Homẹmimiọn Na Mẹhe to Yaji Lẹ
TO OWHE kanweko lẹ gblamẹ, nuhewutu Jiwheyẹwhe jotẹndona yajiji ko dáblu do tamẹnuplọnmẹtọ po sinsẹ̀n-nuplọnmẹtọ susu po. Mẹdelẹ ko sọalọakọ́n dọ na Jiwheyẹwhe wẹ yin nupojipetọ wutu, ewọ wẹ dona yin whẹgbledo mlẹnmlẹn na yajiji lẹ. Mẹhe kàn Les Homélies clémentines, heyin otanwe owhe kanweko-awetọ tọn de, dọ dọ Jiwheyẹwhe nọ yí alọ etọn awe lẹ do dugán do aihọn lọ ji. Po “alọ amiyọn” etọn heyin Satani po, wẹ e nọ hẹn yajiji po tukla po wá, bọ “alọ adusi” etọn heyin Jesu, wẹ e nọ do whlẹnmẹ gán bo dona mẹ.
To alọ devo mẹ, mẹhe e sinyẹnawuna nado kẹalọyi dọ Jiwheyẹwhe sọgan jotẹndona yajiji, yèdọ eyin ewọ ma tlẹ hẹn ẹn wá lẹ ko gbẹ́ dọ yajiji matin gba. “Linlẹn ovọ́ poun de wẹ oylan yin, bo masọ tindo dodonu nujọnu tọn depope,” wẹ Mary Baker Eddy wlan. “Ylando, awutu, po okú po na busẹ eyin yé yin pinpọnhlan taidi onú ovọ́ lẹ.”—Science et santé avec la clef des Écritures.
Taidi kọdetọn na nugbajẹmẹji whenuho mẹ tọn lẹ, titengbe sọn wẹkẹ-whàn tintan whenu kakajẹ egbehe, mẹsusu ko wá tadona kọ̀n dọ Jiwheyẹwhe ma penugo nado glọnalina yajiji gba. “To linlẹn ṣie mẹ, Mẹvasudo pligidi lọ dohia dọ nupojipetọ-yinyin ma sọgan sọ yin yiyizan taidi jẹhẹnu he jẹna Jiwheyẹwhe ba,” wẹ weyọnẹntọ Juvi David Wolf Silverman wlan. E yidogọ dọ: “Na Jiwheyẹwhe nido họnwun na mí, to whelọnu dagbewà Etọn dona yin nudopolọ hẹ tintin oylan tọn, podọ ehe na yin nugbo kiki eyin Ewọ mayin nupojipetọ.”
Ṣigba homẹmiọnnamẹ vude poun wẹ hodidọ lọ lẹ dọ Jiwheyẹwhe nọ yidogọna yajiji, dọ e ma sọgan glọnalina ẹn, kavi dọ yajiji yin linlẹn ovọ́ tọn de poun nọ na mẹhe to yaji lẹ. Podọ na taun tọn, nuyise enẹlẹ sọta jẹhẹnu Jiwheyẹwhe dodonọ, huhlọnnọ, podọ mẹtọnhopọntọ heyin didohia to Biblu mẹ lọ tọn lẹ. (Job 34:10, 12; Jẹlemia 32:17; 1 Johanu 4:8) Eyin mọwẹ, etẹwẹ Biblu dọ gando nuhewutu dotẹnmẹ yin jijodona yajiji go?
Nawẹ Yajiji Bẹjẹeji Gbọn?
