Agun lẹ Nado Hẹnmẹ Lodo to Owanyi po Pọninọ po Mẹ — WESẸDOTẸN INTẸNẸT JI TỌN Watchtower Tọn

Agun lẹ Nado Hẹnmẹ Lodo to Owanyi po Pọninọ po Mẹ

Hiẹ sọgan ko yì opli agun tọn delẹ he yin Kunnudetọ Jehovah tọn lẹ tọn he sẹpọ nọten towe. Gbẹtọ sọn ada gbẹ̀zan tọn lẹpo mẹ—pipli whẹndo tọn lẹ, gbẹtọ tlẹnnọ lẹ, yọnhonọ po jọja po—tin to finẹ. Yemẹpo to sinsẹ̀n yetọn basi to pọninọ mẹ bo tindo ojlo to alọgọ nina mẹdevo lẹ mẹ.

To tito-bibasi depope mẹ fie sọha gbẹtọ susu tọn lẹ jlo na wazọn to pọninọ mẹ te, nuhudo nugopinpọn tọn delẹ nọ tin janwẹ. Jiwheyẹwhe yin Jiwheyẹwhe onú-nọ-nútẹnmẹ tọn; enẹwutu, onú-nọ-nútẹnme enẹ dona sọawuhia to agun omẹ etọn lẹ tọn mẹ. Kẹdẹdile na e te do to owhe kanweko tintan whenu, mọdopolọ ga to egbehe, Klistiani sunnusi he tindo jẹhenu lẹ, whẹn, bo tindo numimọ lẹ nọ yin didè taidi mẹho lẹ, kavi nugopọntọ lẹ. Omẹ ehelẹ nọ pọn agun lọ go bo nọ penukundo nuhudo gbigbọmẹ tọn etọn lẹ go. Yé nọ yin alọgọna gbọn sunnusi nugbonọ devo lẹ dali he yin yinyọnẹn taidi devizonwatọ lizọnyizọnwiwa tọn lẹ. Sunnusi ehelẹ ma nọ mọ osunmẹ-kuẹ depope kavi alemọyi akuẹ tọn devo depope yí gba ṣigba nọ wà sinsẹnzọn sọn ojlo mẹ wá, bo nọ penukundo akuẹzinzan yetọn titi lẹ go na yede sọn agbasazọn yetọn lẹ mẹ.—1 Kọlintinu lẹ 14:33, 40; Filippinu lẹ 1:1; 1 Timoti 3:8, 9.

Nawẹ omẹ ehelẹ nọ yin didè gbọn? Yé dona yin devizọnwatọ nugbonọ Jiwheyẹwhe tọn lẹ mẹhe do jẹhẹnu Owe wiwe tọn delẹ hia. Delẹ to ehelẹ mẹ yin: yinyin ‘mẹdehọ́tọ, huwhẹnọ, owalọ dagbenọ, ojohẹmẹtọ, mẹplọntọ, podọ lẹnpọn dagbenọ, e ma yin mẹhe yiwanna akuẹ gba; mẹhe pe owhé etọn ji talala, agblinọ de ma wẹ gba, humọ e do na do oyin dagbe to yé he tin to gbonu lẹ de’; ‘mẹhe hẹn ohó nugbo go gligli na nuhe du mẹpinplọn.’—1 Timoti 3:1-15; Titu 1:7-9.

Omẹ ehelẹ ma nọ yin ovoblana biọ azọ́n lọ mẹ gbọn agun lọ dali gba, fie sọha suhugan lẹ to whedelẹnu sọgan yin Klistiani yọyọ lẹ te. Kakati nido yin mọ, yé nọ yin pipa gbọn sunnusi he whẹn bo tindo numimọ lẹ bo yin mẹho lẹ dali he tindo wuntuntun na nuhe du oba he mẹ mẹhe yè to dogbapọnna tindo jẹhẹnu sọn Owe wiwe mẹ lẹ jẹ. Enẹgodo didè mẹho lẹ po devizọnwatọ lizọnyizọnwiwa tọn lẹ po tọn nọ yin bibasi to nugopinpọn Hagbẹ Anademẹtọ Kunnudetọ Jehovah tọn lẹ tọn glọ, ehe hodo apajlẹ he yin zizedai gbọn agun Klistiani tọn lọ dali to owhe kanweko tintan mẹ.

Mẹho ehelẹ, kavi nugopọntọ lẹ, ma nọ wleawuna hagbẹ sinsẹ̀ngán tọn de gba; yé ma yin ogán to mẹdevo lẹ ji gba. Dile na Jesu dọ do, mẹdepope he yin nukọntọ dona yin afanumẹ mẹlẹpo tọn. To agun Kunnudetọ Jehovah tọn lẹ tọn mẹ, mẹho lẹ na nugbo tọn yin azọ́nwàhẹmẹtọ lẹ na Ahọluduta Jiwheyẹwhe tọn.—Matiu 20:26, 27; 23:8-11; Lomunu lẹ 12:8; 1 Kọlintinu lẹ 3:5; 4:1, 2; Kọlọsinu lẹ 4:11; 1 Tẹsalonikanu lẹ 5:12-14.

Taidi nugopọntọ lẹ, ye nọ penukundo nuplọnmẹ he yin awuwlena to opli lẹ go bo nọ yin nukọntọ to azọ́n kunnudide tọn mẹ. Kunnudide wẹndagbe Ahọluduta tọn lẹdo aigba-denamẹ etọn pe yin yanwle tintan agun lọ tọn. Nugopọntọ lẹ sọ nọ wàdevizọn taidi lẹngbọhọtọ lẹ, bo nọ basi dlapọn na hagbẹ agun lọ tọn lẹ nado na tuli yé dile na nuhudo etọn na te do.—Matiu 24:14; Owalọ lẹ 1:8; 1 Tẹsalonikanu lẹ 2:11, 12; 5:14, 15; 2 Timoti 2:24-26; Heblu lẹ 13:17; Jakobu 5:13-16; 1 Pita 5:1-4.

Mẹho lẹ sọ tindo azọngban lọ nado wọhẹmẹ bo do mẹplọnlọ mẹdepope go he sọgan to hihodo aliho agọ de bo sọgan yin owu hlan wiwejininọ gbigbọmẹ tọn po walọyizan tọn po podọ hlan pọninọ agun lọ tọn ga.—1 Kọlintinu lẹ 5:4, 5, 7, 11-13; Titu 1:9; 2:15; 3:10, 11.

Gbẹdido whepoponu tọn hẹ agun lọ na na we họntọnjihẹmẹ dagbe po alemọyi gbigbọmẹ ton susu lẹ po.—Psalm 35:18; 84:10.

• Mẹnu lẹ wẹ nọ penukundo whẹho agun dopodopo tọn lẹ go?

• Dòdonu tẹ ji wẹ nugopọntọ lẹ nọ yin didè te?

• Etẹwẹ yin azọngban yetọn lẹ?

[Yẹdide to weda 13]

Nugopọntọ lẹ nọ plọn agun lọ, nọ yin nukọntọ to kunnudide sọn whedegbe jẹ whedegbe mẹ, nọ na tulimẹ gbọn dlapọn lẹngbọhihọ́ tọn lẹ dali, nọ na ayinamẹ po wọhẹmẹ po whenuena nuhudo etọn tin