Opli lẹ Nado Jlahomẹdonamẹ to Owanyi po Azọ́n Dagbe lẹ po Mẹ
Klistiani fliflimẹ tọn lẹ nọ saba pli dopọ, to owhé mẹtọn lẹ gbe, nado mọ oplọn yí podọ nado duvivi yenọzo hinhẹnlodo tọn. To egbehe, agun Kunnudetọ Jehovah tọn lẹ tọn nọ pli whla atọ̀n to osẹ mẹ. Hiẹ yin yiylọ nado wá dopo to opli ehelẹ tẹnmẹ. Opli yetọn lẹ ma yin sinsẹ̀n-fọdide tata lẹ gba, ṣigba yé nọ sinai do nuplọnmẹ sọn olọn mẹ wá ji. Opli agun tọn lẹ nọ yin bibẹjẹeji bo yin tadona po ohan po odẹ̀ po. Opli lẹ wiwá yin vọnu, podọ akuẹ-ṣinṣinyan de ma nọ yin bibasi gba.—Owalọ lẹ 4:23-31; 14:22; 15:32, 35; Lomunu lẹ 16:5; Kọlọsinu lẹ 4:15.
E sọgan yindọ opli tintan he hiẹ na yì wẹ yin hodidọ na gbẹtọ lẹpo nukunwhiwhe-45 tọn lọ, he nọ sinai do nuplọnmẹ Biblu tọn lẹ ji, dọdai, kavi ayinamẹ do gbẹninọ Klistiani tọn ji. Jẹgodona hodidọ ehe, oplọn Biblu tọn de tin, he yin yiyizan hosọ dopo tọn sọn Atọ̀họ̀-Nuhihọ́ Lọ Tọn mẹ he yin tito-basina titengbe na oplọn agun tọn. Oplọn lọ nọ hodo afọdide ehe: Hukan de nọ yin hihia sọn Atọ̀họ̀-Nuhihọ́ Lọ Tọn mẹ, podọ anademẹtọ lọ nọ kan kanbiọ lẹ biọ do hosọ lọ ji he mẹhe tin to mẹplidopọ lọ mẹ lẹ sọgan na gblọndo na gbọn alọ yetọn zize daga dali. Gblọndo susu lẹ nọ saba yin nina do hukan dopodopo ji. Opli lọ nọ dẹn họ̀ ganhiho dopo.
To nukọnmẹ to osẹ lọ mẹ, opli nukunwhiwhe-45 tọn awe devo lẹ nọ yin bibasi. Dopo yin Wehọmẹ Lizọnyizọn Yẹwhehọluduta Tọn. E nọ wleawuna na nupinplọn do lehe yè sọgan bẹ nudọnamẹ lẹ pli do nuplọnmẹ Biblu tọn lẹ ji do podọ nado plọnnumẹ po kọdetọn dagbe po. Jẹgodona nuplọnmẹ titengbe nukunwhiwhe 21 tọn, wehọmẹvi lẹ he ko yin azọ́ndena donukọn nọ na hodidọ kleun kleun lẹ. To hodidọ dopodopo godo, anademẹtọ wehọmẹ lọ ton nọ na ayinamẹ nado dohia lehe wehomẹvi lọ sọgan hẹn hózedonukọnnamẹ etọn pọnte do. Anademẹwe susu lẹ ko yin awuwlena na yizan to wehọmẹ ehe. Mẹhe nọ yì opli to gbesisọ mẹ lẹ sọgan ze yinkọ dai, eyin yé ko to gbẹ̀nọ to aliho he sọgbe hẹ nunọwhinnusẹn Klistiani tọn lẹ ji.
