovi towe todin, podọ to whenue e na whẹ́n.