Mẹhe Lẹzun Devi Jesu Tọn Lẹ

MẸNU wẹ yin devizọnwatọ Jiwheyẹwhe tọn dagbe hugan lọ?⁠— Matin ayihaawe, Jesu Klisti wẹ. Be a lẹndọ mí sọgan yinuwa di ewọ ya?⁠— Biblu dọ dọ e ze apajlẹ dai na mí nado hodo. Podọ e basi oylọna mí nado yin devi etọn lẹ.

Be a yọ́n nuhe e zẹẹmẹdo nado yin devi Jesu tọn ya?⁠— E zẹẹmẹdo onú susu. Tintan, mí dona plọnnu sọn e dè. Ṣigba enẹ kẹdẹ ma ko pé gba. Mí sọ dona yí nuhe e dọ lẹ sè ga. Eyin mí wàmọ, mí na wà nuhe e dọna mí lẹ.

Mẹsusu wẹ nọ dọ dọ emilẹ yise to Jesu mẹ. Ṣigba be a lẹndọ yemẹpo wẹ yin devi etọn lẹ nugbonugbo?⁠— Lala, suhugan yetọn ma yinmọ. Yé sọgan nọ yì ṣọṣi ganji. Ṣigba susu yetọn ma ko yí whenu zan gbede nado plọn nuhe Jesu plọnmẹ lẹ. Na taun tọn, mẹhe hodo apajlẹ Jesu tọn lẹ kẹdẹ wẹ yin devi etọn lẹ.

Gbọ mí ni dọho dogbọn delẹ to mẹhe yin devi Jesu tọn to whenuena e tin to aigba ji lẹ dali. Filipi yin dopo to omẹ tintan he lẹzun devi etọn lẹ mẹ. Enẹgodo, Filipi yawu bo yì ylọ họntọn etọn Natanaeli (mẹhe sọ nọ yin yiylọdọ Batelemi), mẹhe a mọ bọ e sinai to atin de sá tofi. To whenuena Natanaeli wá Jesu dè, Jesu dọmọ: ‘Pọ́n Islaelivi nugbonọ de, mẹhe mẹ oblu de ma tin te.’ E paṣa Natanaeli bọ e kanse dọmọ: ‘Nawẹ hiẹ wagbọn do yọ́n mi?’

Jesu gblọn dọmọ: “Whẹpo Filipi ylọ we whenuena hiẹ tin to votin glọ, yẹn ko mọ we.” Awuji Natanaeli susu dọ Jesu yọ́n fie e te dai, enẹwutu Natanaeli dọmọ: “Hiẹ wẹ Ovi Jiwheyẹwhe tọn; hiẹ wẹ Ahọlu Islaeli tọn.”—Johanu 1:49.

Mẹdevo lẹ ko lẹzun devi Jesu tọn to azán he jẹnukọnna gbeegbe Filipi po Natanaeli po lẹzun devi. Omẹ lọ lẹ wẹ Andle po mẹdaho etọn Pita po. Johanu podọ vlavo mẹdaho etọn heyin Jakobu tin to yé mẹ ga. (Johanu 1:35-51) Ṣigba to madẹnmẹ, yé omẹ ẹnẹ ehelẹ lẹkọyi azọ́n whèhuhu tọn yetọn kọ̀n. To gbèdopo, dile Jesu to zọnlinzin gbọn Ohù Galili tọn tó, e mọ Pita po Andle po to odọ̀ yìn do ohù mẹ. Jesu ylọ yé dọmọ: “Mì hodo mi.”

Dile Jesu zindonukọn vude, e mọ Jakobu po Johanu po. Yé tin to tọjihun de mẹ hẹ otọ́ yetọn bo to odọ̀ yetọn jlado. Jesu ylọ yelọsu lẹ nado hodo e ga. Eyin hiẹ wẹ Jesu ylọ, etẹwẹ a na ko wà? Be a na ko hodo e to afọdopolọji ya?⁠— Dawe ehelẹ yọ́n mẹhe Jesu yin. Yé yọnẹn dọ Jiwheyẹwhe wẹ do e hlan. Enẹwutu, yé jo azọ́n whèhuhu tọn yetọn do bo hodo Jesu to afọdopolọji.—Matiu 4:18-22.

