5. Be Oyà Na Wá Gbọ Ya?

Nuhewutu Mí Dona Yọ́n Gblọndo Lọ

Eyin todido tin dọ oyà na gbọ to gbèdopo, nukun devo wẹ mí na nọ yí do pọ́n ogbẹ̀ po Jiwheyẹwhe po.

Lẹnnupọndo Ehe Ji

Mẹsusu wẹ nọ jlo na de oyà sẹ̀, amọ́ yé ma nọ pé e go. Pọ́n nuhe bọdego lẹ:

Dile etlẹ yindọ amasin susu wẹ ko tin . . .

• Ahunzọ̀n wẹ nọ hù gbẹtọ lẹ hugan.

• Kansẹẹ nọ hù gbẹtọ livi susu lẹ to whemẹwhemẹ.

• Doto de he nọ yin David Bloom dọ to owe de mẹ dọ: “Awutu ylankan he dohuhlọn taun bo ma nọ yawu gbọ lẹ fọ́n bo to tuklado gbẹtọ lẹ to aihọn-gbẹ̀ lọ mẹ.”—Frontiers in Immunology.

Dile etlẹ yindọ akuẹ sù taun to otò delẹ mẹ . . .

• Yọpọvu livi susu wẹ nọ kú to whemẹwhemẹ podọ awà he ji wamọnọ lẹ te wẹ yé nọ kú te hugan.

• Gbẹtọ liva susu wẹ nọ nọ̀ lẹdo he kudiho lẹ mẹ.

• Gbẹtọ livi susu wẹ ma nọ mọ osin dagbe nù.

Dile etlẹ yindọ mẹsusu yọnẹn dọ osẹ́n to tòmẹ . . .

• Linlin Nations Unies tọn de dohia dọ to otò susu mẹ, yè gbẹ́ nọ fìn gbẹtọ bo nọ wà okà dego, podọ alọ ma nọ jẹ mẹhe nọ wàmọ lẹ go to fidelẹ, na aṣẹpatọ lẹ “ma yọnẹn dọ onú mọnkọ to jijọ kavi ma gán glọnalina mẹhe nọ wà onú mọnkọ lẹ.”

  DINDONA DOGỌ

  Pọ́n video lọ Etẹwẹ Ahọluduta Jiwheyẹwhe Tọn Yin? he tin to jw.org ji.

Nuhe Biblu Dọ

Jiwheyẹwhe nọ dọ mítọn.

Oyà he ji mí te nọ vẹna ẹn.

“[Jiwheyẹwhe] ma ko vlẹ kavi yí nukunpẹvi do pọ́n yajiji mẹhe yè to kọgbidina lọ tọn; e ma ko whlá nukunmẹ etọn do e. To whenue ewọ dawhá hlan ẹn na alọgọ, e sè.”—SALMU LẸ 22:24.

“Mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.”—1 PITA 5:7.

Oyà na gbọ madẹnmẹ.

Biblu dopà dọ ojlo Jiwheyẹwhe tọn na yin wiwà bọ gbẹtọ lẹ na vò.

“Jiwheyẹwhe . . . nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—OSỌHIA 21:3, 4.

Jiwheyẹwhe na họ̀nadọna yajiji.

Biblu dohia dọ e na yí Ahọluduta etọn zan nado de oyà sẹ̀.

“Jiwheyẹwhe olọn tọn na ze ahọluduta de dai he ma na yin vivasudo gbede. Ahọluduta ehe ma nasọ yin jijodo na akọta devo depope. . . . Ewọ kẹdẹ wẹ na nọte kakadoi.”—DANIẸLI 2:44.