Todido Tẹwẹ Tin Na Mẹyiwanna He Kú Lẹ?

“Eyin omẹ de ku, be ewọ na sọ nọgbẹ ba?” wẹ dawe Job lọ kanbiọ sọn ojlẹ dindẹn de die. (Job 14:14) Vlavo ehe sọgan ko paṣa hiẹ lọsu ga. Etẹwẹ na yin numọtolanmẹ towe eyin hiẹ yọnẹn dọ pọjijẹ whladopo dogọ de po mẹyiwanna towe lẹ po na yọnbasi tofi to aigba ji to ninọmẹ dagbe hugan lẹ glọ?

Eyọn, Biblu dopagbe dọmọ: “Oṣiọ towe lẹ na nọgbẹ̀. . . . Ye na fọn.” Podọ Biblu sọ dọmọ: “Dódónọ wẹ na dugu aigba tọn, bo na sọ nọ nọ̀ e mẹ kakadoi.”—Isaia 26:19; Psalm 37:29.

Nado tindo jidide nujọnu tọn to opagbe mọnkọtọn lẹ mẹ, mí tindo nuhudo nado na gblọndo na kanbiọ dòdonu tọn delẹ: Etẹwutu gbẹtọ lẹ do nọ ku? Fie wẹ oṣiọ lẹ te? Podọ nawẹ mí sọgan deji dọ ye sọgan nọgbẹ̀ whladopo dogọ gbọn?

Oku, po Nuhe Nọ Jọ to Whenue Mí Kú po

Biblu hẹn họnwun dọ Jiwheyẹwhe sọn dowhenu ma tindo linlẹn dọ gbẹtọ lẹ ni nọ ku gba. Ewọ da gbẹtọ asu po asi po tintan lọ yedọ Adam po Evi po, bo dotẹn na ye do paladisi aigba ji tọn de mẹ he yin yiylọ dọ Edẹni, bo degbena ye nado tindo ovi lẹ bo dlẹnkan na owhé Paladisi tọn yetọn lẹdo aigba lọ pe. Eyin ye vẹtoli na gbedide etọn lẹ kẹdẹ wẹ ye na do ku.—Gẹnẹsisi 1:28; 2:15-17.

Matin pinpẹn nutọn yinyọnẹn na dagbewà Jiwheyẹwhe tọn, Adam po Evi po vẹtoli bo yin hinhẹn nado su ahọ oyajiji he yin kinkandai lọ tọn. Jiwheyẹwhe dọ na Adam dọ, “Hiẹ [na] gọ do aigba de; na e mẹ wẹ ye ko dè we sọn: na kọgudu wẹ hiẹ, hlan kọgudu de wẹ hiẹ na sọ gọ do.” (Gẹnẹsisi 3:19) Jẹnukọnna dida etọn Adam ma ko tin; kọgudu wẹ ewọ ko yin. Podọ na tolivivẹ kavi ylando etọn, Adam yin whẹgbledo nado gọ do kọgudu de, yedọ ninọmẹ matin aimẹ tọn.

Nalete oku yin ma tin ogbẹ̀ tọn de. Biblu do vogbingbọn lọ hia: “Okú wẹ ale ylando tọn; ṣigba nunina Jiwheyẹwhe tọn wẹ ogbẹ̀ madopodo.” (Lomunu lẹ 6:23) To didohia dọ oku yin ninọmẹ nude mayọnẹn tọn pete de mẹ, Biblu dọmọ: “Na mẹhe to ogbẹ̀ yọnẹn dọ emi na ku; ṣigba oṣiọ lẹ ma yọn nude.” (Yẹwhehodọtọ 9:5) Whenuena omẹ de ku, Biblu basi zẹẹmẹ dọ: “Gbọfufu etọn tọn yì, ewọ sọ gọ do okọ etọn de; to azán enẹ gbe gee linlẹn etọn lẹ sudo.”—Psalm 146:3, 4.

Ṣigba dile e yin dọ Adam po Evi po kẹdẹ wẹ vẹtoli na gbedide enẹ lọ to Edẹni mẹ, etẹwutu wẹ mímẹpo do nọ ku? Na mímẹpo yin jìjì to tolivivẹ Adam tọn godo wutu wẹ, podọ nalete mímẹpo dugu ylando po oku po tọn sọn ewọ de. Dile na Biblu basi zẹẹmẹ do: “Ylando gbọn omẹ dopo [Adam] de biọ aihọn mẹ, podọ oku gbọn ylando dali; mọwẹ gbẹtọ lẹpo ku do.”—Lomunu lẹ 5:12; Job 14:4.