Jiwheyẹwhe ma dá gbẹtọ nado jiya gba. Kakatimọ, e na ayiha po agbasa pipé lẹ po asu po asi po tintan, yèdọ Adam po Evi po, wleawuna jipa whanpẹnọ de nado yin owhé yetọn, bosọ de azọ́n dagbe he na hẹn pekọwa de na yé. (Gẹnẹsisi 1:27, 28, 31; 2:8) Ṣigba, ayajẹnọ-yinyin zọnmii yetọn sinai do alọkikẹyi gandudu Jiwheyẹwhe tọn po jlọjẹ etọn nado basi nudide dagbe po oylan po tọn po ji. Gbedide Jiwheyẹwhe tọn enẹ yin tenọna gbọn atin de heyin yiylọdọ “atin yinyọ́n dagbe po oylan po” tọn dali. (Gẹnẹsisi 2:17) Adam po Evi po na dohia dọ yé litaina Jiwheyẹwhe eyin yé setonuna gbedide etọn ma nado dù sọn atin lọ mẹ.a
E blawu dọ Adam po Evi po ma setonuna Jiwheyẹwhe gba. Nudida gbigbọnọ atẹṣitọ de, heyin yiylọdọ Satani Lẹgba to godo mẹ, duto Evi ji dọ e ma na mọ ale depope yí sọn tonusisena Jiwheyẹwhe mẹ gba. Na taun tọn, Jiwheyẹwhe to onú dagbe tlala de ze whlá do e: enẹ wẹ mẹdekannujẹ, yèdọ jlọjẹ lọ nado basi nudide dagbe po oylan po tọn na ede. Satani dọ dọ eyin e dù sọn atin lọ mẹ, ‘nukun etọn lẹ na hùn bọ e nasọ taidi Jiwheyẹwhe, bo yọ́n dagbe po oylan po.’ (Gẹnẹsisi 3:1-6; Osọhia 12:9) Na e yin kiklọ gbọn todido mẹdekannujẹ tọn dali wutu, Evi dù sọn atin-sinsẹ́n heyin gbigbẹ́ lọ mẹ, bọ Adam lọsu wàmọ to nukọnmẹ.
To azán enẹ dopolọ gbè, Adam po Evi po jẹ numimọ kọdetọn atẹṣiṣi yetọn tọn lẹ tindo ji. Gbọn gandudu Jiwheyẹwhe tọn gbigbẹdai dali, yé gboawupo nado mọ hihọ́ po ayajẹ he taliaina Jiwheyẹwhe ko nọ na yé dai lẹ po. Jiwheyẹwhe yàn yé jẹgbonu sọn Paladisi mẹ bo dọna Adam dọmọ: “Mẹhodẹ̀do wẹ aigba yin na towe wutu, [awufiẹsa] mẹ wẹ hiẹ na dù sọn e mẹ te to gbẹzan towe lẹpo mẹ. To odẹ́n nukun towe mẹ tọn wẹ hiẹ na nọ dùnú, kaka hiẹ nado gọ̀ do aigba dè.” (Gẹnẹsisi 3:17, 19) Adam po Evi po wá pehẹ awutu, awufiẹsa, yọnhopipo, po okú po. Yajiji ko lẹzun apadewhe gbẹzan gbẹtọvi tọn tọn.—Gẹnẹsisi 5:29.
Whẹho lọ Dididẹ
Mẹde sọgan kanse dọ, ‘Be Jiwheyẹwhe ma sọgan ko de nukun sẹ sọn ylando Adam po Evi po tọn ji poun wẹ ya?’ Lala, na enẹ na ko vọ́ huhlọn depò na sisi tintindo na aṣẹpipa etọn, vlavo bo na tuli mẹdevo lẹ nado ṣiatẹ to nukọnmẹ, he na dekọtọn do yajiji dogọ mẹ. (Yẹwhehodọtọ 8:11) Dogọ, nukun didesẹ sọn tolivivẹ mọnkọtọn go na ko hẹn Jiwheyẹwhe yin mahẹtọ to ylando lọ mẹ. Biblu kàntọ Mose flin mí dọ: ‘Pipé wẹ azọ́n Jiwheyẹwhe tọn lẹ, na dodo wẹ aliho etọn lẹpo. Jiwheyẹwhe nugbonọ de, he dè whẹdida mawadodo tọn depope matin te; dodonọ po jlọjẹnọ po wẹ ewọ.’ (Deutelonomi 32:4) Nado yin nugbonọ hlan nunọwhinnusẹ́n ede tọn lẹ, Jiwheyẹwhe dona dike Adam po Evi po ni jiya kọdetọn tolivivẹ yetọn tọn lẹ.
