Kanbiọ lẹ sọn Wehiatọ lẹ Dè
Be Josẹfu, devizọnwatọ nugbonọ Jehovah tọn, nọ yí kọfo fataka tọn vonọtaun de zan nado mọnú kavi dín sọgodo pọ́n, dile e yin didọ do to Gẹnẹsisi 44:5 mẹ wẹ ya?
Whẹwhinwhẹ́n depope ma tin nado lẹndọ Josẹfu yí dọṣẹdidọ kavi afinyọnnuwiwa wunmẹ depope zan gba.
Biblu do nukunnumọjẹnumẹ he sọgbe Josẹfu tọn gando bojijlẹ yiyizan nado dindona sọgodo go hia. Jẹnukọn, to whenuena e yin bibiọ to e si nado detana odlọ Falo tọn lẹ, Josẹfu zinnudeji pludopludo dọ Jiwheyẹwhe kẹdẹ wẹ sọgan na “ogbè gblọn” nujijọ he ja to sọgodo lẹ tọn. Taidi kọdetọn de, Falo lọsu wá yise dọ e ma yin huhlọn aovi lẹ tọn wẹ gba, ṣigba Jiwheyẹwhe he Josẹfu nọ sẹ̀n lọ—Jiwheyẹwhe nugbo lọ—wẹ hẹn Josẹfu nado yọ́n zẹẹmẹ gigọ́ gando sọgodo go. (Gẹnẹsisi 41:16, 25, 28, 32, 39) To godo mẹ, to Osẹ́n he wá yin nina Mose mẹ, Jehovah gbẹ́ bojijlẹ kavi dọṣẹdidọ, na Ewọ ṣokẹdẹ wẹ nọ dọ dọdai dogbọn sọgodo dali.—Deutelonomi 18:10-12.
Ṣigba, naegbọn Josẹfu do dọ gbọn devizọnwatọ etọn dali dọ emi nọ yí kọfo fataka tọn de zan nado “mọnú nugbonugbo”?a (Gẹnẹsisi 44:5) E jẹ dọ mí ni gbadopọnna ninọmẹ he mẹ hogbe lọ yin didọ te lẹ.
Na huvẹ sinsinyẹn de wutu, nọvisunnu Josẹfu tọn lẹ zingbejizọnlin yì Egipti nado dín núdùdù. To owhe susu die jẹnukọn, nọvisunnu ehelẹ ko sà Josẹfu do kanlinmọgbenu. Todin, to mayọnẹn mẹ, yé biọ alọgọ sọn nọvisunnu yetọn dè, mẹhe ko lẹzun anadenanutọ núdùdù tọn to Egipti. Josẹfu ma do ede hia yé gba. Kakatimọ, e magbe nado tẹ́n yé pọ́n. Po whẹwhinwhẹ́n po, Josẹfu jlo nado yọ́n nugbo-yinyin lẹnvọjọ yetọn tọn. E sọ jlo nado dindona eyin yé yiwanna nọvisunnu yetọn Bẹnjamini po otọ́ yetọn, Jakobu po, mẹhe tindo owanyi vonọtaun na Bẹnjamini podọ e sọ jlo na yọ́n obá he mẹ owanyi yetọn jẹ ga. Enẹwutu, Josẹfu kàn ayiha de.—Gẹnẹsisi 41:55–44:3.
Josẹfu degbena devizọnwatọ etọn dopo dọ e ni bà gbado gọ́ apò nọvisunnu etọn lẹ tọn, bo gọ̀ akuẹ dopodopo yetọn tọn do onù apò lọ lẹ tọn, bosọ ze kọfo fataka tọn Josẹfu tọn do onù apò Bẹnjamini tọn tọn. To ehe lẹpo mẹ, Josẹfu to ede dohia taidi anadenanutọ aigba kosi tọn de. E hẹn ede, nuyiwa etọn, po hogbe etọn lẹ po sọgbe hẹ walọ anadenanutọ kosi de tọn, dile e na taidi do to nukun nọvisunnu homẹvọnọ etọn lẹ tọn mẹ.
To whenuena Josẹfu wá pannukọn nọvisunnu etọn lẹ, e zindonukọn to mẹkiklọ etọn mẹ, bo kanbiọ yé dọmọ: “Mì ma yọnẹn dọ omẹ di yẹn hunkọ sọgan mọnú?” (Gẹnẹsisi 44:15) Enẹwutu, kọfo lọ lọsu matin ayihaawe yin apadewhe oklọ lọ tọn. Kọfo yiyizan Josẹfu tọn nado dín sọgodo ma yin nugbo gba kẹdẹdile ajojijẹ Bẹnjamini tọn lọsu ma yin nugbo do.
[Nudọnamẹ Odò Tọn]
a To zẹẹmẹ bibasi do walọ hohowhenu tọn ehe ji mẹ, The Holy Bible, With an Explanatory and Critical Commentary, zinjẹgbonu F. C. Cook tọn, dọmọ: Dọṣẹdidọ gbọn kọfo yiyizan dali “nọ yin bibasi gbọn vlavo sika, fataka, kavi aṣọ́donu lẹ zizedlan osin mẹ, podọ to enẹgodo pọ́n awusọhia yetọn dali; kavi gbọn osin tata mẹ pinpọn taidi mẹpọ́nnu de dali.” Zẹẹmẹ basi do Biblu ji tọ́, Christopher Wordsworth dọmọ: “To whedelẹnu, osin nọ yin bibà gọ́ kọfo lọ, bọ gblọndo lọ nọ yin nina gbọn pinpọn awusọhia owhè he yin mimọ to osin kọfo lọ tọn mẹ dali.”