Weta 33

Dọdai Isaia Tọn Hinhẹndi

TO WHENUENA Jesu yọnẹn dọ Falesi lẹ po hodotọ ogbẹ́ Hẹlodi tọn lẹ po to sébla nado hù i godo, ewọ po devi etọn lẹ po joagọ yì Ohù Galili tọn kọ̀n. Tofi gbẹtọ susugege sọn awà Palestine tọn lẹpo ji, podọ etlẹ yin sọn gbonu dogbo etọn lẹ tọn, wọ̀ wá e dè. E hẹnazọ̀ngbọna mẹsusu, bọ mẹhe tindo awutu sinsinyẹn lẹpo dọnsẹpọ nukọn nado doalọ e go.

Na gbẹtọ lẹ yin susugege sọmọ wutu, Jesu dọna devi etọn lẹ nado tindo tọjihun de to alọji na ẹn to whepoponu. Gbọn húngigọ̀ yigodo vude sọn hùto lọ dali, ewọ sọgan glọnalina gbẹtọ lẹ sọn dindọ̀n sẹpọ ẹ pẹkipẹki. E sọgan plọn yé sọn tọjihun lọ mẹ kavi zìn gbejizọnlin yì awà devo ji to ohù lọ tó nado gọalọna gbẹtọ lẹ to finẹ.

Devi lọ Matiu doayi e go dọ nuwiwa Jesu tọn hẹn “ehe yè dọ gbọn onù Isaia yẹwhegan tọn mẹ” di. Enẹgodo Matiu yí hodọ sọn dọdai he Jesu hẹndi lọ mẹ dọmọ:

“Mì pọ́n, devi ṣie, mẹhe yẹn ko dè; mẹyiwanna ṣie, mẹhe mẹ yè hẹn homẹhun alindọn ṣie te dagbedagbe: Yẹn na yí gbigbọ ṣie do e ji, ewọ nasọ lá whẹdida hlan Kosi lẹ. E ma to avùn na hò, e ma to awhá na dó; mọ mẹdepope ma to ogbè etọn na sè to alihogboji. Ofán gbigbà wẹ ewọ ma to na wẹ́n, sekan he to azọ̀ tì wẹ ewọ ma to na ṣí, kaka e do whẹdida hlan gbonu jẹ awhàngba mẹ. Oyín etọn mẹ wẹ Kosi lẹ na do todido te.”

Na nugbo tọn, Jesu wẹ devizọnwatọ yiwanna lọ mẹhe Jiwheyẹwhe dè. Podọ Jesu hẹn nuhe whẹdida dodo nugbo yin họnwun, ehe to yinyin hinhẹn dózin gbọn aṣa sinsẹ̀n lalo tọn lẹ dali. Na osẹ́n Jiwheyẹwhe tọn yiyizan to aliho agọ̀ mẹ yetọn wutu, Falesi lẹ ma na tlẹ gọalọna mẹhe to azọ̀njẹ de to Gbọjẹzangbe! To whẹdida dodo Jiwheyẹwhe tọn hinhẹn họnwun mẹ, Jesu dè agbàn pinpẹn aṣa he ma sọgbe tọn lẹ sọn gbẹtọ lẹ ji, podọ na ehe tọn wutu, sinsẹ̀ngan lẹ tẹnpọn nado hù i.

Etẹwẹ e zẹẹmẹdo dọ ‘e ma to avùn na hò, kavi ma to ogbè etọn na zedaga nado yin sisè to alihogbo lẹ ji’? To azọ̀nhinhẹngbọna gbẹtọ lẹ whenu, Jesu nọ ‘degbena yé madoadúdẹji ma nado do e hia to gbangba.’ E ma jlo mẹjijla po awhá po na edetiti to alihogbo lẹ ji gba kavi nado tindo linlin awuvivi tọn he yin tasọ́dòna sọn onù mẹ jẹ onù mẹ gba.

Mọdopolọ, Jesu hẹn wẹndomẹ homẹmimiọnnamẹ tọn etọn jẹ gbẹtọ he to yẹhiadonu liho tin taidi ofán gbigbà, he yin winwẹ́n bo yin afọ̀ tùn e ji lẹ dè. Yé tin taidi sekan he to azọ̀ tì, he jẹhọn ko dibla ṣí miyọ́n jiji etọn godo tọn. Jesu ma wẹ́n ofán gbigbà lẹ gba kavi ṣí sekan, he to azọ̀ tì gba. Ṣigba po awuvẹmẹ po gọna owanyi, e yí azọ́nyinyọnẹn do ze homẹmimiọnnọ lẹ daga. Na nugbo tọn, Jesu wẹ omẹ lọ he mẹ akọta lẹ sọgan tindo todido te! Matiu 12:15-21; Malku 3:7-12; Isaia 42:1-4.

▪ Nawẹ Jesu hẹn whẹdida dodo họnwun, bo ma hoavun kavi ze ogbè etọn daga to alihogbo lẹ ji gbọn?

▪ Mẹnu lẹ wẹ taidi ofán gbigbà lẹ po sekan he to azọ̀ tì lẹ po, podọ nawẹ Jesu yinuwa hẹ yé gbọn?