Ayinamẹ lẹ Nado Nọ Jijọho mẹ hẹ Mẹdevo Lẹ

Nọ Jonamẹ

‘Mì nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po.’—KOLOSINU LẸ 3:13.

Mímẹpo wẹ nọ ṣinuwa. Eyin mí ma ṣinuwa do mẹde, be mẹde ka na ṣinuwa do mí. Depope he whẹho lọ yin, mí dona nọ jona ode awetọ janwẹ. Mẹhe jonamẹ masọ nọ hẹnmẹ do homẹ ba. E ma nọ “yí oylan do suahọ oylan tọn,” mọ e ma nọ to gigọwa nuhe ko wayi lẹ ji whẹwhẹ. (Lomunu lẹ 12:17) Amọ́, eyin nuhe yè wà na we lọ ka vẹna we taun bọ a ma gán de ayiha sọn e ji lo? Nuyọnẹnnu wẹ e na yin dọ hiẹ po mẹlọ po ṣo ni dọhodo whẹho lọ ji. E nasọ yọ́n dọ a ni dọhona mẹlọ po sisi po. Nuhe dín a te ma yindọ mì ni dọ mẹhe sin owhẹ̀ whẹ́n, amọ́ dọ mì ni mọnukunnujẹ mìdelẹ mẹ.—Lomunu lẹ 12:18.

Nọ Ze Dewe Whè bo Nọ Namẹ SiSi

“Mì nọ gbọn whiwhẹ dali pọ́n mẹdevo lẹ dọ yé yiaga hú mì.”—FILIPINU LẸ 2:3.

Eyin mí nọ ze míde whè bo nọ namẹ sisi, mẹlẹ na nọ voawu to apá na mí. Etẹwutu? Na yé yọnẹn dọ mí nọ jọmẹ bo nọ homẹtọnpọn bo ma na yọnẹn do wà nude he na vẹna yé. Amọ́, eyin mí nọ lẹndọ mí hugan mẹlẹ kavi nọ dọ dọ mítọn ji janwẹ e na gbò do, hunyanhunyan janwẹ mí na nọ hẹnwa. Mẹlẹ na nọ họ̀nna mí podọ afọ wẹ na yọ́n bọ mí nado do họntọn de.

Ma Nọ Homẹnukuntapọn Blo

“Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.”—OWALỌ LẸ 10:34, 35.

Mẹdatọ lọ ma nọ lẹndọ mẹde pọnte hú mẹde, na otò, ogbè, nuhe mẹlọ yin kavi sinmẹ agbasa tọn mẹlọ tọn wutu. ‘Ewọ hẹn akọta gbẹtọ tọn lẹpo wá sọn mẹdopo mẹ.’ (Owalọ lẹ 17:26) Ehe dohia dọ nọvi-nọvi wẹ mímẹpo yin. E nọ vivi na mẹlẹ eyin mí nọ ze yé sù bo nọ jọmẹ hẹ yé. E nọ wà dagbe na mí bosọ nọ vivi na Mẹdatọ lọ.

Nọ Do Walọmimiọn Hia

‘Mì yí walọmimiọn dogo.’—KOLOSINU LẸ 3:12.

Eyin mí nọ do walọmimiọn hia, mẹlẹ na nọ voawu hẹ mí. Yé ma na nọ dibu nado dọhona mí kavi tlẹ gbẹnuna mí, na yé yọnẹn dọ mí ma na gblehomẹ. Eyin mẹde gblehomẹ do mí go bọ mí yí ogbè fifá do gblọnho, e gán zọ́n bọ mẹlọ na johodo. Owe-wiwe lẹ dọ to Howhinwhẹn lẹ 15:1 mẹ dọ: “Gblọndo he yin nina po ogbè dẹẹdẹ po nọ lilẹ́ adi sẹ̀, ṣigba, hogbe kàunkàun nọ fọ́n homẹgble dote.”

Nọ Tlúalọ bo Nọ Dopẹ́

“Ayajẹ sù to nunamẹ mẹ hú to mimọyi mẹ.”—OWALỌ LẸ 20:35.

To ogbẹ̀ lọ mẹ, mẹsusu wẹ yin nukunkẹnnọ bọ yetọn kẹdẹ mẹ janwẹ yé nọ ví do. Amọ́, mẹhe nọ nanúmẹ lẹ wẹ nọ do ayajẹ hugan. (Luku 6:38) Yé nọ do ayajẹ, na yé nọ yiwanna gbẹtọ hú adọkunnu lẹ. Owanyi enẹ wẹ sọ nọ zọ́n bọ yé nọ dopẹ́, eyin mẹde nanú yé, bosọ nọ dohia dọ emi yọ́n pinpẹn etọn. (Kolosinu lẹ 3:15) Eyọn, pọ́n bo! ‘Mẹnu wẹ a nọ yiwanna hugan? Mẹhe ma nọ nanúmẹ bo ma nọ dopẹ́ wẹ ya? Kavi mẹhe nọ tlúalọ bo nọ yọ́n pinpẹn dagbe he yè wà na ẹn tọn?’ Enẹwutu, tẹnpọn bo yin gbẹtọ he nkọ a nọ jlo dọ mẹlẹ ni yin.—Matiu 7:12.