Etẹwutu Jiwheyẹwhe ma và asu po asi po tintan lọ gọna Satani, heyin gbigbọ mayinukundomọ he whàn yé nado ṣiatẹ lọ sudo to afọdopolọji? E tindo huhlọn nado wàmọ, podọ enẹ na ko glọnalina Adam po Evi po ma nado jivi he na dugu yajiji po okú po tọn lẹ. Ṣigba, huhlọn didohia Jiwheyẹwhe tọn mọnkọtọn ma na ko do jlọjẹnọ-yinyin aṣẹpipa etọn tọn do nudida nuyọnẹntọ etọn lẹ ji hia gba. Humọ, eyin Adam po Evi po ko kú matin ovi wẹ, enẹ na ko do awugbopo lẹndai Jiwheyẹwhe tọn tọn nado hẹn kúnkan pipé yetọn lẹ gọ́ aigba ji hia. (Gẹnẹsisi 1:28) Podọ “Jiwheyẹwhe ma taidi gbẹtọ lẹ gba . . . Opagbe depope he e dó, e nọ hẹndi; e nọ dọho, bọ e nọ yin wiwà.”—Osọha lẹ 23:19, Today’s English Version.
To nuyọnẹn pipé etọn mẹ, Jehovah Jiwheyẹwhe de nado dike atẹṣiṣi lọ ni zindonukọn na ojlẹ he whègli tlala de. Atẹṣitọ lọ lẹ na tindo dotẹnmẹ he pé nado tindo numimọ nugandomẹgo gbẹninọ matin Jiwheyẹwhe tọn lẹ tọn. Whenuho na dohia hezeheze dọ gbẹtọvi tindo nuhudo anademẹ Jiwheyẹwhe tọn tọn bo nasọ dohia dọ gandudu Jiwheyẹwhe tọn yiaga taun hugan gbẹtọ tọn kavi Satani tọn. To ojlẹ dopolọ mẹ, Jiwheyẹwhe ze afọdide lẹ nado hẹn ẹn diun dọ lẹndai dowhenu tọn etọn na aigba na yin hinhẹndi. E dopagbe dọ “okún” de na wá he na ‘só ota Satani tọn,’ bo na de atẹṣiṣi po nugandomẹgo awugblenamẹ tọn etọn lẹ po sẹ kakadoi.—Gẹnẹsisi 3:15.
Jesu Klisti wẹ Okún opagbe tọn enẹ. To 1 Johanu 3:8, mí hia dọ “Ovi Jiwheyẹwhe tọn sọawuhia, na e nido gbà azọ́n [Lẹgba] tọn sudo.” E wà ehe gbọn ogbẹ̀ gbẹtọvi pipé etọn yíyí do sanvọ́ bo sú mẹflikuẹ lọ nado fli ovi Adam tọn lẹ sọn ylando po okú po he yé dugu etọn si dali. (Johanu 1:29; 1 Timoti 2:5, 6) Mẹhe do yise hia to avọ́sinsan Jesu tọn mẹ nugbonugbo lẹ yin opagbe do na nado mọ kọgbọ tẹgbẹ̀ tọn yí sọn yajiji si. (Johanu 3:16; Osọhia 7:17) Whetẹnu wẹ ehe na jọ?