Etomọṣo mẹde sọgan kanse dọmọ: ‘Be gbẹtọ lẹ ma tindo alindọn jọmaku de he nọ lùn oku tọ́n wẹ ya?’ Omẹ susu lẹ ko plọnmẹ ehe, bo tlẹ dọ dọ oku yin họntonu de na ogbẹ̀ devo. Ṣigba linlẹn enẹ ma wá sọn Biblu mẹ gba. Kakati ni yin mọ, Oho Jiwheyẹwhe tọn plọnmẹ dọ hiẹ yin alindọn de, dọ alindọn towe na taun tọn yin hiẹ, po jẹhẹnu agbasamẹ tọn po apọnmẹ tọn towe lẹpo po. (Gẹnẹsisi 2:7; Jẹlemia 2:34; Howhinwhẹn lẹ 2:10) Podọ Biblu sọ dọmọ: “Alindọn he wàylando, e na ku.” (Ezekiẹli 18:4) Biblu ma plọnmẹ to fidepope dọ gbẹtọ tindo alindọn jọmaku he nọ lùn oku agbasa tọn lọ tọ́n gba.

Lehe Gbẹtọ lẹ Sọgan Nọgbẹ̀ Whladopo Dogọ Do

To whenuena ylando po oku po biọ aihọn mẹ godo, Jiwheyẹwhe dehia dọ lẹndai etọn wẹ dọ oṣiọ lẹ ni yin hinhẹn gọ wá ogbẹ̀ gbọn fọnsọnku de gblamẹ. Nalete Biblu basi zẹẹmẹ dọ: “Ablaham . . . [yọnẹn] dọ Jiwheyẹwhe tlẹ sọgan fọn [visunnu etọn Isaki] dote sọn oṣiọ lẹ mẹ.” (Heblu lẹ 11:17-19) Jidide Ablaham tọn ma yin agọ gba, na Biblu dọ dogbọn Ganhunupotọ lọ dali dọ: “E ma yin Jiwheyẹwhe oṣiọ lẹ tọn gba, adavo mẹhe to ogbẹ̀ lẹ tọn: na yemẹpo wẹ tin to ogbẹ̀ hlan ẹn.”—Luku 20:37, 38, New World Translation of the Holy Scriptures.

Mọwẹ, e ma yindọ Jiwheyẹwhe Ganhunupotọ lọ tindo huhlọn lọ kẹdẹ gba ṣigba e sọ tindo ojlo lọ nado fọn gbẹtọ he ewọ dè lẹ sọn oku. Jesu Klisti lọsu dọmọ: “Avo vo mì na ehe wutu blo: na ojlẹ lọ ja, to ehe mẹ omẹ he tin to yọdo mẹ lẹpo na sè ogbè etọn, bo na tọnjẹgbonu.”—Johanu 5:28, 29; Owalọ lẹ 24:15.

E ma dẹn to ehe didọ godo, Jesu pe gbẹtọgun oṣiọ-didi tọn de jẹgbonu sọn otodaho Islaeli tọn lọ he yin Naini mẹ. Dawe jọja oṣiọ lọ wẹ yin ovi dopo gee asuṣiọsi de tọn. To mimọ awufiẹsa sisosiso etọn mẹ, Jesu yin whinwhan po lẹblanu po. Enẹwutu, to hodọ na oṣiọ lọ, e degbe dọmọ: “Ovisunnu, yẹn dọ hlan we, Fọn.” Bọ dawe lọ sọ fọn, podọ Jesu sọ jo e hlan onọ etọn.—Luku 7:11-17.

Taidi to whẹho asuṣiọsi enẹ tọn mẹ, ayajẹ zẹjlẹgo daho devo sọ jọ whenuena Jesu basi dlapọn na owhé Jailu tọn, he yin ogan azinponọ sinagọgu Ju lẹ tọn tọn. Oviyọnnu etọn owhe 12 mẹvi lọ ku. Ṣigba whenue e wá owhé Jailu tọn gbe, ewọ yì oviyọnnu oṣiọ lọ de bo dọmọ: “Oviyọnnu, tite.” Podọ e sọ wà mọ.—Luku 8:40-56.

