Nọ Vẹawumẹ

Nuhahun Lọ

Eyin mí nọ ze ayiha do vogbingbọn he to mílẹ po mẹdevo lẹ po ṣẹnṣẹn ji glanglan, mí na nọ lẹndọ nú jẹdò to yé go. Enẹ na zọ́n bọ mí na nọ lẹndọ mí pọnte hú yè. Eyin mí jẹ awuwlena linlẹn agọ̀ enẹlẹ ji, e na vẹawuna mí nado nọ ze míde do otẹn yetọn mẹ. Eyin mí ma ka nọ ze míde do otẹn yetọn mẹ, be vlavo nuvẹun ko to nuhẹngble to hò mítọn mẹ niyẹn.

Ayinamẹ Biblu Tọn

“Mì nọ jaya hẹ mẹhe to ayajẹ lẹ; mì nọ viavi hẹ mẹhe to avivi lẹ.”—LOMUNU LẸ 12:15.

Etẹwẹ wefọ lọ tọ pinplọn mí? Do glido, nue dọ wefọ lọ te wẹ yindọ, eyin mí nọ ze míde do otẹn mẹdevo lẹ tọn mẹ, mí na nọ sè vivẹ́ hẹ yé.

Dagbe He Awuvẹmẹ Nọ Wà

Whenue mí vẹawu mẹde, mí nọ mọdọ mí ma yí nude do gbọnvona mẹlọ. Podọ mí na wá mọdọ eyin mí ko tin to otẹn etọn mẹ wẹ, vlavo mọ wẹ mílọsu na ko yinuwa do. Awuvẹmẹ nọ gọalọna mí nado mọdọ nudopolọ wẹ mímẹpo mahopọnna fie mí wá sọn bọ mí yin whẹndo dopo. Eyin mí nọ flindọ mí ma yí nude do gbọnvo na mẹlẹ, e na vẹawu dọ mí ni do linlẹn agọ̀ gando yé go.

Awuvẹmẹ sọ nọ gọalọna mí nado nọ sí mẹdevo lẹ. To dai, Anne-Marie he wá sọn Sénégal nọ pọ́n mẹhe de-ma-to-de na lẹ di gbẹ́gọ́nu. Amọ́, etẹwẹ gọalọna ẹn nado nọ vẹawu yé? E dọmọ: “Dee n’mọ oyà he mẹhe de-ma-de na lẹ nọ ji, n’kanse dee dọ nawẹ e na ṣí na mi eyin yẹn wẹ to yaji domọ. Enẹ zọ́n bọ n’ma nọ mọ dee di mẹjọmẹ he pọnte hú yé.” Eyin mí nọ tẹnpọn nado yọ́n nuhe to mẹdevo lẹ há, e na bọawuna mí nado nọ vẹawu yé bo ma na nọ mọhodọdo yé go.

Nue A Gán Wà

Mẹdelẹ gán tin he a ma nọ yí nukun-jọ-nukun do pọ́n. Kakati nado nọ ze ayiha do nue a ma nọ yiwanna to yé go lẹ ji, nọ ze ayiha do nue gán kọ̀n mì dopọ lẹ ji. Di apajlẹ, pọ́n lehe e na ko nọ ṣí na yé

Awuvẹmẹ nọ gọalọna mí nado mọdọ mí yin whẹndo dopo

to whenue yé to núdù hẹ whẹndo yetọn
to whenue yé jẹtukla bo fó azọ́n yetọn
to whenue yé topọ hẹ họntọn lẹ
to whenue yé to hàn he yé yiwanna taun de sè

Din, tẹnpọn bo ze dewe do otẹn yetọn mẹ. Kanse dewe dọ:

‘Etẹ n’na bayi eyin mẹde de mi pò?’
‘Nawẹ e na ṣí na mi eyin mẹlẹ ma dindona mẹe n’yin bo ka wá dọ nú agọ̀ lẹ do go e?’
‘Eyin akọ̀ kavi pipli yetọn mẹ wẹ n’wá sọn, nawẹ n’na ko jlo dọ yè ni yinuwa hẹ mi do?’

Caucase-nu po Sikh-nu lọ po to yẹdide he yé do to alokan ji lẹ dohia yede. Yẹdide lọ lẹ do nue yé mẹ awe lẹ nọ yiwanna lẹ hia, taidi whẹndo yetọn, aihun he nọ vivi na yé lẹ po azọ́n yetọn po.

Otàn Jọnun: Robert (He Wá Sọn Singapour)

“To dai, n’nọ lẹndọ tókunọ lẹ dablu, ta yetọn ma sewé bọ yé sọ nọ yawu gblehomẹ. Enẹ zọ́n bọ n’nọ pá na yé. Na nue n’nọ lẹn ma o hẹn nude gble to mẹde go wutu, n’ma mọdọ nuvẹun wẹ.”

“Whenue n’wá jẹ awuvẹ tókunọ lẹ ji wẹ n’wá jo nuvẹun do. Di apajlẹ, n’nọ lẹn dai dọ tókunọ lẹ sin ta ma sewé, na e yindọ n’to hodọna yé, yé nọ to pinpọn mi gbọn-ọn. N’wá ze dee do otẹn yetọn mẹ bo pọ́n lee e na ṣí na mi eyin yẹn wẹ mẹde to hodọna bọ n’ma yọ́n nue dọ e te, mọ ján yẹnlọsu na pọ́n mẹlọ gbọn-ọn do. Eyin yè tlẹ plá nude do tó go na mi nado sènu, nukunmẹ ṣie na gbẹ́ dohia dọ hó lọ ma yíyé mi, na n’maa to hó lọ sè ganji wutu.”

“Dee n’jẹ dee zedo otẹn tókunọ lẹ tọn mẹ ji, nú agọ̀ he n’nọ lẹn gando yé go lẹpo wẹ busẹ.”