2. Be Mílọsu Go Wẹ Oyà Mítọn Sọn Ya?

Nuhewutu Mí Dona Yọ́n Gblọndo Lọ

Na eyin mílọsu go wẹ e sọn, be mí gán de yajiji pò.

Lẹnnupọndo Ehe Ji

Naegbọn mí gán dọ dọ gbẹtọvi lẹ lọsu nọ hẹn yajiji wá?

• 

  Danuwadomẹgo.

  Titobasinanu de dohia dọ omẹ 1 to 4 ji wẹ yè nọ wadanu do to pẹvi bọ yọnnu 1 to 3 ji wẹ yè nọ wà okà do kavi tẹnpọn nado dohó hẹ po huhlọn po.—Organisation mondiale de la santé.

• 

  Aluẹmẹninọ.

  Linlinwe 2018 tọn de dọ dọ: “Nudi gbẹtọ 477 000 wẹ yin hùhù lẹdo aihọn pé to 2016.” (Organisation mondiale de la santé) Sọha ehe sọ to ovò na omẹ 180 000 he linlin lẹ dohia dọ yé yin hùhù to awhàn po hunyanhunyan lẹ po whenu to owhe enẹ mẹ.

• 

  Awutu.

  Wekantọ Fran Smith dọ to owe de mẹ dọ: “Gbẹtọ liva dopo linlán wẹ nọ nù azọ̀, podọ taba-nùnù nọ domẹ azọ̀n atọ́n he nọ yawu hẹn okú wá lẹ, enẹ wẹ: ahun-zọ̀n, asaku-awàku, azọ̀n he nọ bẹpla gbigbọ-kàn lẹ, afuje-zọ̀n he sinyẹn po kansẹẹ afuje tọn po.”—National Geographic.

• 

  Ohẹ́n.

  Dotozọ́nwatọ Jay Watts dọ dọ: “Ohẹ́n, nuyiwahẹmẹ agọ̀, akọ̀-ṣinṣinyan, vọdona yọnnu lẹ po agbàwhinwhlẹn po nọ hẹn mẹsusu biọ lẹnpọn mẹ.”

  DINDONA DOGỌ

  Pọ́n video lọ Naegbọn Jiwheyẹwhe Do Dá Aigba? to jw.org ji.

Nuhe Biblu Dọ

Suhugan oyà he mí nọ ji to egbehe lẹ tọn nọ sọn gbẹtọvi lẹ go.

Gandudu he nọ paṣẹ glanglan lẹ ko hẹn gbẹninọ vẹawuna tòvi he yé dọ emi to dagbewà na lẹ.

“Gbẹtọ ko dugán do gbẹtọ ji na awugble etọn.”—YẸWHEHODỌTỌ 8:9.

Yajiji gán depò.

Ayinamẹ Biblu tọn hihodo nọ zọ́n bọ agbasa nọ ló bọ jijọho nọ tin.

“Ahun he whesọ nọ nagbẹ̀ agbasa, ṣigba, awuwhàn nọ hẹn ohú lẹ yọ̀n.”—HOWHINWHẸN LẸ 14:30.

“Mì gbọ adi sinsinyẹn, homẹgble, adánjijẹ, awhá po mẹzunzun wunmẹ lẹpo po ni dẹn do mì gọna nuylankan lẹpo.”—EFESUNU LẸ 4:31.