AIHỌN DE HE TO BẸWLU MẸ

1 | Nọ Jogún-Jogún

NUHEWUTU E YIN NUJỌNU

Adángbòmẹ nọ hẹnnugble to mẹgo janwẹ, vlavo yè doayi e go kavi yè ma doayi e go.

Adángbòmẹ gán do lẹnpọn namẹ, podọ lẹnpọn glanglan gán wá zọ́n bọ yè na nọ yawu jẹ awutu.
Awhàn, aigba sisọsisọ, kavi onú mọnkọ lẹ gán zọ́n bọ doto, amasin po nukunpedomẹgo dotowhé tọn he jẹ po na hán.
Eyin bẹwlu biọ otò de mẹ, akuẹ ma nọ biọ whégbè di dai ba, e nọ vẹawu nado mọ dandannu lẹ taidi núdùdù he nọ namẹ hunsindagbe, amasin kavi nado yì dotowhé.

Nuhe A Dona Yọnẹn

Mẹhe to azọ̀n sinsinyẹn jẹ kavi to ayimajai mẹ gán nọma lẹnnupọn ganji ba bo dovọ́na aṣa he na zọ́n bọ e na to ganji to agbasa mẹ lẹ. Podọ e yọnbasi dọ mẹlọ ni wá pò na azọ̀n.
Azọ̀n he go yè ma penukundo ganji lẹ gán vantan bo tlẹ gán wá hùmẹ.
E nọ bọawu hugan na mẹhe to jogún-jogún nado basi nudide dagbe lẹ to ninọmẹ sinsinyẹn lẹ mẹ.
Vlavo a yin adọkunnọ kavi wamọnọ, a gán wà nudelẹ nado nọ ganji to agbasa mẹ.

Nuhe A Sọgan Wà Todin

Whedepopenu he e yọnbasi, mẹhe yin nuyọnẹntọ nọ tẹnpọn nado mọ owù he e gán pehẹ lẹ hlan bo nọ ze afọdide lẹ nado dapana yé. A gán wà nudopolọ ma nado jẹazọ̀n. Wiwejininọ nọ zọ́n bọ yè ma nọ yawu jẹazọ̀n delẹ, podọ eyin yè tlẹ wá bẹ janwẹ, e ma na sinyẹn sọmọ. E pọnte dọ yè ni họ́ mẹde nado nọ jogún-jogún hú dọ yè ni wá zan akuẹ do amasin mẹ.

“Mí nọ hẹn míde po owhé mítọn po do wiweji. Enẹ ko gọalọna mí ma nado gbọ do dotowhé kavi họ̀ amasin sọmọ.”—Andreas.a

a To linlinwe ehe mẹ, yinkọ delẹ ko yin didiọ.

LEHE E GÁN PÀ WE DO—Ayinamẹ Delẹ

To adángbòmẹ whenu, a gán wà nuhe bọdego lẹ nado nọ jogún-jogún

NỌ NỌ̀ WIWEJI

Nọ nọ̀ wiweji

Biblu dọmọ: “Zinzintọ nọ mọ owù hlan bo nọ whlá ede.” (Howhinwhẹn lẹ 22:3) Nọ tẹnpọn bo nọ doayi nuhe gán doazọ̀n we lẹ go bo nọ dapana yé.

Nọ yí osin po adí po do klọ alọ gbọzangbọzan, titengbe eyin a jlo na doalọ núdùdù go kavi eyin a lẹkọ sọn adàdo ji.
Nọ sẹ̀ owhé towe gbè do whẹwhẹ. Nọ saba sánu kavi kọ̀n onú gbọn filẹ to owhé towe gbè nado hù wánvú lẹ, titengbe to fie alọ nọ yawu gbọn lẹ po nuyizan he go alọ nọ jẹ whẹwhẹ lẹ po.
Eyin e yọnbasi, ma nọ sẹpọ mẹhe to azọ̀n he nọ bẹplamẹ jẹ lẹ gbau blo.

NỌ DÙ NUHE NỌ NAMẸ HUNSINDAGBE LẸ

Nọ dù nuhe nọnamẹ hunsindagbe lẹ

Biblu dọmọ: “Mẹdepope ma nọ gbẹwanna agbasa edetiti tọn gbede; ṣigba e nọ na ẹn núdùdù bo nọ wlebòna ẹn.” (Efesunu lẹ 5:29) Aliho dopo nado dohia dọ mí yiwanna agbasa mítọn wẹ nado nọ ṣọ́ nuhe nọ biọ homẹ na mí lẹ.

Nọ nùsin susu.
Nọ dù atin-sinsẹ́n po omá voovo lẹ po.
Ma nọ dù amì, ojẹ̀ po sukle susu po blo.
Nọ dapana azọ̀, géé kavi onú mọnkọ lẹ nùnù. Ma nọ ṣì ahàn sinsinyẹn kavi amasin zan blo.

“Mí nọ tẹnpọn bo nọ dù núdùdù he nọ namẹ hunsindagbe lẹ ma nado jẹazọ̀n; e ma yinmọ akuẹ pẹẹde he mí nọ mọ wẹ mí nado nọ yì dotowhé bo họ̀ amasin. E pọnte na mí dọ mí ni nọ zan akuẹ do núdùdù he nọ namẹ hunsindagbe mẹ.”—Carlos.

NỌ DÁN AGBASA BO NỌ GBỌJẸ GANJI

Nọ dán agbasa

Biblu dọmọ: “Gbọjẹ vude pọnte hú kanvinván zẹjlẹgo po wezundido to jẹhọn godo po.” (Yẹwhehodọtọ 4:6) Mí dona wazọ́n, amọ́ nujọnu wẹ e sọ yin dọ mí ni nọ gbọjẹ ganji.

Nọ dán agbasa. To bẹjẹeji, a gán nọ zinzọnlin whẹwhẹ. Agbasa dindan gán zọ́n bọ a na to ganji eyin a tlẹ ko whẹ́n mẹho, do oblọ kavi to azọ̀n jẹmagbọ de jẹ.
Nọ gbọjẹ

Nọ gbọjẹ ganji. Mẹhe ma nọ gbọjẹ ganji gán nọ yawu mọ apọ̀ bọ e na nọ vẹawuna ẹn nado ze ayiha do fidopo. Humọ, e gán wá bẹ azọ̀n sinsinyẹn de to nukọn mẹ.
Sọgbe hẹ ninọmẹ towe, de ogàn he mẹ a na nọ yihọ bo nọ zìn gbọn e ji. Nọ tẹnpọn bo nọ yiho kavi fọ́n to ogàn dopolọ mẹ egbesọegbesọ.
Ma nọ pọ́n televiziọn kavi zan alokan to adọzan ji blo.
Ma nọ dù núdùdù he pẹ̀n, nù café kavi ahàn sinsinyẹn whẹpo do yihọ blo.

“Amlọn nọ gọalọna mi to nulẹpo mẹ. Whedelẹnu, eyin amlọn ma pé mi, ota nọ dù mi bọ agbasa nọ vẹ́ mi. Amọ́, eyin amlọn pé mi, n’nọ vò to lanmẹ bo sọgan wazọ́n he to go e lẹ. N’nọ to jogún-jogún bo ma nọ yawu jẹazọ̀n.”—Justin.