Weta 39

Goyitọ lẹ po Whiwhẹnọ lẹ Po

TO HODIDỌ do jijọ dagbe Johanu Baptizitọ lọ tọn lẹ ji godo, Jesu lẹ ayidonugo hlan goyitọ, dẹgbèawenọ he lẹdo e pé lẹ. “Whẹndo he,” wẹ e lá dọ, “taidi yọpọvu he sinai to ahihọ̀ mẹ lẹ, bo to gbejlẹ hlan hatọ yetọn lẹ, bo dọmọ, Míwlẹ kúnván hlan mì, mì ma dúwe: míwlẹ sọ blawu, mì ma viavi.”

Etẹ dọ wẹ Jesu te? E basi zẹẹmẹ dọmọ: “Na Johanu wá, e ma dù, mọ e ma nù, yé dọmọ, E do aovi. Ovi gbẹtọ tọn wá, e to dùdù bo to nùnù, yé sọ dọmọ, Pọ́n, dawe adọnọ, ahànnumunọ, họntọn tokuẹṣinyantọ po ylandonọ lẹ po tọn.”

E ma yọnbasi nado na pekọ gbẹtọ lọ lẹ gba. Nudepope ma nọ hẹn homẹ yetọn hùn gba. Johanu ko zan gbẹzan bọawu mẹdetiti-mimọ́n tọn taidi Nazilinu de, to tonusise mẹ hlan nulila angẹli lọ tọn dọ “[ewọ] ma to na nù ovẹn kavi ahàn sinyẹnsinyẹn de.” Ṣogan gbẹtọ lọ lẹ dọ dọ ewọ tindo aovi. To alọ devo mẹ, Jesu nọgbẹ̀ taidi gbẹtọ devo lẹ, bo ma zan gbẹzan tẹ́nkúkú tọn depope gba, ṣigba ewọ yin owhẹ̀ wazẹjlẹgo tọn sadokọna.

Pọ́n lehe e sinyẹnawu do sọ nado hẹn homẹ gbẹtọ lẹ tọn hùn! Yé tin taidi aihundatọ-gbẹ́ lẹ, he delẹ to yé mẹ gbẹ́ nado dúwe to whenuena yọpọvu devo lẹ kúnván kavi nado blawu to whenuena hagbẹ yetọn lẹ viavi. Etomọṣo, Jesu dọmọ: “Yè ko suwhẹna nuyọnẹn gbọn azọ́n etọn lẹ dali.” Mọwẹ, kunnudenu lọ—yèdọ azọ́n lẹ—hẹn ẹn họnwun dọ whẹsadokọnamẹ lẹ sọta Johanu po Jesu po yin lalo.

Jesu zindonukọn nado klán otò atọ̀n delẹ, fie ewọ ko wà suhugan azọ́n huhlọnnọ etọn lẹ te dovo na whẹgbledo, yèdọ Kolazin, Betsaida, po Kapẹlnaumi po. Eyin e ko wà azọ́n enẹlẹ to todaho Phénix tọn lẹ heyin Tile po Sidoni po mẹ wẹ, Jesu dọ dọ, todaho ehelẹ na ko lẹnvọjọ to odẹ́vọ̀ po afín po mẹ. To whẹgbigbledo Kapẹlnaumi mẹ, fie họnwun nado yin ahọ́nkan fininọ etọn tọn to lizọnyizọn etọn whenu, Jesu lá dọmọ: “E na pọnte na aigba Sọdọmi tọn to whẹdazangbe hú na hiẹ.”

To enẹgodo Jesu pagigona Otọ́ olọn mẹ tọn etọn to gbangba. E yin whinwhàn nado wàmọ na Jiwheyẹwhe ko whlá nugbo họakuẹ gbigbọmẹ tọn lẹ sọn nuyọnẹntọ po zinzintọ lẹ po dè ṣigba to yẹhiadonu liho dè onú jiawu ehelẹ hia hlan whiwhẹnọ lẹ, yèdọ ovivu lẹ.

To tadona mẹ, Jesu basi oylọ awuvivinamẹ tọn ehe dọmọ: “Mì wá dee, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì. Mì yí zẹ̀gẹ̀ ṣie do okọ̀ mìtọn, na mì nisọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ [kọfanamẹ na, NW] alindọn mìtọn lẹ. Na zẹ̀gẹ̀ ṣie bọawu, agbàn ṣie sọ fua.”

Nawẹ Jesu nọ fakọnamẹ gbọn? E nọ wàmọ gbọn awuwiwlena mẹdekannujẹ sọn aṣa he nọ hẹnmẹ do kanlinmọgbenu lẹ si dali ehe sinsẹ̀ngan lẹ ko yí do gbidikọna gbẹtọ lẹ, di apajlẹ, ehe bẹ gbedide hẹngogo Gbọjẹzan-yìnyìn tọn lẹ hẹn. E sọ nọ do aliho pọngbọ tọn hia hlan mẹhe tindo numọtolanmẹ awufiẹsa yinyin agbàn pinpẹn gandudomẹji tọn dona gbọn aṣẹpipa tonudọtọ tọn lẹ dali podọ hlan mẹhe tindo numọtolanmẹ agbàn pinpẹn ylando yetọn lẹ tọn gbọn ayihadawhẹnamẹnu he nọ dotuklamẹ de dali. E dohia mẹhe yin nukunbiana mọnkọtọn lẹ lehe ylando yetọn lẹ sọgan yin jijona do podọ lehe yé sọgan duvivi haṣinṣan họakuẹ de hẹ Jiwheyẹwhe do.

Zẹ̀gẹ̀ bọawu he Jesu nọ zedonukọnnamẹ lọ yin dehe yè klandowiwe mlẹnmlẹn hlan Jiwheyẹwhe, yèdọ yinyin mẹhe penugo nado sẹ̀n Otọ́ awuvẹmẹtọ, lẹblanunọ olọn mẹ tọn mítọn. Podọ agbàn fufua he Jesu nọ zedonukọnna mẹhe wá e dè lẹ yin enẹ heyin tonusisena nubiọtomẹsi Jiwheyẹwhe tọn lẹ na ogbẹ̀, ehe yin gbedide Etọn heyin kinkandai to Biblu mẹ lẹ. Podọ tonusisena ehelẹ mayin nupẹnagbanmẹ paali. Matiu 11:16-30; Luku 1:15; 7:31-35; 1 Johanu 5:3.

▪ Nawẹ goyitọ, dẹgbèawenọ heyin whẹndo azán Jesu tọn gbè tọn lẹ taidi yọpọvu lẹ gbọn?

▪ Naegbọn Jesu yin whinwhàn nado pà Otọ́ olọn mẹ tọn etọn?

▪ To aliho tẹlẹ mẹ wẹ gbẹtọ lẹ yin agbàn pinpẹn dona te, podọ pọngbọ tẹwẹ Jesu zedonukọnnamẹ?