Opodo Yajiji Tọn
Aṣẹpipa Jiwheyẹwhe tọn gbigbẹdai ko hẹn yajiji susu wá. To whelọnu lo, e sọgbe dọ Jiwheyẹwhe ni yí aṣẹpipa etọn zan to aliho vonọtaun de mẹ nado hẹn yajiji gbẹtọvi tọn wá opodo bo hẹn lẹndai dowhenu tọn etọn na aigba di. Jesu donu tito Jiwheyẹwhe tọn ehe go to whenue e plọn hodotọ etọn lẹ nado nọ hodẹ̀ dọmọ: ‘Otọ́ mítọn he tin to olọn mẹ, . . . Ahọludu towe ni wá. Ojlo towe ni yin wiwà to aigba ji, dile e te to olọn mẹ.’—Matiu 6:9, 10.
Ojlẹ he Jiwheyẹwhe na gbẹtọvi nado tẹ́n gandudu do ede ji pọ́n ko dibla vọ̀. To hẹndi dọdai Biblu tọn mẹ, Ahọluduta etọn yin didoai to olọn mẹ to 1914 po Jesu Klisti po taidi Ahọlu etọn.b To madẹnmẹ, e na gbà gandudu gbẹtọ tọn lẹpo do flinflin bo hẹn yé wá opodo.—Daniẹli 2:44.
To lizọnyizọn ojlẹ gli aigba ji tọn etọn whenu, Jesu wleawuna dọpọ́n dona he gandudu Jiwheyẹwhe tọn heyin hinhẹngọwa lọ na hẹnwa na gbẹtọvi lẹ tọn. Owe Wẹndagbe tọn lẹ na kunnudenu dọ Jesu do awuvẹmẹ hia wamọnọ po mẹhe yin yasana na nuvẹun wutu lẹ po. E hẹnazọngbọna awutunọ lẹ, na núdùdù mẹhe huvẹ hù lẹ, bo fọ́n oṣiọ lẹ sọnku. Yèdọ huhlọn jọwamọ tọn lẹ tlẹ setonuna ogbè etọn. (Matiu 11:5; Malku 4:37-39; Luku 9:11-16) Yí nukun homẹ tọn do pọ́n nuhe Jesu na wadotana to whenuena e na yí nuyiwadomẹji dagbe avọ́sinsan ofligọ tọn etọn zan nado hẹn ale wá na gbẹtọvi tonusetọ lẹpo! Biblu dopagbe dọ gbọn gandudu Klisti tọn gblamẹ, Jiwheyẹwhe “nasọ súnsún dasin lẹpo sẹ sọn nukun [gbẹtọvi lẹ tọn] mẹ; okú ma nasọ tin ba, kavi awubla, kavi avi, mọ awufiẹsa ma na tin ba.”—Osọhia 21:4.
Homẹmimiọn na Mẹhe to Yaji Lẹ
Lehe e namẹ tuli do sọ nado yọnẹn dọ Jiwheyẹwhe owanyinọ podọ nupojipetọ mítọn, Jehovah, nọ hò mítọn pọ́n bo nasọ hẹn kọgbọ wá na gbẹtọvi to madẹnmẹ! Mẹhe to awutu sinsinyẹn de jẹ nọ jlo nado kẹalọyi pọngbọ he na hẹn ẹn jẹ gángán yèdọ eyin e tlẹ vẹawu taun. Mọdopolọ, eyin mí yọnẹn dọ aliho he mẹ Jiwheyẹwhe to whẹho lẹ didẹ te na hẹn dona tẹgbẹ̀ tọn lẹ wá, oyọnẹn enẹ sọgan hẹn mí dote mahopọnna awusinyẹnnamẹnu ojlẹ gli tọn he mí sọgan pannukọn lẹ.
