Weta 42

Jesu Gbẹnuna Falesi Lẹ

EYIN gbọn huhlọn Satani tọn dali wẹ ewọ yàn aovi lẹ jẹgbonu, wẹ Jesu dọ, whelọnu lo Satani ko klán do ede ji. “Hẹn atin yin dagbe, kavi sinsẹ́n etọn yin dagbe,” wẹ e zindonukọn dọ, “kavi hẹn atin yin yìnyọ̀n, sinsẹ́n etọn yin ylanylan: na sinsẹ́n atin tọn wẹ yè do nọ yọ́n atin.”

Nululu wẹ e yin nado sawhẹdokọnamẹ dọ sinsẹ́n dagbe aovi lẹ yinyan jẹgbonu tọn yin na Jesu to Satani sẹ̀n wutu. Eyin sinsẹ́n lọ yin dagbe, atin lọ ma sọgan yin yìnyọ̀n gba. To alọ devo mẹ, sinsẹ́n yìnyọ̀n Falesi lẹ tọn heyin whẹsadokọnamẹ agọ̀ po nukundiọsọmẹ matin dodonu de po sọta Jesu yin kunnudenu dọ yé lọsu yin yìnyọ̀n ga. “Mì ovi amapoe tọn emi,” wẹ Jesu dawhá dọ, “nawẹ mìwlẹ yinyin mẹylankan sọgan dọ onú dagbe lẹ do? Na sọn susugege ayiha mẹ tọn mẹ wẹ onù to didọ.”

To whenuena e yindọ hogbe mítọn lẹ nọ do ninọmẹ ahun mẹ tọn mítọn lẹ hia, nuhe mí nọ dọ nọ wleawu dodonu de tọn na whẹdida. “Yẹn dọ hlan mì,” wẹ Jesu dọ, “ohó gblo he gbẹtọ to didọ lẹpo, yé na whè yé dọ to azán whẹdida tọn gbè. Na gbọn ohó towe mẹ wẹ yè na suwhẹna we, gbọn ohó towe mẹ wẹ yè nasọ gblewhẹdo we.”

Mahopọnna azọ́n huhlọnnọ Jesu tọn lẹpo, wekantọ lẹ po Falesi lẹ po biọ dọmọ: “Mẹplọntọ, míwlẹ jlo na mọ ohia de sọn dè we.” Dile etlẹ yindọ dawe ehelẹ he wá sọn Jelusalẹm sọgan nọ ma ko mọ azọ́njiawu etọn lẹ na yedetiti, kunnudenu yí nukundomọ he yè ma sọgan gbẹdai gando yé go lẹ tin. Enẹwutu Jesu dọna nukọntọ Ju tọn lẹ dọmọ: “Whẹndo ylankan ayọdetọ to ohia dín na mọ; yè ma to ohia de na na ẹn gba, adavo ohia Jona yẹwhegán tọn.”

To zẹẹmẹ bibasi na nuhe e to didọ mẹ, Jesu zindonukọn dọmọ: “Na dile Jona nọ̀ okle atọ̀n ozán atọ̀n to ohò olia tọn mẹ; mọwẹ Ovi gbẹtọ tọn na nọ̀ okle atọ̀n ozán atọ̀n to aigba homẹ.” To yinyin zizemi gbọn whèvi lọ dali godo, Jona tọ́njẹgbonu taidi dọ e yin finfọnsọnku nkọtọn, enẹwutu Jesu to dọdai dọ dọ emi na kú podọ to azán atọ̀ntọ gbè na yin finfọn do ogbẹ̀. Etomọṣo, nukọntọ Ju tọn lẹ, yèdọ etlẹ yin to whenuena Jesu yin finfọnsọnku godo, gbẹ́ “ohia Jona tọn” dai.

Gbọnmọ dali Jesu dọ dọ omẹ Nineve tọn he lẹnvọjọ to yẹwhehodidọ Jona tọn whenu lẹ na fọ́n to whẹdida mẹ nado gblewhẹdo Juvi he gbẹ́ Jesu dai lẹ. Mọdopolọ, e do nudopolọ-yinyin de hia po ahọsi Ṣeba po, he wá sọn opodo aigba tọn nado sè nuyọnẹn Sọlọmọni tọn bosọ yin awujinọ dogbọn nuhe e mọ bo sè lẹ dali. “Bo pọ́n,” wẹ Jesu dọ, “ode hú Sọlọmọni tin to ofi.”

Enẹgodo Jesu dó oló dawe de tọn he mẹ gbigbọ mawé jẹgbonu tọ́n sọn. Ṣigba, dawe lọ, ma yí onú dagbe lẹ do gọ́ otẹn he jẹvọ́ lọ gba, enẹwutu gbigbọ mawé ṣinawe he ylan hugan wá biọ ewọ mẹ. “Mọkẹdẹ wẹ e na nọ hlan whẹndo ylankan he ga,” wẹ Jesu dọ. Akọta Islaelivi tọn ko yin kiklọwé bo ko sọ tindo numimọ yinyin vivọjlado tọn—taidi gbonu jijẹyi whenu-gli gbigbọ mawé de tọn. Ṣigba gbigbẹ́ yẹwhegán Jiwheyẹwhe tọn lẹ dai akọta lọ tọn, he dekọtọn do nukundidiọsọ Klisti lọsu etọn, dè ninọmẹ ylankan etọn hia nado ylan taun hugan bẹjẹeji etọn.

Dile Jesu to hodọ, onọ̀ etọn po nọvisunnu etọn lẹ po wá bo ṣite to gbẹtọgun lọ godo. Enẹwutu mẹde dọmọ: “Pọ́n, onọ̀ towe po mẹmẹsunnu towe lẹ po ṣite to gbonu, yé díndín ohó na dọ hẹ we.”

“Mẹnu wẹ onọ̀ ṣie? mẹnu sọ wẹ mẹmẹsunnu ṣie lẹ?” wẹ Jesu kanse. To alọ etọn dindlẹn hlan devi etọn lẹ mẹ, e dọmọ: “Mì pọ́n onọ̀ ṣie po mẹmẹsunnu ṣie lẹ po! Na mẹdepope he wà ojlo Otọ́ ṣie he tin to olọn mẹ tọn, ewọ wẹ mẹmẹsunnu ṣie, mẹmẹyọnnu ṣie, po onọ̀ ṣie po.” To aliho ehe mẹ Jesu dohia dọ mahopọnna lehe kanṣiṣa he sìn ewọ dopọ po hẹnnumẹ etọn lẹ po na siso do sọ, haṣinṣan etọn hẹ devi etọn lẹ gbẹ́ sisọ humọ. Matiu 12:33-50; Malku 3:31-35; Luku 8:19-21.

▪ Nawẹ Falesi lẹ gboawupo nado hẹn “atin” lọ po “sinsẹ́n” lọ po yin dagbe gbọn?

▪ Etẹwẹ yin “ohia Jona tọn,” podọ nawẹ e yin gbigbẹ́ dai to godo mẹ gbọn?

▪ Nawẹ akọta Islaelivi owhe kanweko tintan whenu tọn taidi dawe lọ he mẹ gbigbọ mawé de jẹgbonu tọ́n sọn gbọn?

▪ Nawẹ Jesu zinnudo haṣinṣan pẹkipẹki etọn hẹ devi etọn lẹ ji do?

v