To nukọnmẹ, họntọn Jesu tọn Lazalọsi ku. Whenuena Jesu wá owhé etọn gbe, Lazalọsi ko yin oṣiọ na azán ẹnẹ. Dile e tlẹ tindo awufiẹsa siso sọ, nọviyọnnu etọn Malta do todido hia dọmọ: “Yẹn yọnẹn dọ e nasọ fọn to fọnsọnku mẹ to azán podo gbe.” Ṣigba Jesu yì yọdo lọ kọn, bo degbe na zannu lọ ni yin didesẹ, bo dawha ylọ ẹ: “Lazalọsi jẹgbonu wá.” Podọ ewọ sọ wà mọ!—Johanu 11:11-44.

Lẹnnupọn dinvie do ehe ji: Etẹwẹ yin ninọmẹ Lazalọsi tọn to azán ẹnẹ lẹ mẹ he ewọ yin oṣiọ? Lazalọsi ma dọ nudepope dogbọn tintin to olọn ayajẹ pete tọn de mẹ kavi olọnzodomẹ yasanamẹ tọn de mẹ gba, na nugbo tọn ehe ewọ na ko basi eyin ewọ ko tin to finẹ. Lala, Lazalọsi tin to ninọmẹ mayọ́n nudepope tọn pete mẹ to oku mẹ bo na ko gbẹ pò to mọ kaka jẹ “fọnsọnku mẹ to azán podo gbe” eyin Jesu ma ko fọn ewọ gọ wá ogbẹ̀.

E yin nugbo dọ azọnjiawu Jesu tọn ehelẹ ko yin alemọyi ojlẹ kleun tọn de, dile e ko yindọ mẹhe ewọ fọnsọnku lẹ sọ vọ ku. Ṣigba to owhe 1 900 lẹ die wayì ewọ na kunnudenu dọ, po huhlọn Jiwheyẹwhe tọn po, oṣiọ lẹ sọgan nọgbẹ̀ whladopo dogọ nugbonugbo! Enẹwutu gbọn azọnjiawu lẹ dali Jesu dohia to oba pẹvi de mẹ nuhe na jọ to aigba ji to Ahọluduta Jiwheyẹwhe tọn glọ.

Whenuena Mẹyiwanna Mẹtọn de Ku

Whenuena kẹntọ oku lọ linu mẹde, awufiẹsa towe sọgan klo, dile na etlẹ yindọ hiẹ sọgan tindo todido to fọnsọnku mẹ. Ablaham tindo yise dọ asi etọn na wá nọgbẹ̀ whladopo dogọ, ṣogan mí hia dọ “Ablaham sọ wá nado blawu na Sala podọ nado viavi na ẹn.” (Gẹnẹsisi 23:2) Podọ etẹwẹ dogbọn Jesu dali? Whenue Lazalọsi ku, ewọ yin “whinwhan to gbigbọ mẹ bọ yè sọ hẹn ewlọsu jẹtukla,” podọ to ojlẹ pẹde mẹ to enẹgodo ewọ “jo ede do na dasin.” (Johanu 11:33, 35, NW) Enẹwutu, whenuena mẹhe hiẹ yiwanna de ku, e ma yin ohia madogan tọn de nado viavi gba.

Whenue ovi de ku, e nọ sinyẹnawu taun na onọ lọ. Nalete Biblu yọn awufiẹsa vivẹ he onọ de sọgan mọtolanmẹ. (2 Ahọlu lẹ 4:27) Na nugbo tọn, e nọ sinyẹnawuna na otọ́ he mẹkudo lọ ga. “Yẹn wẹ na ko kú do otẹn towe mẹ,” wẹ yin avihan he Davidi do whenue ovisunnu etọn Absalọmi ku.—2 Samuẹli 18:33, NW.

Ṣogan, na hiẹ tindo jidide to fọnsọnku mẹ wutu, awubla towe ma na zẹjlẹgo gba. Dile na Biblu dọ do, hiẹ ma na “blawu . . . yedọ di omẹ delẹ he matindo todido” gba. (1 Tẹsalonikanu lẹ 4:13) Kakati nido yin mọ, hiẹ na dọn sẹpọ Jiwheyẹwhe to odẹ̀ mẹ, podọ Biblu dopagbe dọ “ewọ na sọ hẹn we dote.”—Psalm 55:22.

Adavo devo de yin didohia, owefọ Biblu tọn lẹpo wá sọn Biblu Wiwe lọ—Gun-Alada mẹ.