30

Gblọndo Nina Whẹsadokọnamẹtọ Etọn Lẹ

TO WHENUENA sinsẹ̀ngan Ju lẹ tọn sà owhẹ̀ osẹ́n Gbọjẹzan tọn gbigbà dokọna Jesu, e gblọn dọmọ: “Otọ́ ṣie wazọ́n kakajẹ dinvie, yẹn sọ wazọ́n.”

Mahopọnna alọsọakọ́n Falesi lẹ tọn, azọ́n Jesu tọn ma yin wunmẹ he yin gbigbẹdai gbọn osẹ́n Gbọjẹzan tọn dali gba. Azọ́n yẹwhehodidọ po azọ̀nhẹngbọnamẹ tọn etọn po yin azọ́ndenamẹ de sọn Jiwheyẹwhe dè, podọ to apajlẹ Jiwheyẹwhe tọn hihodo mẹ, e nọ to wiwà ẹ egbesọegbesọ. Ṣigba, gblọndo etọn tlẹ sọ vọ́ hẹn homẹgblena Ju lẹ hugan lehe yé te dai, bọ yé dín nado hù i. Etẹwutu?

Na todin e mayin dọ yé yise dọ Jesu to osẹ́n Gbọjẹzan tọn gbà kẹdẹ wẹ gba ṣigba pọ́n alọsọakọ́n etọn nado yin Visunnu Jiwheyẹwhe lọsu titi tọn hlan nado yin nùzinzan. Etomọṣo, Jesu ma dibu gba bo na gblọndo yé yinukọn dogọ gando haṣinṣan dagbe etọn hẹ Jiwheyẹwhe go. “Na Otọ́ yiwanna Ovi,” wẹ e dọ, “bosọ yí onú he ewlọsu to wiwà lẹpo hia ẹ.”

“Na dile Otọ́ to oṣiọ fọ́n,” wẹ Jesu zindonukọn dọ, “mọkẹdẹ wẹ Ovi sọ nọ hẹn mẹhe e jlo lẹ do ogbẹ̀ ga.” Na nugbo tọn, Visunnu lọ ko to oṣiọ lẹ fọ́n do ogbẹ̀ to gbigbọ-liho! “Mẹdepope he sè ohó ṣie, bosọ yí mẹhe do mi hlan sè,” Jesu dọ dọ, “e tọ́n sọn okú mẹ biọ ogbẹ̀ mẹ.” Mọwẹ, e zindonukọn dọmọ: “Ojlẹ lọ ja, dinvie sọ wẹ, whenuena oṣiọ lẹ na sè ogbè Ovi Jiwheyẹwhe tọn tọn: mẹhe sọ sè lẹ na tin to ogbẹ̀.”

Dile etlẹ yindọ kandai de ma tin dọ Jesu ko fọ́n mẹde sọnkú na taun tọn todin, e dọna whẹsadokọnamẹtọ etọn lẹ dọ fọnsọnku oṣiọ lẹ tọn mọnkọtọn na jọ nugbonugbo. “Avò vò mì na ehe wutu blo,” wẹ e dọ, “na ojlẹ lọ ja, to ehe mẹ mẹhe tin to yọdo [oflin tọn, NW ] mẹ lẹpo na sè ogbè etọn, bo na tọnjẹgbonu.”

Kakajẹ ojlẹ ehe mẹ, kunnudenu dohia dọ Jesu ma ko basi zẹẹmẹ azọngban titengbe etọn tọn to lẹndai Jiwheyẹwhe tọn mẹ to gbangba to aliho he họnwun bo to tlọlọ mọnkọtọn mẹ pọ́n gbede gba. Ṣigba whẹsadokọnamẹtọ Jesu tọn lẹ tindo kunnudenu he hugan etọn titi lẹ gando onú ehelẹ go. “Mìwlẹ dowẹn hlan Johanu dè,” wẹ Jesu flin yé, “ewọ ko sọ dekunnu hlan nugbo.”

Owhe awe die poun jẹnukọn, Johanu Baptizitọ lọ dọna sinsẹ̀ngan Juvi tọn ehelẹ dogbọn Omẹ lọ he ja to ewọ godo dali. Nado flin yé gando sisi yiaga yetọn to ojlẹ de mẹ wayi na Johanu he tin to ganpamẹ todin lọ go, Jesu dọmọ: “Mìwlẹ ko sọ jlo to ojlẹ de mẹ nado jaya to hinhọ́n etọn mẹ.” Jesu vọ́ ehe hẹnwa ayiha yetọn lẹ mẹ po todido lọ po nado gọalọ, mọwẹ, nado whlẹn yé gàn. Ṣogan ewọ ma ganjẹ kunnudide Johanu tọn go gba.

“Azọ́n lọsu lẹ he yẹn wà [gọna azọ́njiawu he e ṣẹṣẹ basi], to kunnudena mi dọ, Otọ́ wẹ do mi hlan.” Ṣigba gbọnvona enẹ, Jesu zindonukọn dọmọ: “Otọ́ mẹhe do mi hlan, e ko dekunnuna mi.” Jiwheyẹwhe dekunnu dogbọn Jesu dali, di dohia, to baptẹm etọn whenu, dọmọ: “Ehe wẹ Visunnu ṣie; mẹvivẹ ṣie.”

Na nugbo tọn, whẹsadokọnamẹtọ Jesu tọn lẹ ma tindo whẹwhinwhẹ́n depope nado gbẹ́ ẹ dai gba. Owe-wiwe lẹ he yé sọalọakọ́n nado to dogbapọnna dekunnu dogbọn ewọ dali! “Eyin mì ko yí Mose sè, mì do ko yí mi sè,” wẹ Jesu dotana dọ, “na owe ṣie wẹ ewọ kàn wutu. Ṣigba eyin mìwlẹ ma yí owe etọn sè, nawẹ mì na yí ohó ṣie sè do?” Johanu 5:17-47; 1:19-27; Matiu 3:17.

▪ Naegbọn azọ́n Jesu tọn ma gbà osẹ́n Gbọjẹzan tọn?

▪ Nawẹ Jesu basi zẹẹmẹ azọngban titengbe etọn tọn to lẹndai Jiwheyẹwhe tọn mẹ gbọn?

▪ Nado dohia dọ Visunnu Jiwheyẹwhe tọn wẹ ewọ yin, kunnudide mẹnu tọn wẹ Jesu dlẹnalọdo?