Weta 3

Ali Jladotọ lọ Yin Jiji

ELIZABẸTI ko dibla pọ́ ovi ji. To osun atọ̀n he wayi lẹ mẹ, Malia ko tin to e dè. Ṣigba todin ojlẹ ko wá na Malia nado dọ e zun whedenu podọ nado zin gbejizọnlin gaa yì whé to Nazalẹti. Na nudi osun ṣidopo dogọ ewọ lọsu na jivi.

E ma dẹn to whenuena Malia yì po godo, wẹ Elizabẹti jivi. Lehe e yin ayajẹnu do sọ to whenuena ovi lọ yin jiji po kọdetọn dagbe po bọ Elizabẹti po ovi lọ po tin to agbasalilo mẹ! To whenuena Elizabẹti do ovivu lọ hia kọmẹnu po hẹnnumẹ etọn lẹ po, yemẹpo jaya po e po.

Azán ṣinatọ̀n to jiji etọn godo, sọgbe hẹ Osẹ́n Jiwheyẹwhe tọn, ovivu de to Islaeli dona yin whẹ̀gbòna. Na nujijọ ehe wutu họntọn lẹ po hẹnnumẹ lẹ po nọ wá nado basi dlapọn. Yé dọ dọ ovi lọ dona yin yinkọ otọ́ etọn tọn dona, yèdọ Zakali. Ṣigba Elizabẹti zé ogbè daga. “Mọ ma gba” wẹ e dọ, “ṣigba Johanu wẹ yè na ylọ ẹ.” Flin dọ, yinkọ enẹ wẹ angẹli Gabliẹli dọ e dona yin didona ovi lọ.

Ṣigba, họntọn yetọn lẹ, jẹagọdo dọmọ: “[Hẹnnumẹ] towe de ma yin oyín he hunkọ gbede.” Enẹgodo, to alọ yiyi do basi dohia mẹ, yé kanse otọ́ lọ yinkọ he e jlo na dona ovi lọ. To wekannu de kinkanse mẹ, Zakali, hlan nupaṣamẹ mẹlẹpo tọn, wlan dọmọ: “Johanu wẹ oyín etọn.”

Po enẹ po, ogbè Zakali tọn hùn to azọ́njiawu liho. Hiẹ na flin dọ e hẹn nugopipe hodidọ etọn tọn bú to whenuena e ma yí nulila angẹli lọ tọn sè dọ Elizabẹti na ji ovi de. Eyọn, to whenuena Zakali dọho, e paṣa mẹhe tin to lẹdo lọ mẹ lẹpo bọ yé dọna yedelẹ dọmọ: “Etẹ wẹ ovi he na yin?”

Todin Zakali gọ́ na gbigbọ wiwe, bo yí ayajẹ daho do dọmọ: “Donanọ wẹ Oklunọ yin Jiwheyẹwhe Islaeli tọn, na e ko dlapọn, bo ko sọ basi ofligọ na omẹ etọn lẹ. E ko ze azò whlẹngán tọn de daga na mí to owhé devi etọn Davidi tọn gbè.” Na nugbo tọn “azò whlẹngán tọn” ehe, wẹ Oklunọ Jesu, he na yin jiji to madẹnmẹ. Gbọn ewọ dali, Zakali dọmọ, Jiwheyẹwhe na “na mí, dọ whinwhlẹn mí sọn alọ kẹntọ mítọn lẹ tọn mẹ, nido sẹn ẹn matin obudi, to wiwe po dodo po mẹ to nukọn etọn to azán mítọn lẹpo mẹ.”

Enẹgodo Zakali dọdọdai gando visunnu etọn Johanu go, dọmọ: “Podọ hiẹ, ovi, yẹwhegan Gigogán tọn wẹ yè na nọ ylọ we, na hiẹ na jẹnukọnna Oklunọ nado jla ali etọn lẹ do: nado na oyọnẹn whlẹngán tọn omẹ etọn lẹ, to desẹ ylando yetọn lẹ tọn mẹ, na ayiha lẹblanu Jiwheyẹwhe mítọn tọn tọn wutu; ehe mẹ wunkinkẹn sọn ojí aga wá dla mí pọ́n, nado họ́n do yé he sinai to zinvlu mẹ, po to oyẹ̀ okú tọn mẹ lẹ po ji; nado do afọ mítọn lẹ do ali jijọho tọn mẹ.”

To ojlẹ ehe mẹ Malia, he kunnudenu dohia dọ e gbẹ́ pò to yọnnu he ma ko wlealọ yin, ko gọ̀ wá whé to Nazalẹti. Etẹwẹ na jọ do e go eyin e wá họnwun dọ e ko mọhò? Luku 1:56-80; Levitiku 12:2, 3.

▪ Nawẹ Johanu whẹ́n hugan Jesu sọ?

▪ Onú tẹlẹ wẹ jọ to whenuena Johanu yin azán ṣinatọ̀n mẹvi?

▪ Nawẹ Jiwheyẹwhe lilẹ́ ayidonugo etọn hlan omẹ etọn lẹ gbọn?

▪ Azọ́n tẹwẹ yin dọdai etọn dọ na Johanu nado wà?