Nọ Mọnú Zẹ̀ Yèdọ-Yèdọ lẹ Go

Nuhahun Lọ

To paa mẹ, wunvi wẹ nọ zọ́n bọ mí nọ do nuvẹun. Di apajlẹ:

Ogán delẹ nọ lẹndọ yọnnu lẹ ma gán wà huhlọn-zọ́n kavi azọ́n he nọ biọ dọ yè ni lẹnnupọn susu.
To hoho dai, mẹlẹ nọ lẹn to Europe dọ Ju lẹ nọ kọ̀n nudido do dotọ̀ lẹ mẹ, bo nọ doazọ̀n mẹlẹ. To gandudu Nazi lẹ tọn whenu, yè sọ doajàn yetọn bo dọ dọ to jlẹ lọ mẹ, yelẹ wẹ zọ́n bọ kuẹ do hán to Allemagne. Enẹ lẹpo wẹ zọ́n bọ mẹlẹ do gbẹwanna Ju lẹ bo doyana yé taun. Podọ, nuvẹun enẹ ma o busẹ pete.
Mẹsusu wẹ nọ lẹndọ mẹe do blọ lẹ nọ nọ̀ awubla mẹ kavi nọ fiẹ.

Mẹe nọ yí linlẹn agọ̀ enẹlẹ sè lẹ tlẹ nọ na apajlẹ delẹ kavi pìntàn delẹ nado dohia dọ nugbo dọ wẹ emi te. Podọ eyin mẹde gbẹ́ hó yetọn, yé nọ lẹndọ wunvinọ wẹ yin mẹlọ.

Ayinamẹ Biblu Tọn

“Mẹhe ma tindo oyọnẹn ma yin mẹdagbe.”—HOWHINWHẸN LẸ 19:2.

Etẹwẹ wefọ lọ to pinplọn mí? Eyin mí ma nọ mọdona hó lẹ ganji, mí na nọ wá tadona agọ̀ kọ̀n. Yin mí nọ yí yèdọ-yèdọ lẹ sè, mí na nọ ṣì whẹdana mẹlẹ.

Yèdọ-Yèdọ lẹ Yin Owùnu

Eyin mí ma nọ na tó yèdọ-yèdọ lẹ, mí maa nọ yawu lẹn nú agọ̀ gando mẹlẹ go. Podọ, whenue mí wá mọdọ nue mí sè gando gbẹtọ wunmẹ delẹ go ma yin nugbo, mí gán mọdọ nue mílọsu nọ lẹn gando mẹdevo lẹ go ma yin nugbo.

Otàn Jọnun Jovica: (sọn Hùwaji Europe Tọn)

To whenue Jovica, he mí ko dọho etọn wayi to whinwhẹ́n, e nọ sè bọ tòvi hatọ etọn lẹ, linlin lẹ po televiziọn po nọ dọho agọ̀ gando akọ̀ de go. E dọmọ: “N’wá jẹ nuvẹun do na akọ̀ lọ ji bo tlẹ wá gbẹwanna yé. N’nọ lẹndọ whẹ̀ ṣie whẹ́n bọ n’do gbẹwanna yé.

“To whenue n’to awhànzọ́n mẹ, n’dona nọpọ́ bosọ wazọ́n hẹ awhànfuntọ he wá sọn akọ̀ enẹ mẹ lẹ, de wagbọn ma tin. To nukọn mẹ, n’wá jẹakọ hẹ yé. N’tlẹ jẹ ogbè yetọn plọn ji bosọ nọ dotó hàn yetọn lẹ. N’wá jẹ wanyina yé ji bo wá diọ nue n’nọ lẹn gando yé go. Amọ́, n’yọnẹn dọ linlẹn agọ̀ ṣie lẹ gán gbẹ́ nọ lẹkọwa. Enẹwutu, n’nọ dapana linlin he nọ dọho agọ̀ gando akọ̀ enẹ go lẹ. Mọ n’masọ nọ pọ́n sinima kavi aihun fànfún tọn he nọ de yé pò lẹ. N’yọnẹn dọ nuvẹun gán ji homẹgble bọ homẹgble na ji wangbẹnamẹ.”

Nue A Gán Wà

Mẹlẹ nọ saba tlẹ́ yinkọ dokọna akọ̀ kavi pipli lẹ. Amọ́, enẹ ma dohia dọ mẹe to akọ̀ kavi pipli lọ mẹ lẹpo wẹ jọ mọ.
Yọnẹn dọ nue mí nọ sè gando mẹdevo lẹ go gán nọma yin nugbo mlẹnmlẹn.
Nọ dindona whẹho lẹ to fie a gán mọ nugbo yetọn te.