Weta 29
Azọ́n Dagbe lẹ Wiwà to Gbọjẹzangbe
AMÀKIKỌ-WHENU owhe 31 W.M. tọn wẹ. Osun delẹ ko juwayi sọn whenue gbọ́n Jesu dọho hlan yọnnu lọ to dotọ̀ lọ kọ̀n to Samalia to whenuena e tọ́nsọn Judé jei Galili.
Todin, to mẹpinplọn gbigbloada lẹdo Galili godo, Jesu sọ tọ́n sọn finẹ yì Judé, fie e dọyẹwheho to sinagọgu lẹ mẹ te. Yiyijlẹdo ayidonugo he Biblu na hlan lizọnyizọn etọn to Galili go, onú vude wẹ e dọ gando nuwiwa Jesu tọn lẹ to Judé go to dlapọn ehe whenu podọ to osun he e yizan to finẹ lẹ bọdo Juwayi he wayi lọ go whenu. Kunnudenu dohia dọ lizọnyizọn etọn ma yin alọkẹyi ganji to Judé dile e yin bibasi do to Galili gba.
To madẹnmẹ Jesu tin to aliho etọn ji jei todaho titengbe Judé tọn, yèdọ Jelusalẹm, na Juwayi owhe 31 W.M. tọn. Tofi, sẹpọ Họngbo Lẹngbọ tọn heyin todaho lọ tọn, wẹ tándo lọ he nọ yin yiylọdọ Bẹtsata tin te, fie susu awutunọ, nukuntọnnọ, po sẹkunọ lẹ po nọ wá. Yé yise dọ gbẹtọ lẹ sọgan yin azọ̀nhẹngbọna gbọn osin tándo lọ tọn mẹ bibiọ dali to whenuena otọ̀ lọ to wuwlu.
Gbọjẹzangbe wẹ, bọ Jesu mọ dawe de to tándo lọ kọ̀n mẹhe ko to azọ̀njẹ na owhe 38. To yinyọ́n lehe awutu dawe lọ tọn ko dẹnsọ, Jesu kanse dọmọ: “Hiẹ jlo yè ni hẹn azọ̀n towe gbọ na we?”
E na gblọndo Jesu dọmọ: “Oklunọ, yẹn ma tindo mẹde whenuena yè wlu osin nado ze mi do tándo mẹ: ṣigba whenuena yẹn ja, mẹdevo jẹte doafọ e mẹ jẹnukọnna mi.”
Jesu dọ hlan ẹn dọmọ: “Fọ́n, ze adọ́zan towe, bo zinzọnlin.” Po enẹ po dawe lọ jẹgangan to agbasa mẹ to afọdopolọji, ze adọ́zan etọn, bo jẹ zọnlinzin ji!
Ṣigba to whenuena Ju lẹ mọ dawe lọ, yé dọmọ: “Gbọjẹzangbe wẹ egbé: e ma jẹ na we nado ze adọ́zan towe gba.”
Dawe lọ gblọnna yé dọmọ: “Mẹhe hẹnazọngbọna mi, dopolọ wẹ dọ hlan mi, dọ, Ze adọ́zan towe, bo zinzọnlin.”
“Mẹnu wẹ gbẹtọ he dọ hlan we, dọ, Ze adọ́zan towe, bo zinzọnlin?” wẹ yé kanse. Jesu ko jẹ awà devo ji na agundaho lọ wutu, podọ mẹhe yin azọ̀nhẹngbọna lọ ma yọ́n yinkọ Jesu tọn gba. Ṣigba, to godo mẹ, Jesu po dawe lọ po pé to tẹmpli mẹ, bọ dawe lọ wá yọ́n mẹhe hẹnazọngbọna ẹn.
Enẹwutu dawe he yin azọ̀nhẹngbọna lọ dín Ju lẹ mọ nado dọna yé dọ Jesu wẹ mẹhe hẹn ẹn jẹgangan. To ehe sisè godo, Ju lẹ yì Jesu dè. Na whẹwhinwhẹ́n tẹ wutu? Be nado yọ́n asisa he hẹn ẹn penugo nado wà onú jiawu ehelẹ wẹ ya? Lala. Ṣigba nado dín nuṣiwa do ewọ go na e to onú dagbe ehelẹ basi to Gbọjẹzangbe wutu. Podọ yé tlẹ jẹ homẹkẹndo e ji! Luku 4:44; Johanu 5:1-16.
▪ Nawẹ e ko dẹnsọ sọn whenue gbọ́n Jesu basi dlapọn yì Judé gbọngodo?
▪ Naegbọn tándo he nọ yin yiylọdọ Bẹtsata do diyin sọmọ?
▪ Azọ́njiawu tẹwẹ Jesu wà to tándo lọ kọ̀n, podọ etẹwẹ yin nuyiwa Ju lẹ tọn?