Weta 14
Devi Tintan Jesu Tọn Lẹ
TO AZÁN 40 godo to zungbo lọ mẹ, Jesu lẹkọwa Johanu dè, mẹhe baptizi i dai. E họnwun dọ dile e to dindọnsẹpọ, Johanu dlẹnalọdo e bo lá na mẹhe tin to finẹ lẹ dọmọ: “Pọ́n Lẹngbọvu Jiwheyẹwhe tọn, he ze ylando aihọn tọn yì. Ehe wẹ, ohó mẹhe tọn yẹn dọ, dọmọ, Dawe de ja to godo ṣie, mẹhe hugan mi: na e ko lẹzun nukọntọ na mi wutu.” Dile etlẹ yindọ Johanu whẹ́n mẹho hugan nafẹylọvi etọn Jesu, Johanu yọnẹn dọ e ko tin jẹnukọnna emi taidi omẹ gbigbọnọ de to olọn mẹ.
Ṣogan, osẹ kleun delẹ jẹnukọn, to whenuena Jesu wá nado yin bibaptizi, e họnwun dọ Johanu ma yọnẹn po nujikudo po dọ Jesu wẹ na yin Mẹssia lọ. “Yẹn ma sọ yọnẹn,” wẹ Johanu yigbe, “ṣigba na yè nido sọ ẹ hia na Islaeli, enẹwutu wẹ yẹn wá, bo yí osin do to bibaptizi.”
Johanu zindonukọn nado basi zẹẹmẹ na hosetọ etọn lẹ nuhe jọ to whenuena e baptizi Jesu dọmọ: “Yẹn mọ [gbigbọ] jẹte sọn olọn di apoe de, e jẹte do e ji. Yẹn ma sọ yọnẹn, ṣigba mẹhe do mi hlan nado yí osin do baptizi, ewọ wẹ dọ hlan mi, dọ, Ota mẹhe tọn ji hiẹ mọ, bọ [gbigbọ] jẹ do, bọ e nọte to e ji, ewọ lọ wẹ, mẹhe nọ yí [gbigbọ wiwe] do baptizi. Yẹn ko mọ ẹn, bo ko dekunnu dọ ehe wẹ Ovi Jiwheyẹwhe tọn.”
To azán awetọ gbè Johanu ṣite po devi etọn awe po. Whladopo dogọ, dile Jesu sẹpọ, e dọmọ: “Pọ́n Lẹngbọvu Jiwheyẹwhe tọn!” Na ehe wutu, devi Johanu Baptizitọ lọ tọn awe helẹ hodo Jesu. Dopo to yé mẹ wẹ Andlé, podọ e họnwun dọ omẹ awetọ lọ wẹ omẹ lọ lọsu he basi kandai onú helẹ tọn, mẹhe oyín etọn sọ nọ yin Johanu. Johanu ehe, sọgbe hẹ kunnudenu lẹ, sọ yin nafẹylọvi Jesu tọn ga, e họnwun dọ e yin visunnu nọviyọnnu Malia tọn, yèdọ Salomi.
To kọlilẹ bo mọ Andlé po Johanu po to hihodo e, Jesu kanse dọmọ: “Etẹwẹ mì to dindin?”
“Labbi,” wẹ yé kanse, “fie wẹ hiẹ nọ nọ̀?”
“Wá, mì nasọ mọ,” wẹ Jesu gblọn.
Nudi ogàn ẹnẹ mẹ wẹ to whèmẹ, podọ Andlé po Johanu po sọ nọ̀ hẹ Jesu na pipotọ azán lọ tọn. To enẹgodo Andlé yin whinwhàn sọmọ bọ e yawu nado dín nọvisunnu etọn, mẹhe nọ yin yiylọ dọ Pita mọ. “Míwlẹ ko mọ [Mẹssia] lọ,” wẹ e dọna ẹn. Podọ e sọ hẹn Pita wá Jesu dè. Vlavo Johanu to ojlẹ dopolọ mẹ dín nọvisunnu etọn Jakobu mọ bosọ hẹn ẹn wá Jesu dè; ṣogan, di aṣa etọn, Johanu dapana nudọnamẹ mẹdetiti tọn ehe sọn Wẹndagbe etọn mẹ.
To azán awetọ gbè, Jesu mọ Filippi, mẹhe wá sọn Betsaida, yèdọ tòdaho dopolọ he mẹ Andlé po Pita po wá sọn. E basi oylọ na ẹn dọmọ: “Hodo mi.”
To enẹgodo Filippi mọ Natanaeli, mẹhe sọ nọ yin yiylọdọ Batelemi, bo dọmọ: “Míwlẹ ko mọ ẹn, mẹhe Mose to Osẹ́n mẹ, po yẹwhegan lẹ po kanwe etọn, Jesu Nazalẹti tọn, ovi Josẹfu tọn.” Natanaeli tindo ayihaawe. “Be onú dagbe de sọgan tọ́n sọn Nazalẹti?” wẹ e kanse.
“Wá pọ́n,” wẹ Filippi vẹ̀ ẹ dọ. To whenuena yé to sisẹpọ Jesu, Jesu dọ dogbọn Natanaeli dali dọmọ: “Pọ́n Islaelinu nugbo, mẹhe mẹ oblu ma tin te!”
“Fie hiẹ yọ́n mi sọn?” wẹ Natanaeli kanse.
“Whẹpo Filippi ylọ we, whenuena hiẹ tin to ovotin glọ, yẹn ko mọ we,” wẹ Jesu gblọn dọ.
E paṣa Natanaeli. “Labbi [he zẹẹmẹdo Mẹplọntọ], hiẹ wẹ Ovi Jiwheyẹwhe tọn; hiẹ wẹ Ahọlu Islaeli tọn,” wẹ e dọ.
“Hiẹ yise na yẹn dọ hlan we, dọ, Yẹn ko mọ we whenuena hiẹ tin ovotin glọ wutu?” wẹ Jesu kanse. “Hiẹ na mọ onú he hú ehelẹ.” Enẹgodo e dopagbe dọmọ: “Nugbo, nugbo, wẹ yẹn dọ hlan mì, Mì na mọ olọn hùn do nùvo, angẹli Jiwheyẹwhe tọn lẹ na to aga hẹ bo to tejẹ do Ovi gbẹtọ tọn ji.”
Tlolo to ehe godo, Jesu, po devi etọn yọyọ he e mọ lẹ po, yì sọn Agbàdo Jọdani tọn mẹ bo zìn gbejizọnlin yì Galili. Johanu 1:29-51.
▪ Mẹnu lẹ wẹ devi Jesu tọn tintan lẹ?
▪ Nawẹ Pita, gọna vlavo Jakobu, yin hinhẹn nado yọ́n Jesu gbọn?
▪ Etẹwẹ hẹn Natanaeli tindo nujikudo dọ Jesu wẹ Visunnu Jiwheyẹwhe tọn?