Opli he bọdego lọ yin yiylọ dọ Opli Sinsẹnzọn Tọn. E nọ tindo ada atọ̀n kavi ẹnẹ he nọ sinai do wẹndagbe lọ zizedonukọnnamẹ ji son whedegbe jẹ whedegbe po ada lizọnyizọn lọ tọn devo lẹ po. Ada ehelẹ nọ yin zizedonukọnnamẹ taidi hodidọ lẹ, hodọdopọ lẹ, kavi wadohia lẹ, po mahẹ tintindo mẹplidopọ lẹ tọn delẹ po. Susu hugan tito-to-whinnu lọ ton nọ sinai do hosọ he tin to Lizọnyizọn Ahọluduta Tọn Mítọn mẹ ji, wema nuplọnmẹ tọn weda ẹnẹnọ de he nọ yin zinjẹgbonu to sunmẹsunmẹ gbọn Ogbẹ́ Watch Tower dali.
Opli atọ̀ntọ lọ yin oplọn sẹmẹsẹmẹ tọn de he nọ yin bibasi to pipli pẹvi pẹvi lẹ mẹ, e nọ saba yin to owhé mẹtọn titi lẹ gbe lẹdo aigba-denamẹ agun lọ tọn pe. Oplọn lọ nọ sinai do Biblu po owe he yin zinjẹgbonu agọe gbọn Ogbẹ́ dali po ji. Dile na pipli lọ yin pẹvi de, dotẹnmẹ hundote dagbe hugan de tin na mẹlẹpo nado tindo mahẹ to hodọdopọ lọ mẹ, podọ dotẹnmẹ hundote dagbe de sọ tin na mẹhe nọ wá lẹ nado jẹakọ hẹ ode awetọ yetọn ganji.
Suhugan agun lẹ tọn nọ basi opli yetọn lẹ to Plitẹnhọ Aholuduta Tọn de mẹ he yin gbigbá gbọn Kunnudetọ Jehovah tọn lẹ dali. Akuẹzinzan eton lẹ nọ yin nukunpedego gbọn akuẹ nina sọn ojlo mẹ wá lẹ dali sọn Kunnudetọ lẹ lọsu de, podọ to whẹho suhugan lẹ mẹ azọ́n lọ nọ yin wiwà matin ahọsusu na azọnwatọ mẹdezejotọ lẹ. Apotin nunina tọn lẹ tin to aimẹ to opli lẹpo whenu na yizan mẹhe na jlo nado yí akuẹ do e mẹ lẹ tọn.
Opli agun tọn lẹ nọ gọalọna Kunnudetọ Jehovah tọn lẹ nado hodo ayinamẹ he tin to Heblu lẹ 10:24, 25 mẹ: “Mì gbọ mí ni sọ nọ lẹn mínọzo tọn pọn nado jlahomẹdona to owanyi po azọn dagbe lẹ po mẹ: to magbẹ opli míde tọn mẹ, dile jijọ mẹdelẹ tọn te: ṣigba mí ni nọ to homẹjladona mínọzo; humọ na le [mí] mọ dọ azan lọ to sisẹpọ.”
• Ninọmẹ opli Klistiani fliflimẹ lẹ ton tẹlẹ wẹ sọgan yin mimọ to opli Kunnudetọ Jehovah tọn lẹ tọn mẹ?
• Basi zẹẹmẹna nuhe nọ yin didohia to opli atọ́n he nọ yin bibasi to gbesisọ mẹ gbọn Kunnudetọ lẹ dali tọn.
• Nawẹ plitẹnhọ lẹ nọ yin gbigbá gbọn?
[Yẹdide lẹ to weda 14]
Mẹho de to anadena Oplọn Atọ̀họ̀-Nuhihọ́ lọ Tọn, to Etats-Unis
Wadohia sọn Wehọmẹ Lizọnyizọn Yẹwhehọluduta Tọn mẹ, to Ageklo Féroé lẹ mẹ
Oplọn pipli pẹvi de tọn to owhé mẹtọn de gbe, to Yap
Plitẹnhọ Ahọluduta Tọn, New Braunfels (Etats-Unis), he yin gbigbá to azan awe mẹ gbọn Kunnudetọ Jehovah tọn lẹ dali
[Yẹdide lẹ to weda 15]
Plitẹnhọ Ahọluduta Tọn Lẹ to otò vovo lẹ mẹ
Japon
Australie
Autriche
Espagne