Lizọnyizọnwàtọ Whenu-Gigọ Tọn lẹ to Nukọntọ Yin to Azọ́n Yẹwhehodidọ Tọn lọ Mẹ

E sọgan yindọ Kunnudetọ Jehovah tọn tintan he basi dlapọn na we yin lizọnyizọnwatọ gbehosọnalitọ whenu-gigọ tọn de kavi mẹdehlan de. Dile e ko yindọ Kunnudetọ Jehovah tọn lẹ ma tindo lizọnyizọn ahọsumẹ tọn de, e sọgan ko paṣa we lehe omẹ ehelẹ sọgan ko do alọ to lizọnyizọn lọ mẹ na whenu gigọ do.

Kunnudetọ Jehovah tọn lẹpo he ko klan yede do wiwe bo lẹyẹwhesin wẹ yin lizọnyizọnwatọ lẹ, ṣigba sọha suhugan lọ tindo whẹndo kavi azọngban devo lẹ he nọ glọnali na ye sọn zize hugan ganmẹ vude lẹ jo to osẹ dopo mẹ na lizọnyizọn yetọn. Ṣigba, fọtọ́n fọtọ́n Kunnudetọ lẹ tọn lẹdo aihọn pe ko dealọpona nujinọtedo gbẹninọ tọn yetọn na yé nido sọgan penukundo akuẹzinzan yetọn he yin didepo lẹ go po agbasazọn whenu-gli tọn po podọ to whelọnu nọ zan ganmẹ 1 000 kavi hú mọ to owhe dopo mẹ na lizọnyizọn lọ.

Nugbo, lizọnyizọnwatọ gbehosọnalitọ whenu-gigọ tọn lẹ ma tindo akuẹ susu nado zan na yedelẹ gba, ṣigba na yewlẹ ehe wẹ yin aliho de nado din Ahọluduta Jiwheyẹwhe ton whẹ. Podọ yé nọ mọ dona susu lẹ yí. Nado penugo do dọho na mẹdevo lẹ dogbọn Ohó Jiwheyẹwhe tọn dali na ganhiho 90 to osun dopo mẹ yin numimọ dagbe de to ede mẹ. Lizọnyizọnwatọ whenu-gigọ tọn nọ hẹn nugopipe etọn to lizọnyizọn lọ mẹ pọnte dogọ bo sọ nọ tindo whenu nado doafọna ojlo lọ dile e jẹ do. Ehe nọ hẹn kọdetọn tulinamẹ tọn lẹ wá. Yé tindo nuhe sin nuhudo yé tindo to agbasa-liho lẹ, podọ yé sọ nọ yọn pinpẹn nutọn talala na nuhe yé tindo lẹ.—Matiu 6:33.

To février 1943, Ogbẹ́ Watch Tower ze Wehọmẹ Watchtower Biblu Gileadi tọn dai. Yanwle lọ wẹ yin nado plọnnu lizọnyizọnwatọ gbehosọnalitọ whenu-gigọ tọn he tindo numimọ lẹ nado wadevizọn taidi mẹdehlan lẹ to otò jonọgbeji tọn lẹ mẹ. Nupinplọn osun-atọ́n tọn lọ bẹ oplọn Biblu tọn sisosiso de hẹn, otan Biblu tọn, agun Jehovah tọn, po hosọ he gando e go lẹ po na awuwlena sinsẹnzọn to aigba jonọgbeji tọn lẹ ji.

Ogbẹ́ nọ sú húndokuẹ sọyi fidenamẹ mẹdehlan tọn lọ bo nọ wleawudai na núdùdù dagbe lẹ po adọtẹn jlẹkaji tọn lẹ po to owhé mẹdehlan tọn lẹ gbe. E sọ nọ na mẹdehlan dopodopo apomẹkuẹ kleun de na akuẹzinzan mẹdetiti ton etọn lẹ. Mẹdehlan lẹ nọ penukundo azọn whegbe tọn lẹ go gbọn ahiwhiwhle, núdùdù lẹ dida, po nọtẹn lẹ jijlado po go dali. Po nukunpipedo nugo sọgbe hẹ lẹnpọn dagbe ehe po mẹdehlan lẹ nọ penugo nado ze, e whe gbahu, ganhiho 140 dai to osun dopo mẹ na yẹwhehodidọ sọn whedegbe jẹ whedegbe po Biblu pinplọn gbẹtọ jlodotọ lẹ po.

Susu mẹdehlan ehelẹ tọn yin didè dohlan ofi dindẹn do owhé po whẹndo yetọn lẹ po yì kilomẹtlu fọtọ́n susu lẹ. E biọ dọ ye ni basi vọjlado na nujinọtedo gbẹ̀ninọ tọn he gbọnvo de po aṣa jọwamọ tọn po, na walọ núdùdù tọn yọyọ lẹ, na jẹhọn he gbọnvo de, podọ na ogbè devo dido tọn. Yé to azọ́n ehe wà na yé yiwanna gbẹtọ lẹ bosọ tindo ojlo sinsinyẹn de nado gọalọna yé na yé ni plọnnu dogbọn Ahọluduta Jiwheyẹwhe tọn dali.

Bẹsọn 1943 kaka jẹ 1985, Wehọmẹ Watchtower Biblu Gileadi tọn ko deanana pipli vovo 80 bo ko do hugan mẹdehlan 6 000 lẹ hlan. To nukunpedonugo Ogbẹ́ tọn glọ, omẹ ehelẹ ko to nukọntọ yin to hẹngblo oplọn Biblu tọn mẹ lẹdo Afrique, Amérique Ṣẹnṣẹn po Huwaji tọn po, Whezẹtẹn, po Pacifique Huwaji tọn po pe podọ yé ko wà nususu dotana to Europe.

Eyin vlavo Kunnudetọ Jehovah tọn lẹ to mahẹ tindo to lizọnyizọn lọ mẹ na whenu-gigọ taidi gbehosọnalitọ lẹ kavi mẹdehlan lẹ kavi na ojlẹ gli tọn wẹ o, yé nọ wà sinsẹ̀nzọn matin alemọyi akuẹ tọn lẹ. Yé nọ zan whenu yetọn titi lẹ po akuẹ yetọn po yedelẹ po nado gọalọna mẹdevo lẹ nado mọ oyọnẹn he nọ planmẹ sọyi ogbẹ̀ madopodo mẹ yí.—Johanu 17:3.

• Nawẹ delẹ to Kunnudetọ Jehovah tọn lẹ mẹ penugo nado ze whenu gigọ yetọn jo na lizọnyizọn lọ gbọn, podọ etẹwutu yé nọ wà ehe?

• Nawẹ lizọnyizọnwatọ lẹ nọ mọ oplọn yí na azọn mẹdehlan tọn lọ gbọn?

• Nawẹ mẹdehlan lẹ nọ yin godonọna to azọndenamẹ jonọgbeji tọn yeton mẹ gbọn?

[Yẹdide lẹ to weda 22]

Amiyọnmẹ: Wehọsa Wehọmẹ Gileadi tọn, to Brooklyn, N.Y., Etats-Unis d’Amérique

Adusimẹ: Mẹdehlan de to Ohó Jiwheyẹwhe tọn plọnmẹ to Papouasie Nouvelle-Guinée

[Yẹdide lẹ to weda 23]

Lizọnyizọnwatọ gbehosọnalitọ po mẹdehlan lẹ po to yẹwheho Ohó Jiwheyẹwhe tọn tọn dọ to otò wunmẹ-wunmẹ lẹ mẹ

Brésil

République Dominicaine

Espagne

Sierra Leone (Afrique)