Nuhe Dohia Dọ Osọ Na Yọ́n
Jiwheyẹwhe dopà dọ zande din, emi na diọ nulẹ to ogbẹ̀ lọ mẹ. E na de oyà sẹ̀ bo na basi bọ gbẹtọ lẹ na vò to aigba ji. (Salmu lẹ 37:11) Naegbọn mí gán deji dọ Jiwheyẹwhe na de opà etọn? “Jiwheyẹwhe ma taidi gbẹtọ tata de he nọ dolalo.” (Sọha lẹ 23:19) Nudagbe he Mẹdatọ lọ na wà delẹ die.
Mawu Na De Mẹylankan lẹ Sẹ̀
“Eyin mẹylankan tọ́nkun di ogbé bọ ylanwatọ lẹpo to vùnvùn, na yé nido yin huhusudo kakadoi wutu wẹ.”—SALMU LẸ 92:7.
Dile hosọ he wayi dohia do, nuylankan fọ́n bo to jijideji. E ma dona paṣa mí. Biblu ko dọ to 2 Timoti 3:1-5 mẹ dọ to “azán godo tọn lẹ” mẹ, gbẹtọ lẹ na peve to ylanwiwa mẹ. Azán godo tọn etẹ tọn? Azán godo tọn aihọn ylankan ehe tọn he mẹ gbẹtọvi he ma nọ setonuna Jiwheyẹwhe lẹ gọ́. Zande din, Jiwheyẹwhe na và mẹylankan he ma jlo na diọ jijọ lẹpo bọ mẹdagbe he nọ setonuna Jiwheyẹwhe lẹ kẹdẹ wẹ na pò. “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.”—Salmu lẹ 37:29.
Mawu Na Và Satani Sudo
“Jiwheyẹwhe he nọ namẹ jijọho na gídí Satani.”—LOMUNU LẸ 16:20.
Whenue mẹylankan de ma nasọ tin, bọ Satani po aovi lẹ po na busẹ, jijọho na tin gbọn ogbẹ̀ lọ blebu mẹ. Mẹdatọ lọ dopà dọ: ‘Mẹde ma na nọ dobuna we.’—Mika 4:4.
Mawu Na De Azọ̀n po Okú po Sẹ̀
“Gòhọ Jiwheyẹwhe tọn tin to gbẹtọvi lẹ dè . . . Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.”—OSỌHIA 21:3, 4.
Mẹde ma nasọ jiya kavi jẹazọ̀n ba, na Jiwheyẹwhe na vọ́ nuhe Satani, Adam, Evi po mape mítọn po ko hẹngble lẹpo jlado. Enẹ na zọ́n bọ “okú ma nasọ tin ba.” Gbẹtọvi he yiwanna Mẹdatọ lọ bo nọ setonuna ẹn lẹ na nọgbẹ̀ kakadoi. To fitẹ?
Mẹdatọ lọ Na Diọ Aigba Zun Paladisi
“Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.”—ISAIA 35:1.
Aigba na lẹzun Paladisi to whenue Jiwheyẹwhe na ko và mẹylankan lẹ. Jipa po nọtẹn whanpẹnọ lẹ po na gọ́ aigba ji bọ núdùdù na sù bo pemẹnu. (Salmu lẹ 72:16) Dihó depope ma nasọ tin to ohù po otọ̀ lẹ po mẹ ba. Whèvi po nutogbẹ̀ he nọ nọ̀ otọ̀ mẹ lẹ po nasọ sù. Mẹlẹ na gbá owhé yetọn titi bo nọ e mẹ. Mí ma nasọ sè pọ́n dọ mẹde tin bo ma do owhé. Huvẹ po ohẹ́n po ma nasọ tin ba.—Isaia 65:21, 22.
Mawu Na Fọ́n Oṣiọ Lẹ
‘Fọnsọnku de na tin.’—OWALỌ LẸ 24:15.
Be e nọ jlo we dọ a ni gọ̀ mẹvivẹ towe he ko kú lẹ mọ ya? Jiwheyẹwhe ganhunupotọ lọ na fọ́n yé sọn oṣiọ lẹ mẹ, bọ yé na nọgbẹ̀ to aigba ji to Paladisi mẹ. To whenue yé na gọwá ogbẹ̀, a na yọ́n yé bọ yelọsu na yọ́n we. E na vivi na mì taun nado gọ̀ mìdelẹ mọ. Etẹwẹ dohia dọ ehe ma yin hójijlẹ? Biblu dọho yọpọ po mẹho delẹ po tọn, he yin hinhẹngọwa ogbẹ̀ bọ yé nọpọ́ po omẹ yetọn lẹ po. Gbọnvona enẹ, whlasusu wẹ Jesu fọ́n oṣiọ lẹ bọ mẹsusu mọ.—Luku 8:49-56; Johanu 11:11-14, 38-44.