Be Jiwheyẹwhe Nọ Vẹawu Mí Ya?
NUHE NUDIDA LẸ PLỌN MÍ
Awuvẹmẹ yin “nugopipe nado ze míde do otẹn mẹhe to yaji kavi mẹhe adán gbò de tọn mẹ bo yí nukun homẹ tọn do pọ́n awufiẹsa he mẹ mẹlọ te.” Rick Hanson, doto de he nọ penukundo apọ̀nmẹ-zọ̀n go dọ dọ “awuvẹmẹ nọ saba yin jọwamọnu na gbẹtọvi lẹ.”
LẸNNUPỌN: Naegbọn gbẹtọvi lẹ kẹdẹ wẹ tindo nugopipe lọ nado nọ vẹawumẹ? Biblu dọ dọ Jiwheyẹwhe dá gbẹtọ to apajlẹ etọn mẹ. (Jenẹsisi 1:26) Mí yin didá to apajlẹ Jiwheyẹwhe tọn mẹ wẹ zọ́n bọ mí sọgan yinuwa di ewọ jẹ obá de mẹ. Enẹwutu, to whenue awuvẹmẹ sisẹ́ mí nado gọalọna mẹdevo, apajlẹ Mẹdatọ mítọn Jehovah Jiwheyẹwhe, he nọ vẹawumẹ lọ tọn hodo wẹ mí te.—Howhinwhẹn lẹ 14:31.
NUHE BIBLU DỌ GANDO AWUVẸMẸ JIWHEYẸWHE TỌN GO
Jiwheyẹwhe nọ vẹawu mí bọ e nọ vẹna ẹn taun eyin mí to yaji. Biblu dọ gando Islaeli hohowhenu tọn, he jiya to kanlinmọgbenu to Egipti bosọ wá gbọn ninọmẹ sinsinyẹn mẹ na owhe 40 to danfafa ji go dọmọ: “To ayimajai yetọn lẹpo whenu, e nọ hẹn ayimajai wá na ewọ lọsu.” (Isaia 63:9) Sọgbe hẹ wefọ lọ, Jiwheyẹwhe ma doayi ayimajai yetọn go poun gba. Onú yetọn sọ biọlanmẹna ẹn. E dọmọ: “Yẹn sọ yọ́n oyà he ji yé te lẹ ganji.” (Eksọdusi 3:7) Jiwheyẹwhe dọmọ: “Mẹdepope he doalọ mì go, doalọ nukunzìn ṣie go.” (Zekalia 2:8) Eyin mẹde to yadona mí, Jiwheyẹwhe nọ sè vivẹ́ hẹ mí.
Eyin mí tlẹ nọ dowhẹ míde bo mọdọ mí ma jẹna awuvẹmẹ Jiwheyẹwhe tọn, Biblu na mí jide dọ: “Jiwheyẹwhe klohu ahun mítọn bosọ yọ́n nulẹpo.” (1 Johanu 3:19, 20) Jiwheyẹwhe yọ́n mí taun hugan mílọsu. E yọ́n ninọmẹ mítọn, linlẹn mítọn po nue mẹ mí nọ jugbọn lẹpo po. E nọ vẹawu mí.
Mí sọgan lẹhlan Jiwheyẹwhe dè nado mọ homẹmiọn, nuyọnẹn, po alọgọ po, na mí yọnẹn dọ e ma nọ jo mẹhe to ayimajai mẹ lẹ do wutu
Owe-wiwe lẹ na mí jide dọ
“Hiẹ na ylọ bọ Jehovah na siọ we; hiẹ na dawhá na alọgọ bọ ewọ na dọmọ, ‘Yẹn die!’”—ISAIA 58:9.
“‘Na yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po. Podọ mì na ylọ mi bo na wá bo na hodẹ̀ hlan mi, yẹn nasọ dotoaina mì.’”—JELEMIA 29:11, 12.
“Kọ̀n dasin ṣie lẹ do ayúgò towe mẹ. Be yé ma yin kinkandai do owe towe mẹ?”—SALMU LẸ 56:8.
JIWHEYẸWHE NỌ DOAYI MÍ GO, YỌ́N MÍ BO NỌ VẸAWU MÍ
Eyin mí yọnẹn dọ Jiwheyẹwhe nọ vẹawu mí, be enẹ gán gọalọna mí nado doakọnna nuhahun lẹ ya? Pọ́n nuhe jọ do Maria go:
“Whenue visunnu ṣie he tindo owhe 18 jẹ kansẹẹ na owhe awe bo kú, ogbẹ̀ dózin do mi bọ n’mọdọ e ma sọgbe domọ. N’gblehomẹ do Jehovah go, na e ma yí nude wà nado hẹnazọ̀ngbọna ẹn!
“Owhe ṣidopo godo, họntọn de to agun ṣie mẹ, he jọmẹ bo nọ vẹawumẹ dotoaina mi dile n’to nuhewutu n’lẹndọ Jehovah ma yiwanna mi lẹ dọ. To whenue e ko dotoaina mi na gànhiho susu bo ma gbòhódonù na mi godo, e flin mi nue wefọ de dọ bọ enẹ na mi tuli taun. Wefọ lọ wẹ 1 Johanu 3:19, 20, he dọmọ: ‘Jiwheyẹwhe klohu ahun mítọn bosọ yọ́n nulẹpo.’ E dọ dọ Jehovah yọ́n ayimajai mítọn lẹ ganji.
“Etomọṣo, n’gbẹ́ to homẹgble! Amọ́, n’wá hia Salmu lẹ 94:19 he dọmọ: ‘Whenue magbọjẹ lẹ húagbọ́ mi, hiẹ miọnhomẹna mi bo hẹn kọgbọ wá na mi.’ E di dọ yẹn wẹ wefọ lọ yin kinkan na nkọ! To godo mẹ, e miọnhomẹna mi taun nado dọ nuhahun ṣie na Jehovah, na n’yọnẹn dọ e to todoaina mi bosọ mọnukunnujẹ ninọmẹ ṣie mẹ.”
E nọ miọnhomẹna mí taun nado yọnẹn dọ Jiwheyẹwhe yọ́n ninọmẹ mítọn ganji, bosọ nọ vẹawu mí! Amọ́, naegbọn yajiji do sù sọmọ? Be Jiwheyẹwhe to yasana mí na ylanwiwa mítọn wutu wẹ ya? Be Jiwheyẹwhe na yí nude wà nado doalọtena yajiji lẹpo ya? Mí na dọhodo onú ehelẹ ji to hosọ he bọdego lẹ mẹ.