Ricardo, heyin nùdego to hosọ tintan mẹ, yin dopo to mẹhe ko plọn nado mọ homẹmimiọn yí sọn opagbe Biblu tọn mẹ lẹ mẹ. “To okú asi ṣie tọn godo, yẹn nọ jlo nado nọla na mẹdevo lẹ taun,” wẹ e flin, “ṣigba n’wá yọnẹn to madẹnmẹ dọ ehe ma na hẹn asi ṣie gọwá gba kakatimọ e na hẹn ninọmẹ ṣie ylan deji poun wẹ.” Ricardo tẹdo opli Klistiani tọn lẹ yìyì po owẹ̀n Biblu tọn mimahẹ mẹdevo lẹ po go gligli. “Dile n’to godonọnamẹ owanyinọ Jehovah tọn mọ bosọ doayi lehe e na gblọndo na odẹ̀ ṣie lẹ to nuhe whè tlala lẹ mẹ do go, n’nọ dọnsẹpọ ẹ dogọ,” wẹ Ricardo dọ. “Yinyọnẹn dogbọn owanyi Jiwheyẹwhe tọn dali wẹ hẹn mi penugo nado doakọnna whlepọn he sinyẹn hugan he yẹn ko pehẹ pọ́n lọ.” E yigbe dọmọ: “Yẹn gbẹsọ jẹdò asi ṣie tọn taun, ṣigba n’yise mlẹnmlẹn todin dọ nuhe Jehovah jotẹndona nado jọ depope ma na gbleawuna mí kakadoi gba.”
Taidi Ricardo po omẹ livi susu devo lẹ po, be a tindo ojlo vẹkuvẹku na ojlẹ lọ to whenuena yajiji gbẹtọvi tọn lẹ ‘ma na yin finflin, bọ yé ma na wá linlẹn mẹ ba’ ya? (Isaia 65:17) Deji dọ alọ towe sọgan plá dona Ahọluduta Jiwheyẹwhe tọn tọn lẹ eyin a hodo ayinamẹ Biblu tọn lọ he dọmọ: ‘Mì dín Jehovah to whenue yè sọgan mọ ẹn. Mì ylọ ẹ to whenue e tin to yakẹ.’—Isaia 55:6.
Nado sọgan wà ehe, a dona yí Ohó Jiwheyẹwhe tọn hihia po sọwhiwhe yíyí do plọn ẹn po do basi yanwle titengbe de to gbẹzan towe mẹ. Dovivẹnu nado yọ́n Jiwheyẹwhe podọ mẹhe e dohlan lọ, yèdọ Jesu Klisti. Tẹnpọn nado nọgbẹ̀ sọgbe hẹ nujinọtedo Jiwheyẹwhe tọn lẹ bo gbọnmọ dali dohia dọ a jlo nado litaina nupojipetọ-yinyin etọn. Nuyiwa mọnkọtọn na hẹn ayajẹ daho wá na we todin mahopọnna whlepọn he a sọgan pehẹ lẹ. Podọ to sọgodo, e na dekọtọn do vivi ogbẹ̀ tọn dùdù to aihọn he mẹ yajiji ma na tin te de mẹ.—Johanu 17:3.
[Nudọnamẹ Odò Tọn]
a To nudọnamẹ odò tọn etọn do Gẹnẹsisi 2:17 ji mẹ, La Bible de Jérusalem basi zẹẹmẹ “yinyọ́n dagbe po oylan po” tọn taidi “nugopipe lọ nado basi nudide . . . nuhe yin dagbe po oylan po tọn bo yinuwa sọgbe hẹ ẹ, alọsọakọ́n nado tindo mẹdekannujẹ mlẹnmlẹn walọyizan tọn gbọn ehe dali gbẹtọ gbẹ́ nado yọ́n otẹn etọn taidi nudida de.” E yidogọ dọ: “Ylando tintan yin nukundidiọsọ nupojipetọ-yinyin Jiwheyẹwhe tọn.”
b Na zẹẹmẹ gigọ́ do dọdai Biblu tọn he gando 1914 go ji, pọ́n weta 10 po 11 po owe Oyọnẹn He Nọ Planmẹ Sọyi Ogbẹ̀ Madopodo Mẹ tọn, heyin zinzinjẹgbonu gbọn Kunnudetọ Jehovah tọn lẹ dali.
