Weta 26

Gọwa Whé to Kapẹlnaumi

TODIN gigo Jesu tọn ko gbayipe susu, bọ mẹsusu zìn gbejizọnlin yì fidindẹn lẹ fie e to ninọ. Ṣigba, to azán delẹ godo, e lẹkọwa Kapẹlnaumi sẹpọ Ohù Galili tọn. Po awuyiya po linlin lọ gbayipe gbọn todaho lọ mẹ dọ e ko gọwa whé, bọ mẹsusu sọ wá owhé he gbè e tin te. Falesi lẹ po mẹplọntọ Osẹ́n tọn lẹ po wá sọn fidindẹn lẹ taidi Jelusalẹm.

Gbẹtọgun lọ sù sọmọ bọ yé sú họntonu lọ, bọ otẹn ma sọ tin na mẹdevo depope nado biọ họmẹ ba. Ninọmẹ lọ ko yin awuwlena na nujijọ ayidego tọn de nugbonugbo. Nuhe jọ to nujijọ ehe whenu yin onú titengbe taun, na e gọalọna mí nado mọnukunnujẹemẹ dọ Jesu tindo huhlọn lọ nado de nuhe nọ dọ̀n yajiji gbẹtọvi lẹ tọn wá sẹ̀ bo na agbasalilo mẹlẹpo he e jlo.

Dile Jesu to pinplọn gbẹtọgun lọ lẹ, sunnu ẹnẹ hẹn dawe he to awukuzọ̀n jẹ de wá ohọ̀ lọ mẹ to adọ́zan de ji. Yé jlo dọ Jesu ni hẹnazọngbọna họntọn yetọn, ṣigba na gbẹtọgun lọ wutu, yé ma sọgan biọ họmẹ. Lehe yé jẹflumẹ do sọ! Ṣogan yé ma gbọjọ. Yé hẹaga yì ozà ji, de odò do e go, bo zlọ́n adọ́zan lọ po dawe he to awukuzọ̀n jẹ lọ po do apá na Jesu.

Be Jesu gblehomẹ na alọhẹndotenamẹ lọ wutu wẹ ya? Paali! Kakatimọ, e yin whinwhàn sisosiso gbọn yise yetọn dali. E dọhlan awukuzọ̀njẹtọ lọ dọmọ: “Yè jo ylando towe na we.” Ṣigba be Jesu sọgan jo ylando namẹ nugbonugbo ya? Wekantọ lẹ po Falesi lẹ po ma lẹnmọ gba. Yé lẹnpọn to ayiha yetọn lẹ mẹ dọmọ: “Etẹwutu wẹ dawe he to nùzan? Mẹnu wẹ sọgan jo ylando namẹ, adavo Jiwheyẹwhe kẹdẹ?”

Yinyọ́n linlẹn yetọn lẹ, Jesu dọhlan yé dọmọ: “Etẹwutu wẹ mìwlẹ to onú he lẹn to ayiha mìtọn mẹ? Etẹwẹ bọawu, nado dọhlan awukuzọ̀njẹtọ lọ, dọ, Yè jo ylando towe na we; kavi nado dọ, Fọ́n bo ze adọ́zan towe bo zinzọnlin?”

Enẹgodo, Jesu na dotẹnmẹ gbẹtọgun lọ, gọna homọdọdomẹgotọ etọn lẹ, nado mọ wadohia ayidego tọn de he na dohia dọ e tindo aṣẹ nado jo ylando lẹ namẹ to aigba ji podọ dọ ewọ wẹ yin dawe klohugan lọ he nkọtọn ma nọgbẹ̀ pọ́n nugbonugbo. E pannukọn awukuzọ̀njẹtọ lọ bo degbe dọmọ: “Fọ́n, ze adọ́zan towe, bo yì owhé towe gbè.” Podọ e sọ wàmọ to afọdopolọji, bo to zọnlinzin jei po adọ́zan etọn po to yemẹpo nukọn! To awujiji mẹ gbẹtọ lọ lẹ pagigona Jiwheyẹwhe bo dọmọ: “Míwlẹ ma mọ onú he hunkọ gbede”!

Be hiẹ doayi e go dọ Jesu donù ylando lẹ go to kọndopọmẹ hẹ awutu podọ dọ jona ylando lẹ tọn tindo kanṣiṣa hẹ agbasalilo mimọyi ya? Biblu basi zẹẹmẹ dọ mẹjitọ mítọn tintan, Adam, waylando podọ dọ mímẹpo wẹ ko dugu kọdetọn ylando enẹ tọn, yèdọ, awutu po okú po. Ṣigba to gandudu Ahọluduta Jiwheyẹwhe tọn glọ, Jesu na jo ylando na mẹhe yiwanna Jiwheyẹwhe bo nọ sẹ̀n Ẹn lẹ, bọ to whenẹnu awutu lẹpo na yin didesẹ. Lehe enẹ na yọnwhanpẹ do sọ! Malku 2:1-12; Luku 5:17-26; Matiu 9:1-8; Lomunu lẹ 5:12, 17-19.

▪ Etẹwẹ yin awuwiwle lọ na nujijọ ayidego taun tọn lọ?

▪ Nawẹ awukuzọ̀njẹtọ lọ jẹ Jesu dè gbọn?

▪ Naegbọn mímẹpo do yin ylandonọ, ṣigba nawẹ Jesu wleawu todido tọn gbọn dọ jona ylando mítọn lẹ tọn po agbasalilo dagbe po yọnbasi?