ALỌGỌ NA WHẸNDO LẸ
Lehe A Gán Gọalọna Ovi Towe Nado Duto Awugbopo Ji Do
E yá wẹo, kavi e dẹn wẹo, ovi towe sọgan gboawupo to nude mẹ bọ ehe na hẹn ẹn jẹflumẹ. Nawẹ a gán gọalọna ẹn gbọn?
Nuhe a dona yọnẹn
Gbẹtọvi lẹpo wẹ nọ gboawupo to nudelẹ mẹ. Biblu dọ dọ “mímẹpo wẹ nọ ṣinuwa.” (Jakọbu 3:2) Yọpọvu lẹ lọsu nọ ṣinuwa ga. Amọ́, awugbopo nado wà nude nọ wà dagbe to whedelẹnu—e nọ gọalọna ovi lẹ nado wleawuna akọndonanu. Ovi lẹ ma nọ yin jiji po nugopipe enẹ po, amọ́ yé gán plọn nado nọ do e hia. “Yẹn po asu ṣie po ko mọdọ nuhe yọ́n hugan wẹ yindọ ovi lẹ ni plọn nado nọ duto awugbopo ji kakati nado nọ yinuwa di dọ nude ma jọ wẹ nkọ,” wẹ onọ̀ de he nọ yin Laura dọ. E yidogọ dọ, “Yé gán plọn nado sinyẹnlin eyin nulẹ ma yì do lee yé jlo do.”
Ovi susu ma nọ penugo nado duto awugbopo ji dile e jẹ do. Ovi delẹ ma nọ yọ́n lehe yè nọ duto awugbopo nado wà nude ji do, na nuyiwa mẹjitọ yetọn lẹ tọn nọ zọ́n bọ yé ma nọ mọdọ emi ṣinuwa. Di apajlẹ, eyin ovi de ma wazọ́n ganji to wehọmẹ, mẹjitọ delẹ nọ dowhẹ mẹplọntọ lọ. Eyin ovi de dọjlẹ hẹ họntọn etọn de, mẹjitọ lẹ nọ dowhẹ họntọn lọ.
Nado dọ hójọhó, nawẹ ovi lẹ na plọn nado nọ kẹalọyi nuṣiwa yetọn gbọn, eyin mẹjitọ lẹ nọ glọnalina yé nado jiya kọdetọn lọ lẹ tọn?
Nuhe a sọgan wà
Plọn ovi towe nado yọnẹn dọ nuhe e nọ wà lẹ nọ hẹn kọdetọn de wá janwẹ.
Biblu dọmọ: “Nudepope he mẹde to dido, enẹ wẹ e na gbẹ̀n ga.”—Galatianu lẹ 6:7.
Nudepope he mí wà nọ hẹn kọdetọn de wá janwẹ. E nọ biọ nude nado vọ́ nuhe yè hẹngble de jlado. Nuṣiwa nọ hẹn kọdetọn ylankan lẹ wá. Ovi lẹ dona yọnẹn dọ nuhe mẹde do wẹ e nọ gbẹ̀n bosọ kẹalọyi dọ yè dona dowhẹ emi na nuṣiwa emitọn. Enẹwutu, ma nọ dowhẹ mẹdevo lẹ kavi dín whẹjijọ na nuṣiwa ovi towe tọn blo. Kakatimọ, dike ewọ ni jiya kọdetọn nuṣiwa etọn tọn sọgbe hẹ owhe etọn. Humọ, ni họnwun na ovi towe ganji dọ nuṣiwa emitọn wẹ hẹn kọdetọn he emi to oyà etọn ji wá.
Gọalọna ovi towe nado nọ dín pọngbọ na nuhahun lẹ.
Nunọwhinnusẹ́n Biblu tọn: “Dodonọ sọgan jai whla ṣinawe bo na vọ́ fọnṣite.”—Howhinwhẹn lẹ 24:16.
Awugbopo nado wà nude nọ hẹn flumẹjijẹ wá, amọ́ enẹ ma dohia dọ yè ma gán sọ wà dagbe. Nọ gọalọna ovi towe nado kàn ayiha bo dín pọngbọ na nuhahun lọ kakati nado to linlẹn dọ nuhe jọ lọ ma sọgbe. Di apajlẹ, eyin ovi towe ma wà azọ́n de ganji to wehọmẹ, gọalọna ẹn nado plọnnu bo magbe nado wazọ́n lọ ganji to whedevonu. (Howhinwhẹn lẹ 20:4) Eyin viyọnnu towe dọjlẹ hẹ họntọn etọn de, gọalọna ẹn nado mọ lehe e sọgan vẹvẹ do nado hẹn ninọmẹ lọ pọnte, mahopọnna mẹhe dinho.—Lomunu lẹ 12:18; 2 Timoti 2:24.
Plọn ovi towe nado wleawuna whiwhẹ.
Nunọwhinnusẹ́n Biblu tọn: “Yẹn dọna mẹhe to mì ṣẹnṣẹn to finẹ lẹpo ma nado nọ lẹn ede tọn glanglan hú lehe e jẹ nado nọ lẹn do.”—Lomunu lẹ 12:3.
E ma sọgbe nado nọ dọna ovi towe dọ ewọ wẹ yọ́n nude wà hugan, podọ e ma na wà dagbe na ẹn. Hú popolẹpo, ovi he tlẹ yọnwe hugan lẹ ma nọ wazọ́n ganji to wehọmẹ to whelẹponu. Podọ e ma yin ovi he yọ́n aihun lanmẹyiya tọn dà hugan lẹ wẹ nọ saba duto agbàwhinwhlẹn de ji. Ovi he do whiwhẹ lẹ nọ saba penugo nado duto awugbopo yetọn ji.
Biblu dohia dọ nuhahun gán na mí huhlọn bo gọalọna mí nado wleawuna akọndonanu. (Jakọbu 1:2-4) Nugbo wẹ dọ awugbopo nado wà nude nọ hẹn flumẹjijẹ wá, amọ́ a gán gọalọna ovi towe ma nado dike enẹ ni hẹn ẹn gbọjọ.
Nude pinplọn nọ biọ whenu po vivẹnudido po, nudopolọ wẹ e nọ biọ nado plọn akọndonanu ovi lẹ. Amọ́, e nọ wá wà dagbe na yé to owhe aflanmẹ tọn lẹ gblamẹ. “Jọja aflanmẹ he ko plọn nado nọ duto nuhahun yetọn lẹ ji lẹ ma nọ saba wà nuylankan kavi nulunu to whenue yé wá to ninọmẹ sinsinyẹn lẹ mẹ. Yé nọ saba basi nudide dagbe to ninọmẹ yọyọ po madonukun lẹ po mẹ,” wẹ owe de dọ. (Letting Go With Love and Confidence.) Nado dọ hójọhó, yé nọ duale akọndonanu tọn kaka biọ mẹhowhe mẹ.
Ayinamẹ: Ze apajlẹ dai. Flindọ, lehe a nọ yinuwa do eyin a jẹflumẹ na plọnazọ́n ovi towe nado yọ́n lehe e na nọ yinuwa do eyin e wá jẹflumẹ.