Josẹfu Whlé Nọvisunnu Etọn lẹ Pọ́n

JOSẸFU jlo na yọnẹn eyin mẹdaho etọn 10 lẹ gbẹ́ yin okànọ bo ma jọmẹ. Enẹwutu e dọna yé dọmọ: ‘Amẹ́ wẹ mìwlẹ. Mì ko wá nado dindona otò mítọn.’

Yé gblọn dọmọ: ‘Lala, mí ma yin amẹ́ gba. Ahundoponọ wẹ míwlẹ. Nọvi-nọvi wẹ mímẹpo. Mí omẹ 12 wẹ. Ṣigba dopo to mí mẹ masọ tin ba, podọ pòdevi lọ tin to whégbè po otọ́ mítọn po.’

Josẹfu yinuwa taidi dọ e ma yí yé sè. E wle nọvisunnu yetọn Simeọni do gànpamẹ bo na dotẹnmẹ mẹhe pò lẹ nado hẹn núdùdù yì whé. Ṣigba e dọna yé dọmọ: ‘Eyin mì lẹkọja, mì dona plan pòdevi mìtọn lọ wá.’

To whenuena yé lẹkọyi Kenani, yé dọ nuhe jọ lẹpo na otọ́ yetọn Jakọbu. Ehe hẹn Jakọbu blawu tlala. E viavi dọmọ: ‘Josẹfu ma tin ba, podọ todin Simeọni lọsu masọ tin ba. Yẹn ma na dike mì ni plan visunnu ṣie godo tọn Bẹnjamini yì gba.’ Ṣigba to whenuena núdùdù yetọn jẹ vivọ ji, Jakọbu to dandannu glọ nado dike yé ni plan Bẹnjamini yì Egipti nado sọgan họ̀ núdùdù susu dogọ.

Todin Josẹfu mọ nọvisunnu etọn lẹ lẹkọja. Homẹ etọn hùn taun nado mọ nọvi etọn Bẹnjamini. Na nugbo tọn, depope to yé mẹ ma yọnẹn dọ Josẹfu wẹ yin dawe nukundeji ehe gba. Todin Josẹfu yí nude wà nado whlé nọvisunnu-daa etọn 10 lẹ pọ́n.

E degbena devi etọn lẹ nado kọ̀n núdùdù do apò yetọn lẹ mẹ kaka yé ni gọ́. Ṣigba e sọ degbè dọ kọfo fataka tọn vonọtaun etọn ni yin zizedo apò Bẹnjamini tọn mẹ bọ nọvisunnu etọn lẹ ma na yọnẹn. To whenuena yemẹpo dedo bo ma ko jẹ fidindẹn de, Josẹfu do devi etọn lẹ hlan nado jẹgodona yé. Devi lọ lẹ wá plá yé bo dọna yé dọmọ: ‘Etẹwutu mì do fìn kọfo fataka ogán mítọn tọn?’

Nọvisunnu lọ lẹpo gblọn dọmọ: ‘Míwlẹ ma fìn kọfo etọn nẹ. Eyin mì mọ kọfo lọ to mẹde si to mí mẹ, mì bo hù mẹlọ.’

Devi lọ lẹ jẹ apò yetọn lẹ mẹ pọ́n ji bo wá mọ kọfo lọ to apò Bẹnjamini tọn mẹ, dile a sọgan mọ do to yẹdide ehe mẹ. Devi lọ lẹ dọmọ: ‘Mì mẹhe pò lẹ sọgan yì, ṣigba Bẹnjamini dona lẹkọ po mí po.’ Etẹwẹ nọvisunnu-daa 10 lọ lẹ na wà todin?

Yemẹpo lẹkọ po Bẹnjamini po yì owhé Josẹfu tọn gbè. Josẹfu dọna nọvisunnu etọn lẹ dọmọ: ‘Mì mẹhe pò lẹpo sọgan yì whé, ṣigba Bẹnjamini dona lẹzun afanumẹ ṣie tofi.’

Todin Juda yihó bo dọmọ: ‘Eyin yẹn jo ovi lọ do bo lẹkọyi whé, otọ́ ṣie na kú na e yiwanna ẹn taun. Enẹwutu jaale, gbọ yẹn ni nọfi taidi afanumẹ towe, bo dike ovi lọ ni yì whé.’

Josẹfu wá mọ to whenẹnu dọ mẹdaho etọn lẹ ko diọ. Yé masọ yin okànọ podọ mẹhe ma jọmẹ lẹ ba. Gbọ mí ni pọ́n nuhe Josẹfu wà todin.