To whenuena dawe ehelẹ lẹzun hodotọ Jesu tọn lẹ, be ehe dohia dọ bẹsọn gbènẹgbè, nuhe sọgbe kẹdẹ wẹ yé nọ wà to whepoponu ya?⁠— Lala. A sọgan flindọ dawe ehelẹ dọ̀nnu to yedelẹ ṣẹnṣẹn dogbọn mẹhe yin nukọntọ lọ dali. Ṣigba yé dotoaina Jesu, bo diọ walọ yetọn. Eyin mílọsu jlo nado diọ walọ mítọn, mí sọgan lẹzun devi Jesu tọn lẹ ga.

Jesu basi oylọna gbẹtọ wunmẹ lẹpo nado lẹzun devi etọn lẹ. To gbèdopo, ogán adọkunnọ jọja de wá Jesu dè bo kanbiọ ẹ nuhe e na wà nado mọ ogbẹ̀ madopodo yí. To whenuena ogán adọkunnọ lọ dọ dọ emi ko to tonusena gbedide Jiwheyẹwhe tọn lẹ sọn ovu-whenu, Jesu basi oylọna ẹn dọmọ: “Wá, hodo mi.” Be a yọ́n nuhe jọ ya?—

Do glido, to whenuena dawe lọ sè dọ yinyin devi Jesu tọn dona yin nujọnu hú adọkunnọ yinyin, homẹ etọn ma hùn gba. E ma lẹzun devi Jesu tọn ba, na e yiwanna akuẹ etọn hú Jiwheyẹwhe.—Luku 18:18-25.

To whenuena Jesu ko dọyẹwheho na nudi owhe dopo daa godo, e de omẹ 12 to devi etọn lẹ mẹ nado yin apọsteli. Apọsteli lẹ yin mẹhe e nọ dohlan nado wà azọ́n vonọtaun lẹ. Be a yọ́n oyín yetọn ya?⁠— Gbọ mí ni tẹnpọn nado plọn yé. Pọ́n yẹdide yetọn lẹ tofi, bo tẹnpọn eyin a sọgan dọ oyín yetọn. Enẹgodo tẹnpọn nado dọ oyín lọ lẹ sọn tamẹ.

To godo mẹ, dopo to apọsteli 12 lẹ mẹ lẹzun mẹylankan. Yinkọ etọn wẹ Juda Iskaliọti. To nukọn mẹ, devi devo yin dide do otẹn etọn mẹ nado lẹzun apọsteli de. Be a yọ́n oyín etọn ya?⁠— Mattias wẹ. To godo mẹ, Paulu po Balnaba po lẹzun apọsteli lẹ, ṣigba yé ma yin hihia dogọ apọsteli 12 lẹ gba.—Owalọ lẹ 1:​23-​26; 14:14.

Dile mí plọn to Weta 1 owe ehe tọn mẹ do, Jesu yiwanna ovi flinflin lẹ. Naegbọn e wàmọ?⁠— Na e yọnẹn dọ yelọsu sọgan wá lẹzun devi etọn lẹ ga. Na nugbo tọn, ovi pẹvi lẹ sọgan dọ onú delẹ he sọgan whàn mẹhomẹ lẹ nado dotoai bo jlo nado plọnnu dogbọn Mẹplọntọ Daho lọ dali.

Yọnnu susu sọ lẹzun devi Jesu tọn lẹ ga. Delẹ to yé mẹ hodo e to whenuena e yì otò delẹ mẹ nado yì dọyẹwheho. Malia Magdaleni, Joana, po Susana po wàmọ. Vlavo yewlẹ wẹ nọ gọalọna ẹn nado dà núdùdù bo yàn avọ̀ etọn lẹ.—Luku 8:1-3.

Be hiẹ jlo na yin devi Jesu tọn ya?⁠— Flindọ, didọ po onù po poun dọ mí yin dopo to devi etọn lẹ mẹ ma ko pé gba. Mí dona nọ yinuwa taidi dopo to devi etọn lẹ mẹ to fidepope he mí te, e mayin whenuena mí yì opli Klistiani tọn lẹ kẹdẹ wẹ gba. Fidevo tẹlẹ wẹ a lẹndọ e jẹ dọ mí ni yinuwa taidi devi Jesu tọn te?⁠—

Mí dona wàmọ to whégbè. Ṣigba fidevo wẹ yin to wehọmẹ. Nuhe yẹn po hiẹ po ma dona wọnji gbede wẹ yindọ nado yin devi nugbo Jesu tọn, mí dona yinuwa taidi Jesu to ojlẹ lẹpo mẹ, to azán lẹpo gbè, mahopọnna fidepope he mí te.