[Apotin to weda 6, 7]
NAWẸ MÍ SỌGAN DOAKỌNNA YAJIJI GBỌN?
“Mì bẹ magbọjẹ mìtọn lẹpo do alọ [Jiwheyẹwhe] tọn mẹ.” (1 Pita 5:7) Numọtolanmẹ bẹwlu, homẹgble, po kọgbẹmẹgo tọn po nọ wá to jọwamọ liho eyin mí to akọndona yajiji kavi eyin mí mọdọ mẹyiwanna mítọn de to yaji. Etomọṣo, mì deji dọ Jehovah yọ́n numọtolanmẹ mítọn lẹ. (Eksọdusi 3:7; Isaia 63:9) Taidi sunnu nugbonọ hohowhenu tọn lẹ, mílọsu sọgan hùn ahun mítọn hlan ẹn bo dọ nuhahun po magbọjẹ mítọn lẹ po na ẹn. (Eksọdusi 5:22; Job 10:1-3; Jẹlemia 14:19; Habbakuk 1:13) E sọgan gọ̀n ma de whlepọn mítọn lẹ sẹ to azọ́njiawu-liho, ṣigba to gblọndo mẹ na odẹ̀ ahundoponọ mítọn lẹ, e sọgan na mí nuyọnẹn po huhlọn po nado doakọnna yé.—Jakobu 1:5, 6.
‘Mì dike whlepọn sinsinyẹn he mì to oyà etọn ji ni paṣa mì, taidi dọ nudabla de wẹ to jijọ do mì go blo.’ (1 Pita 4:12) Homẹkẹn ji wẹ Pita to hodọdo tofi, ṣigba hodidọ etọn sọ gando yajiji depope he yisenọ de sọgan doakọnna go ga. Gbẹtọvi lẹ nọ jiya hẹ́njijẹ, awutu, po okú mẹyiwanna lẹ po tọn. Biblu dọ dọ mẹlẹpo ji wẹ “ojlẹ po kosọ po” nọ wá. (Yẹwhehodọtọ 9:11) Onú enẹlẹ yin apadewhe ninọmẹ gbẹtọvi tọn to egbehe. Ehe yinyọnẹn na gọalọna mí nado doakọnna yajiji po nugbajẹmẹji lẹ po to whenuena yé jọ. (1 Pita 5:9) Na nugbo tọn, finflin hodidọ mẹhẹndeji tọn lọ dọ “nukun OKLUNỌ tọn tin hlan dodonọ lẹ dali, [bọ] otó etọn sọ hùn hlan ogbè yetọn,” na yin asisa homẹmiọnnamẹ tọn de na taun tọn.—Psalm 34:15; Howhinwhẹn lẹ 15:3; 1 Pita 3:12.
“Mì nọ jaya to todido mẹ.” (Lomunu lẹ 12:12) Kakati nado nọ to nulẹnpọndo ayajẹ he mí ko tindo wayi ji, mí sọgan nọ lẹnayihamẹpọn do opagbe Jiwheyẹwhe tọn nado hẹn yajiji lẹpo wá opodo ji. (Yẹwhehodọtọ 7:10) Todido he dolido ehe na basi hihọ́na mí dile ogàngbakun nọ basi hihọ́na ota do. Todido nọ de awuvẹ mimọ gbẹ̀mẹ tọn lẹ pò bo nọ hẹn ẹn diun dọ yé ma gbleawuna ninọmẹ apọ̀nmẹ, numọtolanmẹ, po gbigbọmẹ tọn mítọn po.—1 Tẹsalonikanu lẹ 5:8.
[Yẹdide to weda 5]
Adam po Evi po gbẹ́ gandudu Jiwheyẹwhe tọn dai
[Yẹdide to weda 7]
Jiwheyẹwhe dopagbe aihọn he mẹ yajiji ma na tin te de tọn