Weta 34

Apọsteli Etọn lẹ Dide

E KO yì nudi owhe dopo daa sọn whenue gbọ́n Johanu Baptizitọ lọ ko do Jesu hia taidi Lẹngbọvu Jiwheyẹwhe tọn bọ Jesu ko bẹ lizọnyizọn gbangba tọn etọn jẹeji. To ojlẹ enẹ mẹ Andlé, Simọni Pita, Johanu, podọ vlavo Jakobu (nọvisunnu Johanu tọn), gọna Filipi po Natanaeli po (he sọ nọ yin yiylọdọ Batelemi), ko lẹzun devi etọn tintan lẹ. To madẹnmẹ, mẹsusu devo lẹ gọ́ na yé to hihodo Klisti mẹ.

Todin Jesu ko wleawufo nado dè apọsteli etọn lẹ. Omẹ ehelẹ na yin gbẹdohẹmẹtọ pẹkipẹki etọn lẹ he na yin nina azọ́nplọnmẹ vonọtaun. Ṣigba whẹpo e do dè yé, Jesu yì osó de ji bo yí ozán lọ pete zan to dẹ̀hiho mẹ, vlavo nado biọ nuyọnẹn po dona Jiwheyẹwhe tọn po. To whenuena e jẹ wunkẹngbe, e ylọ devi etọn lẹ pli bo dè omẹ 12 sọn ṣẹnṣẹn yetọn. Ṣigba, to whenuena e yindọ yé gbẹ́ pò to nuplọntọ Jesu tọn lẹ yin, yé gbẹ́ nọ yin yiylọdọ devi lẹ ga.

Omẹ ṣidopo he Jesu dè lẹ, he oyín yetọn yin yiylọ to aga lẹ, wẹ mẹhe lẹzun devi etọn tintan lẹ. Matiu, mẹhe Jesu ylọ sọn wekantẹn takuẹ-yíyí tọn etọn mẹ, yin dide ga. Omẹ atọ́n devo he yin dide lẹ wẹ Juda (he sọ nọ yin yiylọdọ Tade), Juda Iskaliọti, Simọni Kanani tọn lọ, Tomasi, po Jakobu visunnu Alfe tọn po. Jakobu ehe sọ nọ yin yiylọdọ Jakobu Pẹvi lọ, vlavo na e yin pẹvi to awusọhia mẹ wutu kavi whè to owhe mẹ hugan apọsteli Jakobu diẹ.

Todin omẹ 12 ehelẹ ko tin po Jesu po na ojlẹ de, podọ ewọ sọ yọ́n yé ganji. Na nugbo tọn, sọha delẹ to yé mẹ yin hẹnnumẹ etọn titi lẹ. Kunnudenu dohia dọ Jakobu po nọvisunnu etọn Johanu po yin nafẹ-ylọvi tlọlọ Jesu tọn lẹ. Podọ e sọ taidi dọ Alfe yin nọvisunnu Josẹfu tọn, yèdọ otọ́ mẹgopọntọ Jesu tọn. Enẹwutu visunnu Alfe tọn, yèdọ apọsteli Jakobu, nasọ yin tavẹ-ylọvi Jesu tọn ga.

Na nugbo tọn, Jesu ma tindo nuhahun depope to finflin yinkọ apọsteli etọn lẹ tọn mẹ gba. Ṣigba be hiẹ sọgan flin yé ya? Eyọn, flin poun dọ awe wẹ nọ yin Simọni, awe nọ yin Jakobu, podọ awe nọ yin Juda, podọ dọ Simọni tindo nọvisunnu de he nọ yin Andlé, podọ dọ Jakobu tindo nọvisunnu de he nọ yin Johanu. Enẹ yin họ̀nhungan lọ nado flin apọsteli ṣinatọ̀n. Ẹnẹ he pò lẹ wẹ takuẹ-ṣinyantọ lọ (Matiu), omẹ lọ he tindo ayihaawe to godo mẹ (Tomasi), ode he yin yiylọ sọn atin de sá (Natanaeli), podọ họntọn etọn Filipi.

Widopo sọn apọsteli etọn lẹ mẹ wá sọn Galili, to agbegbe otò Jesu tọn mẹ. Natanaeli wá sọn Kana. Filipi, Pita, po Andlé po wá sọn Betsaida to whẹwhẹwhenu, to godo mẹ Pita po Andlé po sẹtẹn jẹ Kapẹlnaumi, fie e sọawuhia dọ Matiu nọ nọ̀. Jakobu po Johanu po tin to azọ́n whèvi-hùhù tọn mẹ podọ e sọ taidi dọ yé nọ nọ̀ kavi sẹpọ Kapẹlnaumi. E taidi dọ Juda Iskaliọti, he dè Jesu hia to godo mẹ, wẹ yin apọsteli dopo gee lọ he wá sọn Judé. Malku 3:13-19; Luku 6:12-16.

▪ Apọsteli tẹlẹ wẹ sọgan ko yin hẹnnumẹ Jesu tọn lẹ?

▪ Mẹnu lẹ wẹ yin apọsteli Jesu tọn lẹ, podọ nawẹ hiẹ sọgan flin yinkọ yetọn lẹ gbọn?

▪ Sọn aigba tẹlẹ ji wẹ apọsteli lọ lẹ wá sọn?